തിരുവനന്തപുരം: സംസ്ഥാന സർക്കാർ സംഘടിപ്പിച്ച 'റീ ഇമാജിനിങ് കേരളം' പദ്ധതിയിൽ സ്വകാര്യ സ്ഥാപനത്തെ പങ്കാളിയാക്കിയതുമായി ബന്ധപ്പെട്ട് പുറത്തുവന്ന വാർത്തയിൽ പ്രതികരണവുമായി പ്രതിപക്ഷ നേതാവ് പിണറായി വിജയൻ. ജനങ്ങളാൽ തെരഞ്ഞെടുക്കപ്പെടുന്ന സർക്കാരുകളുടെ നയരൂപീകരണവും നാടിന്റെ വികസന കാഴ്ചപ്പാടുകളും ബന്ധപ്പെട്ട പാർട്ടികളും മുന്നണികളും വിശദമായി കൂടിയാലോചിച്ച് നിശ്ചയിക്കുന്നതാണ് ജനാധിപത്യപരമായ രീതിയെന്ന് അദ്ദേഹം ചൂണ്ടിക്കാട്ടി. എന്നാൽ ചരിത്രത്തിലാദ്യമായി ഒരു ഭരണകൂടത്തിന്റെ സുപ്രധാന നയങ്ങൾ തീരുമാനിക്കുന്ന ചുമതല ഒരു സ്വകാര്യ ബഹുരാഷ്ട്ര സ്ഥാപനത്തെ ഏൽപ്പിക്കുന്ന നയമാണ് യുഡിഎഫ് സർക്കാർ കൈക്കൊണ്ടിരിക്കുന്നതെന്ന് റിപ്പോർട്ടുകൾ വ്യക്തമാക്കുന്നു. ഇതിൽ കോൺഗ്രസ് നേതൃത്വത്തിന്റെയും യുഡിഎഫിലെ ഇതര ഘടകകക്ഷികളുടെയും പൊതുനിലപാട് എന്താണെന്ന് വ്യക്തമാക്കപ്പെടേണ്ടതുണ്ട്. മുഖ്യമന്ത്രിയുടെ ഈ സമീപനം ജനാധിപത്യ ഭരണക്രമത്തോടുള്ള അവഹേളനവും വോട്ടർമാരെ പരസ്യമായി വെല്ലുവിളിക്കലുമാണെന്ന് അദ്ദേഹം ഫേസ്ബുക്ക് കുറിപ്പിലൂടെ തുറന്നടിച്ചു.
'റീ ഇമാജിനിങ് കേരളം' പരിപാടിയിലെ പദ്ധതീരൂപീകരണം ഉൾപ്പെടെയുള്ള നിർണ്ണായക കാര്യങ്ങൾ ഒരു സ്വകാര്യ ഏജൻസിയെ ഏൽപ്പിച്ചത് പദ്ധതി വിവരങ്ങളുടെ സുരക്ഷിതത്വത്തെയും രഹസ്യാത്മകതയെയും ബാധിക്കുമെന്ന് പിണറായി വിജയൻ മുന്നറിയിപ്പ് നൽകി. സർക്കാർ സംവിധാനങ്ങളെയാകെ പൂർണ്ണമായി തഴഞ്ഞും, ഉദ്യോഗസ്ഥരെയും ജനപ്രതിനിധികളെയും സർക്കാർ തന്നെ രൂപീകരിച്ച പ്ലാനിംഗ് ബോർഡിനെപ്പോലും പാടെ അവഗണിച്ചുമാണ് കോർപ്പറേറ്റ് ഉപദേശകരെ മുൻനിരയിൽ പ്രതിഷ്ഠിച്ചിരിക്കുന്നത്. സാങ്കേതിക വിദഗ്ദ്ധോപദേശങ്ങൾക്കായി പ്രത്യേക ഏജൻസികളെ കൺസൾട്ടൻസികളായി ആശ്രയിക്കുന്നതുപോലെയല്ല, വികസന മുൻഗണനകൾ നിശ്ചയിക്കാനും നയങ്ങൾ രൂപീകരിക്കാനുമുള്ള അവകാശം ബഹുരാഷ്ട്ര കുത്തക കമ്പനികൾക്ക് അടിയറവ് വെക്കുന്നതെന്ന് അദ്ദേഹം ഓർമ്മിപ്പിച്ചു. ഇത് വെറുമൊരു സാമ്പത്തിക ധൂർത്തായി മാത്രം കാണാൻ സാധിക്കില്ല. ഭരണകൂടത്തിന്റെ മുൻഗണനകളും നയങ്ങളും തീരുമാനിക്കേണ്ടത് ജനങ്ങൾ വോട്ട് ചെയ്ത് അധികാരത്തിലേറ്റിയ മന്ത്രിസഭയും രാഷ്ട്രീയ നേതൃത്വവുമാണ്; അല്ലാതെ ബഹുരാഷ്ട്ര കൺസൾട്ടൻസികളല്ല. നയങ്ങൾ ചിട്ടപ്പെടുത്താൻ ഭരണഘടനാപരമായ ഉത്തരവാദിത്തമുള്ള സംസ്ഥാന ആസൂത്രണ ബോർഡ് പോലുള്ള ഔദ്യോഗിക സംവിധാനങ്ങളെ നോക്കുകുത്തിയാക്കി ഇതെല്ലാം പുറംകരാർ നൽകുന്നത് തീർത്തും തെറ്റായ പ്രവണതയാണ്.
യുഡിഎഫ് സർക്കാർ അധികാരമേറ്റയുടൻ സംസ്ഥാന ധനവകുപ്പ് പുറത്തിറക്കേണ്ട സാമ്പത്തിക ധവളപത്രം തയ്യാറാക്കുന്നതിന് മറ്റൊരു പ്രത്യേക സമിതിയെ നിയോഗിച്ചപ്പോഴും ഇതേ തന്ത്രമാണ് കണ്ടത്. ഔദ്യോഗിക രഹസ്യരേഖകളും സർക്കാർ ഫയലുകളും സ്വകാര്യ വ്യക്തികളിലേക്ക് കൈമാറുന്നത് ഗുരുതരമായ ഭവിഷ്യത്തുകൾക്ക് കാരണമാകുമെന്ന് ആ സമയത്ത് തന്നെ പ്രതിപക്ഷം വ്യക്തമാക്കിയതാണ്. എന്നാൽ സമാനമായ രീതി തന്നെയാണ് ഇപ്പോഴും പല മേഖലകളിലും ആവർത്തിക്കപ്പെടുന്നത്.
മന്ത്രിമാരുടെ വിദേശ സന്ദർശനങ്ങളും അവർ സഞ്ചരിക്കുന്ന വാഹനങ്ങൾ പോലും അജ്ഞാതരായ പല സ്പോൺസർമാരും ഏറ്റെടുത്ത് നടത്തുന്ന സാഹചര്യമാണുള്ളത്. ലക്ഷക്കണക്കിന് രൂപ ഇതിനായി മുടക്കുന്ന ഇവരുടെ യഥാർത്ഥ താല്പര്യം എന്താണെന്നത് പൊതുസമൂഹം വലിയ സംശയത്തോടെയാണ് നോക്കിക്കാണുന്നത്. സ്വന്തം വകുപ്പുകളെയും സംവിധാനങ്ങളെയും വിശ്വാസത്തിലെടുക്കാതെ എല്ലാ രംഗത്തും ഉപഗ്രഹ സംഘങ്ങളെ നിയമിക്കുന്ന രീതി ഭരണസംവിധാനത്തിന്റെ സുതാര്യതയെ പൂർണ്ണമായും തകർക്കുകയാണ്. ഇത്തരത്തിൽ കോർപ്പറേറ്റ്-സ്വകാര്യ താല്പര്യങ്ങൾക്ക് വഴങ്ങുന്നത് അതീവ അപകടകരവും ഭരണാധികാരികളുടെ ജനങ്ങളോടുള്ള ബാധ്യതയെ ഹനിക്കുന്നതുമാണ്. ഇത്തരം തീരുമാനങ്ങളിൽ നിന്ന് സർക്കാർ എത്രയും പെട്ടെന്ന് പിന്മാറണമെന്നും പ്രതിപക്ഷ നേതാവ് ആവശ്യപ്പെട്ടു.
