തിരുവനന്തപുരം: മലയാളത്തിലെ സ്വതന്ത്ര ഡിജിറ്റൽ മാധ്യമ പ്ലാറ്റ്‌ഫോമായ 'നോക്യാപി'ന്റെ (NOCAP) ഫേസ്ബുക്ക് പേജിന് മെറ്റ ഇന്ത്യയിൽ നിയന്ത്രണമേർപ്പെടുത്തിയ സംഭവത്തിൽ ശക്തമായ എതിർപ്പറിയിച്ച് സിപിഐഎം കേന്ദ്രകമ്മിറ്റി അംഗം ഡോ. തോമസ് ഐസക്. വിമർശനാത്മകമായ നിലപാടുകളോടും സ്വതന്ത്ര മാധ്യമപ്രവർത്തനത്തോടുമുള്ള ഭരണകൂടത്തിന്റെ കടുത്ത അസഹിഷ്ണുതയാണ് നോക്യാപ്പിനെതിരായ ഈ നീക്കത്തിന് പിന്നിലെന്ന് അദ്ദേഹം ഫേസ്ബുക്ക് കുറിപ്പിലൂടെ വിമർശിച്ചു.

ഏത് സർക്കാരിന്റെ ഉത്തരവ് പ്രകാരമാണ് നടപടിയെന്ന് മെറ്റ വ്യക്തമാക്കിയിട്ടില്ലെങ്കിലും, കേന്ദ്രത്തിൽ സംഘപരിവാറും കേരളത്തിൽ മുഖ്യമന്ത്രി വി.ഡി. സതീശനും മാധ്യമങ്ങളോട് പുലർത്തുന്നത് ഒരേ മനോഭാവമായതിനാൽ അതിൽ വലിയ വ്യത്യാസമില്ലെന്ന് തോമസ് ഐസക് ചൂണ്ടിക്കാട്ടി. അടിയന്തരാവസ്ഥയെ ഓർമ്മിപ്പിക്കുന്ന ഫാസിസ്റ്റ് രീതികളുമായി മുന്നോട്ടുപോകാനാണ് ആരെങ്കിലും ഭാവിക്കുന്നതെങ്കിൽ അതിന് കേരളത്തിൽ അനുമതി നൽകില്ലെന്നും അദ്ദേഹം വ്യക്തമാക്കി. വലിയ സാമ്പത്തിക സ്രോതസ്സുകളോ വിപുലമായ സംവിധാനങ്ങളോ ഇല്ലാതിരുന്നിട്ടും, തെല്ലും പതറാതെ പുതിയ ഫേസ്ബുക്ക് പേജിലൂടെ ധീരമായി മാധ്യമപ്രവർത്തനം മുന്നോട്ടുകൊണ്ടുപോകാൻ തുനിഞ്ഞിറങ്ങിയ നോക്യാപ് ടീമിനെ അഭിനന്ദിക്കുന്നതായും അദ്ദേഹം കൂട്ടിച്ചേർത്തു.