തിരുവനന്തപുരം: കൈക്കൂലി വാങ്ങിയെന്ന ആരോപണങ്ങൾ പൂർണ്ണമായും തള്ളി തിരുവനന്തപുരം കോർപ്പറേഷൻ തൃക്കണ്ണാപുരം വാർഡ് കൗൺസിലർ അജിൻ. പുറത്തുവന്ന ശബ്ദരേഖയിൽ പണം ആവശ്യപ്പെടുന്ന ഭാഗങ്ങൾ എഐ (നിർമ്മിത ബുദ്ധി) സാങ്കേതികവിദ്യ ഉപയോഗിച്ച് എഡിറ്റ് ചെയ്ത് ചേർത്തതാണെന്നാണ് അദ്ദേഹത്തിന്റെ വിശദീകരണം. താൻ ഒരു രൂപയെങ്കിലും കൈക്കൂലിയായി കൈപ്പറ്റിയെന്ന് തെളിയിക്കാൻ അദ്ദേഹം വെല്ലുവിളിച്ചു. ഈ സംഭവത്തിൽ പാർട്ടി തന്നോട് വിശദീകരണം ആവശ്യപ്പെട്ടിട്ടില്ലെന്നും, താൻ തെറ്റുകാരനല്ലെന്ന ഉത്തമബോധ്യം പാർട്ടി നേതൃത്വത്തിനുണ്ടെന്നും അജിൻ വ്യക്തമാക്കി.
ആരോപണങ്ങൾക്ക് പിന്നിൽ പ്രവർത്തിക്കുന്നത് ബിജെപി-ആർഎസ്എസ് ഭൂമാഫിയയാണെന്ന് അദ്ദേഹം ആരോപിച്ചു. പുറമ്പോക്ക് ഭൂമി വിൽക്കാൻ സാധിക്കാത്തതിലുണ്ടായ വ്യക്തിവൈരാഗ്യമാണ് ഇത്തരം ഒരു ആക്ഷേപത്തിന് ആധാരം. വിഷയത്തിൽ നിയമപരമായ നടപടികളിലേക്ക് കടക്കുമെന്നും, താൻ കൈക്കൂലി വാങ്ങിയെന്ന് തെളിയിക്കപ്പെട്ടാൽ കൗൺസിലർ സ്ഥാനം രാജിവെക്കാൻ തയ്യാറാണെന്നും അദ്ദേഹം പറഞ്ഞു. കൂടാതെ, തനിക്കെതിരെ വ്യാജ ആരോപണം ഉന്നയിച്ചവർക്കെതിരെ പരാതി സമർപ്പിക്കുമെന്നും അജിൻ കൂട്ടിച്ചേർത്തു.
എന്നാൽ, കൗൺസിലർ സ്ഥാനം രാജിവെച്ച് അജിൻ അന്വേഷണത്തെ നേരിടണമെന്നാണ് യുഡിഎഫിന്റെ ആവശ്യം. അജിൻ തന്റെ ഔദ്യോഗിക പദവി ദുരുപയോഗം ചെയ്തതായി കോൺഗ്രസ് നേതാവ് കെ.എസ്. ശബരിനാഥൻ ആരോപിച്ചു. ഭീഷണിപ്പെടുത്തി പണം ആവശ്യപ്പെടുന്ന ദൃശ്യങ്ങൾ അതീവ ഗൗരവമുള്ളതാണെന്നും കർശന നടപടി ആവശ്യപ്പെട്ട് സംസ്ഥാന വിജിലൻസ് മേധാവിയെ സമീപിക്കുമെന്നും അദ്ദേഹം വ്യക്തമാക്കി.
തിരുവനന്തപുരം കോർപ്പറേഷനിലെ തൃക്കണ്ണാപുരം വാർഡ് കൗൺസിലർ കൈക്കൂലി ചോദിക്കുന്നുവെന്ന രീതിയിലുള്ള ഒരു വീഡിയോ അടുത്തിടെ വ്യാപകമായി പ്രചരിച്ചിരുന്നു. പത്ത് ലക്ഷം രൂപയാണ് ഇയാൾ ആവശ്യപ്പെട്ടതെന്നാണ് ആരോപണം. പണം നൽകാൻ തയ്യാറായില്ലെങ്കിൽ വസ്തുവിൽ ഡിവൈഎഫ്ഐയെക്കൊണ്ട് കൊടികുത്തിക്കുമെന്ന് ഭീഷണിപ്പെടുത്തിയതായും ആക്ഷേപമുണ്ട്. അജിനുമായി നടത്തിയ സംഭാഷണത്തിന്റെ ശബ്ദരേഖ പരാതിക്കാരൻ തന്നെയാണ് പരസ്യപ്പെടുത്തിയത്.
