തിരുവനന്തപുരം: പാർട്ടിക്കുള്ളിലെ ആഭ്യന്തര തർക്കങ്ങൾ പാർട്ടി വേദികളിൽ തന്നെയാണ് ഉന്നയിക്കേണ്ടതെന്നും അത്തരം കാര്യങ്ങൾ പരസ്യമായി മാധ്യമങ്ങൾക്ക് മുന്നിൽ പറയുന്നതിനോട് യോജിക്കാനാവില്ലെന്നും എഐസിസി സംഘടനാ ചുമതലയുള്ള ജനറൽ സെക്രട്ടറി കെ.സി. വേണുഗോപാൽ. തികഞ്ഞ ജനാധിപത്യ സ്വഭാവമുള്ള രാഷ്ട്രീയ പ്രസ്ഥാനമാണ് കോൺഗ്രസെന്നും നിലവിലുള്ള പ്രശ്നങ്ങളെല്ലാം ചർച്ചകളിലൂടെ പരിഹരിക്കുമെന്നും അദ്ദേഹം വ്യക്തമാക്കി. വ്യത്യസ്ത അഭിപ്രായങ്ങൾ ഒരുമിച്ചിരുന്ന് സംസാരിച്ച് തീർക്കും; താൻ ഒരിക്കലും സർക്കാരിനെതിരായി സംസാരിച്ചിട്ടില്ലെന്നും അടൂർ പ്രകാശ് ഉന്നയിച്ച വിഷയങ്ങളിൽ തനിക്ക് സുവ്യക്തമായ നിലപാടുണ്ടെന്നും അദ്ദേഹം കൂട്ടിച്ചേർത്തു.
വിയോജിപ്പുകൾ പ്രകടിപ്പിക്കുന്നവരെ തുണ്ടംതുണ്ടമായി വെട്ടിനുറുക്കി ഇല്ലായ്മ ചെയ്യുന്ന രീതിയല്ല കോൺഗ്രസ് പാർട്ടിക്കുള്ളതെന്ന് കെ.സി. വേണുഗോപാൽ പറഞ്ഞു. സംഘടനാപരമായ വിഷയങ്ങൾ പാർട്ടിയുടെ ഔദ്യോഗിക വേദികളിൽ മാത്രം ചർച്ച ചെയ്യുക എന്നതാണ് തന്റെ വ്യക്തിപരമായ തീരുമാനം. അതിന് സാധിക്കാത്ത പക്ഷം മുതിർന്ന നേതാക്കളുടെ ശ്രദ്ധയിൽപ്പെടുത്താം. അതാണ് തന്റെ പ്രവർത്തനശൈലി; ഇന്നേവരെ സർക്കാരിനെ വിമർശിക്കാൻ താൻ മുതിർന്നിട്ടില്ല. മറ്റുള്ളവരുടെ വ്യക്തിപരമായ അഭിപ്രായങ്ങളുമായി തന്റെ പേര് കൂട്ടിക്കെട്ടേണ്ടതില്ല. എന്ത് പ്രശ്നമുണ്ടായാലും തന്നെ പ്രതിക്കൂട്ടിൽ നിർത്താനാണ് ചിലർ താല്പര്യപ്പെടുന്നത്. വൻ പ്രതീക്ഷയോടെയാണ് ജനം ഈ സർക്കാരിനെ ഉറ്റുനോക്കുന്നത്. ജനങ്ങളുടെ ആ പ്രതീക്ഷകൾ കാത്തുസൂക്ഷിക്കാൻ ഒറ്റക്കെട്ടായി പ്രവർത്തിക്കുമെന്നും നിലവിലുള്ള ചെറിയ ഭിന്നതകൾ രമ്യമായി സംസാരിച്ച് പരിഹരിക്കുമെന്നും അദ്ദേഹം വ്യക്തമാക്കി.
അതേസമയം, വരും ദിവസങ്ങളിൽ രാജ്യമൊട്ടാകെ ശക്തമായ പ്രക്ഷോഭങ്ങൾക്ക് സാക്ഷ്യം വഹിക്കുമെന്ന് കെ.സി. വേണുഗോപാൽ ചൂണ്ടിക്കാട്ടി. 'വോട്ട് ബച്ചാവോ ദേശ് ബച്ചാവോ' എന്ന പേരിൽ രാജ്യവ്യാപകമായ കാമ്പയിൻ സംഘടിപ്പിക്കുകയാണ്. ഇന്ത്യയിലെ ചെറുപാർട്ടികളെയും നേതാക്കളെയും ഉൾപ്പെടുത്തിക്കൊണ്ടുള്ള വൻ ജനകീയ പോരാട്ടമായിരിക്കും ഇത്. നാൾക്കുനാൾ ജനാധിപത്യ സംവിധാനം അതീവ സങ്കീർണ്ണമായി മാറുകയാണ്. 'ഇൻഡ്യ' മുന്നണിയിൽ ഇത് സംബന്ധിച്ച കൃത്യമായ മാർഗ്ഗരേഖകൾ നൽകിക്കഴിഞ്ഞു. കള്ളക്കമ്മീഷനെ പുറത്താക്കുക എന്ന ഒറ്റ ലക്ഷ്യമാണ് എല്ലാവർക്കുമുള്ളത്. മോദി സർക്കാർ നിയോഗിച്ച രണ്ട് തെരഞ്ഞെടുപ്പ് കമ്മീഷണർമാർ അവരുടെ ഉത്തരവുകൾക്കെതിരെ 14 തവണയാണ് വിയോജിപ്പ് അറിയിച്ചത്. ഈ വിഷയത്തെ ന്യായീകരിക്കാൻ ബിജെപി നിർബന്ധിതരാകും. ഇതിന് പൂർണ്ണ ഉത്തരവാദികളായ നരേന്ദ്ര മോദിയെയും അമിത് ഷായെയും കൊണ്ട് ഉത്തരം പറയിക്കുക എന്നതാണ് പ്രധാന ലക്ഷ്യമെന്നും അദ്ദേഹം വ്യക്തമാക്കി.
2025 ജൂണിൽ ബിഹാറിൽ തുടക്കമിട്ട തെരഞ്ഞെടുപ്പ് കമ്മീഷന്റെ പ്രത്യേക തീവ്ര വോട്ടർപട്ടിക പരിഷ്കരണത്തിലൂടെ (എസ്ഐആർ) രാജ്യത്തെ 30 സംസ്ഥാനങ്ങളിലും കേന്ദ്രഭരണ പ്രദേശങ്ങളിലുമായി 13 കോടിയിലധികം വോട്ടർമാരുടെ പേരുകളാണ് കരട് വോട്ടർപട്ടികയിൽ നിന്നും ഒഴിവാക്കപ്പെട്ടത്. ആർക്കൊക്കെ വോട്ടവകാശം വേണം, ആർക്കൊക്കെ വേണ്ട എന്ന് തെരഞ്ഞെടുപ്പ് കമ്മീഷൻ ഏകപക്ഷീയമായി തീരുമാനിക്കുകയാണെന്നാണ് വിവിധ രാഷ്ട്രീയ പാർട്ടികൾ ആക്ഷേപിക്കുന്നത്.
