തിരുവനന്തപുരം: സഹപ്രവർത്തകനിൽ നിന്ന് ലൈംഗികാതിക്രമം നേരിട്ട വനിതാ പോലീസ് ഉദ്യോഗസ്ഥയ്ക്കെതിരെ പ്രതികാരബുദ്ധിയോടെയുള്ള നടപടിയെന്ന് പരാതി. എല്ലാവിധ ചട്ടങ്ങളും ലംഘിച്ചുകൊണ്ടാണ് ഇവരെ സ്ഥലംമാറ്റിയതെന്ന ആക്ഷേപമാണ് ഇപ്പോൾ ശക്തമാകുന്നത്. ഡെപ്യൂട്ടേഷൻ കാലാവധി പൂർത്തിയാകുന്നതിന് മുൻപേ തന്നെ കൊല്ലത്തുനിന്ന് കൊച്ചി സിറ്റിയിലേക്ക് ഇവരെ മാറ്റി നിയമിക്കുകയായിരുന്നു. കോൺഗ്രസ് അനുകൂല പോലീസ് അസോസിയേഷൻ ഭാരവാഹിയിൽ നിന്നാണ് ഉദ്യോഗസ്ഥയ്ക്ക് അതിക്രമം നേരിടേണ്ടി വന്നത്. സംഭവത്തിൽ സീനിയർ സിവിൽ പോലീസ് ഓഫീസറായിരുന്ന നവാസിനെതിരെ ചവറ പോലീസ് സ്റ്റേഷനിൽ പരാതി ലഭിക്കുകയും എഫ്ഐആർ രജിസ്റ്റർ ചെയ്യുകയും ചെയ്തിരുന്നു.
ഈ അന്യായമായ സ്ഥലംമാറ്റത്തിനെതിരെ ഉന്നത പോലീസ് മേധാവികൾക്ക് പരാതിക്കാരിയായ ഉദ്യോഗസ്ഥ കത്ത് നൽകിയിട്ടുണ്ട്. അതിക്രമം നടത്തിയെന്ന് ആരോപണവിധേയനായ ഉദ്യോഗസ്ഥന്റെ സസ്പെൻഷൻ റദ്ദാക്കി സ്വന്തം ജില്ലയിലേക്ക് തിരിച്ചെടുത്തതിന് പിന്നാലെയാണ് പരാതിക്കാരിക്ക് നേരെ ഇത്തരമൊരു പ്രതികാര നടപടി ഉണ്ടായിരിക്കുന്നത്. യുഡിഎഫ് സർക്കാർ അധികാരമേൽക്കുന്നതുവരെ പ്രതി സസ്പെൻഷനിൽ തുടരുകയായിരുന്നു. എന്നാൽ ഭരണമാറ്റം ഉണ്ടായതോടെ ഇയാൾ സർവീസിലേക്ക് തിരികെയെത്തുകയും സ്വന്തം നാടായ ആലപ്പുഴയിലെ ട്രാഫിക് വിഭാഗത്തിലേക്ക് സ്ഥലംമാറ്റം നേടിയെടുക്കുകയുമായിരുന്നു.
കഴിഞ്ഞ നവംബറിലായിരുന്നു കേസിനാസ്പദമായ അനിഷ്ട സംഭവം അരങ്ങേറിയത്. രാത്രികാല ഡ്യൂട്ടിയിലുണ്ടായിരുന്ന വനിതാ സിവിൽ പോലീസ് ഓഫീസറെ ലൈംഗിക ഉദ്ദേശ്യത്തോടെ ഇയാൾ കടന്നുപിടിക്കുകയായിരുന്നു. സംഭവത്തിന്റെ സിസിടിവി ദൃശ്യങ്ങൾ പോലീസിന് ലഭിച്ചിട്ടും ചില മുതിർന്ന പോലീസ് ഉദ്യോഗസ്ഥർ നവാസിനെ സംരക്ഷിക്കാൻ കിണഞ്ഞു ശ്രമിച്ചതായി മുൻപേ തന്നെ ആരോപണങ്ങൾ നിലനിന്നിരുന്നു. ഗുരുതരമായ വകുപ്പുകൾ ഒഴിവാക്കിക്കൊണ്ടാണ് ചവറ പോലീസ് എഫ്ഐആർ തയ്യാറാക്കിയതെന്നും, തൊഴിലിടങ്ങളിലെ അതിക്രമം തടയുന്നതിനുള്ള പോഷ് ആക്ട് (POSH Act) പ്രകാരമുള്ള വകുപ്പുകൾ ചുമത്തിയില്ലെന്നും പരാതി ഉയർന്നിരുന്നു. ഇതിന് പുറമെ സംഭവസ്ഥലത്തെ സിസിടിവി ദൃശ്യങ്ങൾ നശിപ്പിക്കാൻ ശ്രമിച്ചതായും ആക്ഷേപമുണ്ട്.
