പാലക്കാട്: കൊഴിഞ്ഞാമ്പാറയിൽ പിഞ്ചുമക്കളെ കൊലപ്പെടുത്തിയ കേസിൽ മാതാവിനെതിരെ കൊലക്കുറ്റം ചുമത്താൻ പോലീസ് നടപടി ആരംഭിച്ചു. മക്കളായ രണ്ട് കുഞ്ഞുങ്ങളെയും കൊലപ്പെടുത്തിയത് താൻ തന്നെയാണെന്ന് പ്രതിയായ നിവേദ്യ പോലീസിനോട് സമ്മതിച്ചു. കുഞ്ഞുങ്ങൾ ഉള്ളതുകൊണ്ട് സ്വന്തം ഇഷ്ടപ്രകാരം സ്വതന്ത്രമായി ജീവിക്കാൻ സാധിക്കുന്നില്ലെന്നാണ് ഇവർ മൊഴി നൽകിയത്. ഉപരിപഠനം നടത്തണമെന്നും മോഡലിംഗ് രംഗത്തേക്ക് കടക്കണമെന്നുമുള്ള ആഗ്രഹങ്ങൾക്ക് മക്കൾ ഒരു തടസ്സമായി മാറിയതിനാലാണ് കൃത്യം നടത്തിയതെന്ന് പ്രതി വ്യക്തമാക്കിയതായി അന്വേഷണ സംഘം അറിയിച്ചു.
കുട്ടികളുടെ മരണത്തിൽ ദുരൂഹതയുണ്ടെന്നും കൊലപാതകമാകാൻ സാധ്യതയുണ്ടെന്നും അയൽവാസികളും ബന്ധുക്കളും തുടക്കത്തിൽത്തന്നെ സംശയം പ്രകടിപ്പിച്ചിരുന്നു. നിവേദ്യ മക്കളെ വേണ്ടവിധം പരിചരിച്ചിരുന്നില്ലെന്നും, എപ്പോഴും ഫോണിൽത്തന്നെ സമയം ചെലവഴിച്ചിരുന്നതായും സമീപവാസികൾ മൊഴി നൽകിയിരുന്നു. ഇതിന്റെ വെളിച്ചത്തിൽ യുവതിയെ പോലീസ് സ്റ്റേഷനിൽ വിളിച്ചുവരുത്തി വിശദമായ ചോദ്യം ചെയ്യലിന് വിധേയമാക്കുകയായിരുന്നു. തുടർച്ചയായ ചോദ്യം ചെയ്യലിൽ നിവേദ്യ കുറ്റം സമ്മതിച്ചതായി പോലീസ് വ്യക്തമാക്കി. യുവതിയുടെ ഭർത്താവിന് മദ്യപാനശീലമുണ്ടെന്നും ഇതിനെച്ചൊല്ലി കുടുംബത്തിൽ അസ്വാരസ്യങ്ങൾ നിലനിന്നിരുന്നുവെന്നും കണ്ടെത്തിയിട്ടുണ്ട്. പ്രതിക്ക് മാനസിക വൈകല്യങ്ങളൊന്നുമില്ല. നിലവിലെ അന്വേഷണത്തിൽ ഒരാൾ മാത്രമാണ് പ്രതിസ്ഥാനത്തുള്ളതെങ്കിലും സംഭവത്തിൽ വിശദമായ തുടർപരിശോധനകൾ ആവശ്യമാണെന്ന് പോലീസ് വ്യക്തമാക്കി.
ചൊവ്വാഴ്ചയായിരുന്നു പാലക്കാട് കൊഴിഞ്ഞാമ്പാറയിൽ അഞ്ചും മൂന്നും വയസ്സ് പ്രായമുള്ള സഹോദരങ്ങളെ വീട്ടിനുള്ളിലെ വെള്ളത്തൊട്ടിയിൽ ജീവനറ്റ നിലയിൽ കണ്ടെത്തിയത്. അഞ്ച് വയസ്സുകാരി ജെന്നിഫർ, മൂന്ന് വയസ്സുകാരനായ റോബിൻ എന്നിവരാണ് ദാരുണമായി മരണപ്പെട്ടത്. രണ്ട് കുട്ടികളും ഒരേസമയം വെള്ളത്തൊട്ടിയിൽ വീണു മരിച്ച സംഭവം തുടക്കം മുതലേ പോലീസിൽ വലിയ സംശയമുണർത്തിയിരുന്നു. കൃത്യം നടക്കുമ്പോൾ കുട്ടികളുടെ പിതാവായ ജോൺ വീട്ടിൽ ഉണ്ടായിരുന്നില്ല. നാട്ടുകാരുടെയും ബന്ധുക്കളുടെയും വെളിപ്പെടുത്തലുകൾ നിവേദ്യയ്ക്കെതിരായതോടെയാണ് അന്വേഷണം അമ്മയിലേക്ക് പൂർണ്ണമായി കേന്ദ്രീകരിച്ചതും പ്രതി പിടിയിലായതും.
