തിരുവനന്തപുരം: മുഖ്യമന്ത്രി വി.ഡി. സതീശന്റെ ഭരണ-നേതൃ ശൈലിക്കെതിരെയുള്ള കടുത്ത എതിർപ്പിൽ മാറ്റമില്ലാതെ ഉറച്ചുനിൽക്കുകയാണ് കോൺഗ്രസിലെ എതിർവിഭാഗം. മറ്റന്നാൾ ഡൽഹിയിലെത്തി പാർട്ടി ഹൈക്കമാൻഡിന് നേരിട്ട് പരാതിക്കത്ത് കൈമാറാനാണ് യുഡിഎഫ് കൺവീനർ അടൂർ പ്രകാശിന്റെ നീക്കം. മുന്നണിയിലോ പാർട്ടിയിലോ യാതൊരുവിധ ചർച്ചകളും നടക്കുന്നില്ലെന്നും തികച്ചും ഏകപക്ഷീയമായ നിലപാടുകളാണ് മുഖ്യമന്ത്രിയുടേതെന്നും കേന്ദ്ര നേതൃത്വത്തെ ഇവർ ബോധ്യപ്പെടുത്തും. കൂടുതൽ മുതിർന്ന നേതാക്കളും ഹൈക്കമാൻഡിന് മുന്നിൽ സമാനമായ ആക്ഷേപങ്ങൾ ഉന്നയിച്ചേക്കുമെന്നാണ് സൂചന. വിവിധ ബോർഡ്, കോർപ്പറേഷൻ അധ്യക്ഷ നിയമനങ്ങളുമായി ബന്ധപ്പെട്ട തർക്കങ്ങളും അതൃപ്തികളും കേന്ദ്ര നേതൃത്വത്തിന്റെ ശ്രദ്ധയിൽപ്പെടുത്തും.
അതിനിടെ, അടൂർ പ്രകാശ് ഉന്നയിച്ച പരാതികളുടെ വെളിച്ചത്തിൽ എഐസിസി ജനറൽ സെക്രട്ടറി ദീപാ ദാസ് മുൻഷി ഹൈക്കമാൻഡിന് പ്രത്യേക റിപ്പോർട്ട് സമർപ്പിക്കും. വിഷയത്തിൽ അടൂർ പ്രകാശുമായി അവർ പ്രാഥമിക ചർച്ചകൾ നടത്തിക്കഴിഞ്ഞു. സംസ്ഥാനത്തെ മറ്റ് പ്രധാന നേതാക്കളുമായും ദീപാ ദാസ് മുൻഷി ആശയവിനിമയം നടത്തും. ബോർഡ്-കോർപ്പറേഷൻ പദവി വിതരണത്തിൽ കോൺഗ്രസിനുള്ളിൽ അസ്വസ്ഥതകൾ പുകയുന്ന പശ്ചാത്തലത്തിൽ, കേരളത്തിലെ രാഷ്ട്രീയ സാഹചര്യങ്ങൾ നേരിട്ട് വിലയിരുത്താനുള്ള ഒരുക്കത്തിലാണ് കേന്ദ്ര നേതൃത്വം.
മുന്നണിയിൽ യാതൊരു കൂടിയാലോചനകളും നടക്കുന്നില്ലെന്നും സുപ്രധാന തീരുമാനങ്ങൾ പത്രമാധ്യമങ്ങളിലൂടെയാണ് മനസ്സിലാക്കുന്നതെന്നും വ്യക്തമാക്കി അടൂർ പ്രകാശ് വാർത്താസമ്മേളനം നടത്തിയതോടെയാണ് പാർട്ടിക്കുള്ളിലെ ഭിന്നതകൾ മറനീക്കി പുറത്തുവന്നത്. മതിയായ കൂടിയാലോചനകളില്ലാതെയാണ് ബോർഡ്, കോർപ്പറേഷൻ പദവികൾ വീതിച്ചുനൽകിയതെന്ന് അദ്ദേഹം കുറ്റപ്പെടുത്തിയിരുന്നു. ഭരണപരിഷ്കാര കമ്മീഷൻ അധ്യക്ഷ നിയമനത്തിലും, ഡൽഹിയിലെ പ്രത്യേക പ്രതിനിധിയുടെ തെരഞ്ഞെടുപ്പിലുമുള്ള വിയോജിപ്പ് അദ്ദേഹം പരസ്യമാക്കി. മുന്നണി യോഗം വിളിച്ചുചേർക്കാൻ സാധിച്ചില്ലെന്നും, ചെയർമാൻ എന്ന പദവിയിലിരിക്കുന്ന മുഖ്യമന്ത്രിയാണ് യോഗം വിളിക്കാൻ മുൻകൈയെടുക്കേണ്ടിയിരുന്നതെന്നും അദ്ദേഹം ഓർമ്മിപ്പിച്ചു. നയപരമായ തീരുമാനങ്ങൾ ചർച്ചകളിലൂടെയായിരുന്നു കൈക്കൊള്ളേണ്ടിയിരുന്നത് തുടങ്ങി രൂക്ഷമായ ഭാഷയിലാണ് വി.ഡി. സതീശനെതിരെ അടൂർ പ്രകാശ് ആഞ്ഞടിച്ചത്. കെപിസിസി ആസ്ഥാനത്തായിരുന്നു മുഖ്യമന്ത്രി വാർത്താസമ്മേളനം നടത്തിയിരുന്നത്.
ഈ പരസ്യപ്രതികരണത്തിന് പിന്നാലെ അടൂർ പ്രകാശിനെ പിന്തുണച്ചും തള്ളിയും നേതാക്കൾ രംഗത്തെത്തിയതോടെ കോൺഗ്രസ് വ്യക്തമായ രണ്ട് പക്ഷങ്ങളായി പിളർന്നു. മന്ത്രി കെ. മുരളീധരനും രാജ്മോഹൻ ഉണ്ണിത്താൻ എംപിയും മുഖ്യമന്ത്രിയെ പിന്തുണച്ച് സംസാരിച്ചു. എന്നാൽ മഹിളാ കോൺഗ്രസ് നേതാവ് ജെബി മേത്തർ എംപിയും മുതിർന്ന നേതാവ് തിരുവഞ്ചൂർ രാധാകൃഷ്ണനും അടൂർ പ്രകാശിന്റെ നിലപാടുകൾക്ക് അനുകൂലമായ നിലപാടാണ് സ്വീകരിച്ചത്.
