കൊച്ചി: സംസ്ഥാനത്തെ സർക്കാർ ആശുപത്രികളിൽ മരുന്നുകൾക്ക് രൂക്ഷമായ ദൗർലഭ്യം നേരിടുന്നുവെന്ന റിപ്പോർട്ടുകളിൽ ഭരണകൂടത്തിനെതിരെ കടുത്ത വിമർശനവുമായി സിപിഐഎം കേന്ദ്രകമ്മിറ്റി അംഗം ഡോ. തോമസ് ഐസക്. മരുന്ന് ക്ഷാമത്തിന്റെ പശ്ചാത്തലത്തിൽ പൊതുമേഖലയെ തകർത്ത് വെടക്കാക്കി തനിക്കാക്കാനുള്ള ശ്രമങ്ങളാണോ നടക്കുന്നതെന്ന് സംശയിക്കേണ്ടിയിരിക്കുന്നുവെന്ന് അദ്ദേഹം പരിഹസിച്ചു. വൻകിട മരുന്ന് നിർമ്മാണ കമ്പനികളിൽ നിന്നാണ് കോൺഗ്രസ് ഏറ്റവുമധികം ഫണ്ട് കൈപ്പറ്റിയിട്ടുള്ളതെന്ന് ഓർമ്മിപ്പിച്ചായിരുന്നു അദ്ദേഹത്തിന്റെ ആക്ഷേപം. രാജ്യത്തെ മരുന്ന് ഉത്പാദനത്തിന്റെ പകുതിയിലധികവും കേന്ദ്രീകരിച്ചിരിക്കുന്നത് രേവന്ത് റെഡ്ഡി മുഖ്യമന്ത്രിയായ തെലങ്കാനയിലായതിനാൽ അവിടെനിന്ന് വൻതോതിൽ സംഭാവനകൾ പിരിച്ചിട്ടുണ്ടെന്നും തോമസ് ഐസക് ആരോപിച്ചു. അങ്ങനെ സ്വീകരിച്ച സാമ്പത്തിക സഹായങ്ങൾക്ക് പ്രതിഫലമായി ഉപകാരം ചെയ്തു കൊടുക്കാനുള്ള സമ്മർദ്ദങ്ങൾ പല കോണുകളിൽ നിന്നുമുണ്ടാകുന്നുണ്ട്. അതുകൊണ്ടുതന്നെ നിലവിലെ സംഭവവികാസങ്ങളെ യാദൃശ്ചികമായി കാണാൻ കഴിയില്ലെന്നും അദ്ദേഹം ചൂണ്ടിക്കാട്ടി. ആരോഗ്യവകുപ്പ് മന്ത്രി മാത്രമല്ല, അദ്ദേഹത്തിന്റെ ഇപ്പോഴത്തെ പ്രൈവറ്റ് സെക്രട്ടറിയായ ഡോക്ടറും മുൻ ഭരണകാലത്ത് എന്തൊക്കെ കാര്യങ്ങളാണ് പ്രചരിപ്പിച്ചു നടന്നതെന്നും ഐസക് ചോദിച്ചു.

മെഡിക്കൽ കോളേജുകൾ ഉൾപ്പെടെയുള്ള സംസ്ഥാനത്തെ സർക്കാർ ആശുപത്രികളിൽ മരുന്നുകൾ കിട്ടാനില്ലെന്ന് നേരത്തെ വിവരങ്ങൾ പുറത്തുവന്നിരുന്നു. എന്നാൽ ഈ വാർത്തകളെ തുടക്കത്തിൽ പൂർണ്ണമായും തള്ളിക്കളയുന്ന സമീപനമാണ് ആരോഗ്യവകുപ്പ് മന്ത്രി കെ. മുരളീധരൻ സ്വീകരിച്ചത്. എന്നാൽ കഴിഞ്ഞ ദിവസം സ്ഥിതിഗതികൾ വിലയിരുത്താൻ ചേർന്ന ഉന്നതതല യോഗത്തിൽ ആരോഗ്യ മന്ത്രിയും വകുപ്പ് സെക്രട്ടറിയും തമ്മിൽ രൂക്ഷമായ തർക്കമുണ്ടായതായും വിവരങ്ങൾ പുറത്തുവന്നു. മരുന്നുകൾക്ക് ക്ഷാമമുണ്ടെന്നും ഇല്ലാത്തവ അടിയന്തരമായി സംഭരിക്കണമെന്നും മന്ത്രി നിർദ്ദേശിച്ചപ്പോൾ, മരുന്ന് ദൗർലഭ്യം വെറും മാധ്യമസൃഷ്ടി മാത്രമാണെന്ന നിലപാടിലായിരുന്നു ആരോഗ്യ സെക്രട്ടറി ശർമ്മിള ദേവി ജോസഫ് ഉറച്ചുനിന്നത്. ലഭ്യമല്ലാത്ത മരുന്നുകൾ വാങ്ങാൻ ഉടനടി ടെൻഡർ ക്ഷണിക്കണമെന്ന് മന്ത്രി ആവശ്യപ്പെട്ടെങ്കിലും അടുത്ത ആഴ്ച കേരള മെഡിക്കൽ സർവീസസ് കോർപ്പറേഷൻ ബോർഡ് യോഗം ചേരാമെന്നായിരുന്നു സെക്രട്ടറിയുടെ മറുപടി.

കെഎംഡിസിഎല്ലിൽ 28 ജീവൻരക്ഷാ മരുന്നുകൾ നിലവിൽ സ്റ്റോക്കില്ലെന്ന വിവരം ജനറൽ മാനേജർ ഉന്നതതല യോഗത്തിൽ ഔദ്യോഗികമായി അറിയിച്ചിരുന്നു. ആശുപത്രികളിലെ മരുന്ന് ശേഖരം തീർന്നുപോകുന്നതിൽ ഡിഎംഒമാരും കടുത്ത ആശങ്ക പ്രകടിപ്പിച്ചു. ഇതിനിടെ, സ്ഥിരം എംഡി ഇല്ലാത്തതിനാൽ നിർണ്ണായക തീരുമാനങ്ങൾ കൈക്കൊള്ളാൻ പ്രയാസം നേരിടുന്നുവെന്ന് ചൂണ്ടിക്കാട്ടി കേരള മെഡിക്കൽ സർവീസസ് കോർപ്പറേഷന്റെ ജനറൽ മാനേജർക്ക് മാനേജിംഗ് ഡയറക്ടറുടെ അധിക ചുമതല നൽകി ഉത്തരവിറക്കുകയും ചെയ്തു.

സംസ്ഥാനത്ത് യാതൊരുവിധ മരുന്ന് ക്ഷാമവുമില്ലെന്ന മുൻനിലപാടിൽ നിന്ന് പിന്നീട് അയഞ്ഞ ആരോഗ്യ മന്ത്രി കെ. മുരളീധരൻ ചില പ്രത്യേക മരുന്നുകൾക്ക് കുറവുണ്ടെന്ന് സമ്മതിക്കുകയായിരുന്നു. എന്നാൽ വെയർഹൗസുകളിൽ ആവശ്യത്തിന് സ്റ്റോക്കില്ലെന്ന് ഡിഎംഒമാർ തുറന്നുപറഞ്ഞിട്ടും മരുന്ന് പ്രതിസന്ധിയില്ലെന്ന് വകുപ്പ് സെക്രട്ടറി വാദിക്കുന്നത് ബോർഡ് യോഗം ചേർന്ന് ടെൻഡർ നടപടികൾ പൂർത്തിയാക്കുന്നതിൽ വലിയ അനിശ്ചിതത്വമാണ് സൃഷ്ടിച്ചിരിക്കുന്നത്.