തിരുവനന്തപുരം: പ്രമുഖ മലയാള സ്വതന്ത്ര ഡിജിറ്റൽ മാധ്യമ സ്ഥാപനമായ നോക്യാപിന്റെ (NOCAP) ഫേസ്ബുക്ക് പേജ് ഇന്ത്യയിൽ മെറ്റ റദ്ദാക്കിയ സംഭവത്തിൽ കടുത്ത വിയോജിപ്പ് രേഖപ്പെടുത്തി പ്രതിപക്ഷ നേതാവ് പിണറായി വിജയൻ രംഗത്ത്. അഭിപ്രായസ്വാതന്ത്ര്യത്തെ ഇല്ലാതാക്കാൻ യുഡിഎഫ് സർക്കാർ നടത്തുന്ന ഗൂഢശ്രമങ്ങളുടെ ഒടുവിലത്തെ ദൃഷ്ടാന്തമാണ് നോക്യാപിനെതിരായ ഈ നടപടിയെന്ന് അദ്ദേഹം തന്റെ ഫേസ്ബുക്ക് കുറിപ്പിൽ വ്യക്തമാക്കി. സോഷ്യൽ മീഡിയ സെൻസർഷിപ്പുകളിൽ സർക്കാരിന് യാതൊരു ബന്ധവുമില്ലെന്ന് നിരന്തരം അവകാശപ്പെടുമ്പോഴാണ് മാധ്യമത്തിന് വിലക്ക് വന്നിരിക്കുന്നതെന്നും, സർക്കാരിന്റെ നേരിട്ടുള്ള സമ്മർദ്ദമാണ് ഇതിന് പിന്നിലെന്ന് മെറ്റയുടെ നിലപാടിലൂടെ വ്യക്തമാകുന്നുണ്ടെന്നും അദ്ദേഹം ചൂണ്ടിക്കാട്ടി.
ഭരണകൂടത്തിന്റെ വിമർശനങ്ങളോടുള്ള ഭയവും മാധ്യമസ്വാതന്ത്ര്യത്തോടുള്ള തികഞ്ഞ അസഹിഷ്ണുതയുമാണ് ഈ നടപടിയിലൂടെ പുറത്തുവരുന്നത്. നരേന്ദ്ര മോദിയും സംഘപരിവാർ ശക്തികളും നടപ്പിലാക്കുന്ന അതേ മാധ്യമ വേട്ട തന്നെയാണ് കേരളത്തിൽ മുഖ്യമന്ത്രി വി.ഡി. സതീശനും യുഡിഎഫ് സർക്കാരും ആവർത്തിക്കുന്നതെന്നും പിണറായി വിജയൻ കുറ്റപ്പെടുത്തി.
സർക്കാരിൽ നിന്ന് ലഭിച്ച ഔദ്യോഗിക നോട്ടീസിന്റെ അടിസ്ഥാനത്തിലാണ് ഇന്ത്യയിൽ നോക്യാപിന്റെ ഫേസ്ബുക്ക് പേജിന് നിയന്ത്രണമേർപ്പെടുത്തിയതെന്നാണ് മെറ്റ അധികൃതർ നൽകിയ അറിയിപ്പ്. 'നിയമവിരുദ്ധ പ്രവർത്തനങ്ങൾ' ആരോപിച്ചുകൊണ്ട് 2000-ലെ ഐടി ആക്ട് സെക്ഷൻ 79(3)(ബി) പ്രകാരം ഭരണകൂടം നൽകിയ നിർദ്ദേശത്തെ തുടർന്നാണ് ഈ വിലക്കെന്ന് ചീഫ് എഡിറ്റർ അലി ഹൈദർ പത്രക്കുറിപ്പിലൂടെ വിശദീകരിച്ചു. എന്നാൽ, നോക്യാപ് പങ്കുവെച്ച ഏത് വിവരമാണ് 'നിയമവിരുദ്ധം' എന്നതുസംബന്ധിച്ച് കൃത്യമായ ഒരു വിശദീകരണവും മെറ്റയിൽ നിന്നോ സർക്കാരിന്റെ ഭാഗത്തുനിന്നോ ഇതുവരെ ലഭ്യമായിട്ടില്ലെന്നും അദ്ദേഹം വ്യക്തമാക്കി.
