തിരുവനന്തപുരം: കേന്ദ്ര ആഭ്യന്തര മന്ത്രി അമിത് ഷായ്ക്കെതിരെ ഒരു പ്രക്ഷോഭം സംഘടിപ്പിച്ചിട്ട് അത് കൃത്യമായി മുന്നോട്ടു നയിക്കാൻപോലും യൂത്ത് കോൺഗ്രസ് സംസ്ഥാന അധ്യക്ഷന് സാധിക്കുന്നില്ലെന്ന് എസ്എഫ്ഐ സംസ്ഥാന സെക്രട്ടറി പി.എസ്. സഞ്ജീവ്. മന്ത്രി ഒ.ജെ. ജനീഷ് സോഷ്യൽ മീഡിയ പോസ്റ്റ് പങ്കുവെച്ച ശേഷം നീക്കം ചെയ്തുകൊണ്ട് 'അമ്പി-റെമോ-അന്യൻ' കളിക്കുകയാണെന്ന് അദ്ദേഹം പരിഹസിച്ചു. ഒരു പോസ്റ്റ് പ്രസിദ്ധീകരിച്ചതിനു ശേഷം മന്ത്രിയത് സ്വയം പിൻവലിക്കുകയാണുണ്ടായത്. യൂത്ത് കോൺഗ്രസ് സംസ്ഥാന പ്രസിഡന്റ് എന്ന നിലയ്ക്കാണ് പോസ്റ്റ് നൽകിയതെന്നും, മന്ത്രിയായതിനാലാണ് അത് പിൻവലിച്ചതെന്നുമാണ് നൽകിയ വിചിത്രമായ വിശദീകരണം. മോദിക്കും അമിത് ഷായ്ക്കുമെതിരെ പോസ്റ്റിടലല്ല ജനീഷിന്റെ പണിയെന്നാണ് പ്രതിപക്ഷ നേതാവ് വി.ഡി. സതീശൻ നിലപാടെടുത്തത്. അദ്ദേഹത്തെ മുഖ്യമന്ത്രി കർശനമായി വിലക്കിയിരിക്കുകയാണ്. കുറിപ്പിട്ടത് യൂത്ത് കോൺഗ്രസ് അധ്യക്ഷന്റെ പേരിലും നീക്കം ചെയ്തത് മന്ത്രിയെന്ന നിലയിലുമാണെന്ന വാദം തീർത്തും വിചിത്രമാണെന്ന് അദ്ദേഹം വിമർശിച്ചു.
മന്ത്രി കെ.എം. ഷാജിയുടെ വിവാദമായ സ്ത്രീവിരുദ്ധ പരാമർശത്തിലും പി.എസ്. സഞ്ജീവ് ശക്തമായി പ്രതികരിച്ചു. മുസ്ലിം ലീഗിലെ ഒരു സാധാരണ മൂന്നാംകിട നേതാവല്ല കെ.എം. ഷാജിയെന്നും, ഉത്തരവാദപ്പെട്ട ഒരു മന്ത്രിപദവിയിലിരിക്കുന്ന ആളാണെന്ന ബോധം വേണമെന്നും അദ്ദേഹം ഓർമ്മിപ്പിച്ചു. പുരുഷമേധാവിത്വ മനോഭാവത്തിന്റെ ബഹിർസ്ഫുരണമാണ് അദ്ദേഹത്തിൽനിന്ന് ഉണ്ടായത്. സ്ത്രീകളോട് കടുത്ത വെറുപ്പും അമർഷവും പുലർത്തുന്ന വ്യക്തിയായ കെ.എം. ഷാജി ഒരു തികഞ്ഞ മിസോഗിനിസ്റ്റ് ആണെന്നും, മന്ത്രി നടത്തിയത് നേരിട്ടുള്ള ഭരണഘടനാ ലംഘനമാണെന്നും സഞ്ജീവ് ആരോപിച്ചു.
tags:
