കൊച്ചി: സംസ്ഥാന ആസൂത്രണ ബോർഡിലെ നിയമന പരീക്ഷയിലെ ചോദ്യപേപ്പർ ക്രമക്കേടുമായി ബന്ധപ്പെട്ട് പബ്ലിക് സർവീസ് കമ്മീഷനെതിരെ കടുത്ത വിമർശനവുമായി ഹൈക്കോടതി. പിഎസ്‌സിയുടെ ഭാഗത്തുനിന്ന് എന്തെങ്കിലും തരത്തിലുള്ള ക്രമക്കേടുകൾ നടന്നിട്ടുണ്ടെങ്കിൽ അതിൽ അന്വേഷണം വേണ്ടേയെന്ന് കോടതി ആരാഞ്ഞു. അന്വേഷണ നടപടികൾ തടയണമെന്ന് ആവശ്യപ്പെട്ട് പിഎസ്സി നൽകിയ ഹർജി പരിഗണിക്കവേയാണ് ഹൈക്കോടതിയുടെ ഈ ചോദ്യം. അത്തരമൊരു അന്വേഷണം തടയണമെന്ന കമ്മീഷന്റെ വാദം എങ്ങനെ ഉൾക്കൊള്ളാൻ കഴിയുമെന്നും കോടതി ചോദിച്ചു.
കോടിക്കണക്കിന് സാധാരണക്കാരുടെ ഭാവി പ്രതീക്ഷയാണ് പിഎസ്സി എന്ന ഭരണഘടനാ സ്ഥാപനം. ഉയർന്നുവന്നിരിക്കുന്നത് അതീവ ഗൗരവമുള്ള ആക്ഷേപങ്ങളാണെന്നും പ്രഥമദൃഷ്ട്യാ ഇത് അഴിമതിയല്ലേയെന്നും കോടതി ആരാഞ്ഞു. പരീക്ഷയിൽ 58 ചോദ്യങ്ങൾ മാറ്റിയ നടപടി എങ്ങനെയാണ് വിശദീകരിക്കാൻ സാധിക്കുകയെന്നും, ഇതാണ് അഴിമതി എന്നതുകൊണ്ട് വ്യക്തമാകുന്നതെന്നും കോടതി നിരീക്ഷിച്ചു.
ചോദ്യം ചെയ്യൽ എന്നത് ഒരു അന്വേഷണത്തിലെ പ്രാഥമിക പടി മാത്രമാണ്. കേസിൽ വിവരങ്ങൾ ശേഖരിക്കുന്നതിനാണ് വിളിപ്പിക്കുന്നത്, അതിനെ എന്തിനാണ് ഭയപ്പെടുന്നതെന്നും എതിർക്കുന്നതെന്നും കോടതി ചോദിച്ചു. വിഷയത്തിൽ 180 പരാതികൾ ലഭിച്ചിട്ടുണ്ടെന്ന് സർക്കാർ കോടതിയിൽ വ്യക്തമാക്കി. ചെയർമാൻ ഉൾപ്പെടെയുള്ളവർ അന്വേഷണവുമായി സഹകരിക്കുന്നില്ലെന്നും, ഇത്തരത്തിൽ നിസ്സഹകരണം തുടർന്നാൽ അടുത്ത ഘട്ടത്തിലേക്ക് കടക്കുമെന്നും സർക്കാർ ബോധിപ്പിച്ചു. അങ്ങനെയെങ്കിൽ നിർബന്ധിത നടപടികളിലേക്ക് കടന്നുകൂടേയെന്ന് കോടതി ചോദിച്ചു. പിഎസ്‌സിക്ക് സമൂഹത്തോട് ഒരു ധാർമ്മിക ഉത്തരവാദിത്തമുണ്ട്. അന്വേഷണത്തോട് സഹകരിക്കാൻ തയ്യാറായില്ലെങ്കിൽ സർക്കാരിന് കർശന നടപടികളിലേക്ക് നീങ്ങാമെന്നും കോടതി വ്യക്തമാക്കി. കേസ് തുടർനടപടികൾക്കായി ചൊവ്വാഴ്ച വീണ്ടും പരിഗണിക്കും.
