തിരുവനന്തപുരം: കേരള സംസ്ഥാന ചലച്ചിത്ര വികസന കോർപ്പറേഷന്റെ (കെഎസ്എഫ്ഡിസി) പുതിയ ചെയർമാനായി നടൻ പ്രേംകുമാർ ഔദ്യോഗികമായി ചുമതലയേറ്റു. തനിക്ക് ലഭിച്ച ഈ നിയോഗം ദൈവത്തിന്റെ നീതിയാണെന്ന് അദ്ദേഹം വ്യക്തമാക്കി. സർക്കാർ തന്നെ ഏൽപ്പിച്ചത് വലിയൊരു ദൗത്യമാണെന്നും, ഇതൊരു വെറും പദവിയായി കാണാതെ അതീവ ഗൗരവമുള്ള ഉത്തരവാദിത്തമായാണ് ഏറ്റെടുക്കുന്നതെന്നും അദ്ദേഹം പറഞ്ഞു. അടിയന്തരമായി ശ്രദ്ധ കേന്ദ്രീകരിക്കേണ്ട ഒട്ടേറെ വിഷയങ്ങളുണ്ടെന്നും അവയിലെല്ലാം സജീവമായ ഇടപെടലുകൾ ഉണ്ടാകുമെന്നും അദ്ദേഹം വ്യക്തമാക്കി.
സിനിമ എന്നത് സർഗ്ഗാത്മക സാംസ്കാരിക വ്യവസായമാണെന്ന് വ്യക്തമാക്കിയ പ്രേംകുമാർ, നിർമ്മാണം പൂർത്തിയാകാനുള്ള നിരവധി തിയേറ്ററുകൾ നിലവിലുണ്ടെന്ന് ചൂണ്ടിക്കാട്ടി. പല കേന്ദ്രങ്ങളിലും വിപുലമായ നവീകരണ പ്രവർത്തനങ്ങൾ ആവശ്യമുണ്ട്. ചിത്രാഞ്ജലി സ്റ്റുഡിയോ നേരിടുന്ന പ്രതിസന്ധികൾ അടിയന്തരമായി പരിഹരിക്കും. സിനിമാ തിയേറ്ററുകളിലെ അടിസ്ഥാന സൗകര്യങ്ങൾ മെച്ചപ്പെടുത്തുന്നതിനൊപ്പം പ്രേക്ഷകരെ ചൂഷണം ചെയ്യുന്ന തിയേറ്ററുകൾക്കെതിരെ ശക്തമായ നടപടികൾ സ്വീകരിക്കും. പ്രേക്ഷകരുടെ താല്പര്യങ്ങൾക്കാണ് പ്രഥമ പരിഗണന നൽകുകയെന്നും അദ്ദേഹം ഉറപ്പുനൽകി.
ചലച്ചിത്ര സ്വപ്നങ്ങളുമായി നടക്കുന്ന യുവതലമുറയെ ഒപ്പം നിർത്തുമെന്നും കൂടുതൽ പ്രതിഭാധനരെ കണ്ടെത്തി പ്രോത്സാഹിപ്പിക്കുന്നതിനുള്ള പദ്ധതികൾ ആവിഷ്കരിക്കുമെന്നും അദ്ദേഹം പറഞ്ഞു. മലയാള സിനിമ അന്താരാഷ്ട്ര സിനിമകളോട് മത്സരിക്കേണ്ടത് സാമ്പത്തിക മേധാവിത്വം കൊണ്ടല്ല; മറിച്ച് കാലത്തിനൊത്ത സാങ്കേതിക മുന്നേറ്റങ്ങൾ സ്വാംശീകരിച്ചുകൊണ്ടുള്ള നിർമ്മാണ-പ്രദർശന രീതികളിലൂടെയാണ്. എല്ലാ സാംസ്കാരിക സ്ഥാപനങ്ങളെയും ഒന്നിച്ച് ചേർത്തുനിർത്തും. കേവലം കല എന്ന കാഴ്ചപ്പാടിൽ മാത്രം ഒതുങ്ങാതെ, വ്യവസായം എന്ന തലത്തിൽക്കൂടി സിനിമയെ സംരക്ഷിക്കാനുള്ള ശ്രമങ്ങൾ ഉറപ്പാക്കും.
കഴിഞ്ഞകാലത്തുണ്ടായ സംഭവങ്ങളിൽ ആരോടും വ്യക്തിപരമായ പരാതിയോ പരിഭവമോ ഇല്ലെന്നും അദ്ദേഹം തുറന്നുപറഞ്ഞു. എന്നാൽ പദവിയിൽ നിന്ന് ഒഴിവാക്കിയപ്പോൾ പാലിക്കേണ്ട മിനിമം മര്യാദ കാണിച്ചില്ല എന്നത് മനസ്സിനേറ്റ വലിയ മുറിവായിരുന്നു. നിലവിൽ സർക്കാരിന്റെ ഭാഗത്തുനിന്ന് പൂർണ്ണ പിന്തുണ ലഭിക്കുന്നുണ്ടെന്നും എല്ലാ കാര്യങ്ങളും ഭംഗിയായി മുന്നോട്ടു കൊണ്ടുപോകാൻ സാധിക്കുമെന്നാണ് പ്രതീക്ഷയെന്നും അദ്ദേഹം കൂട്ടിച്ചേർത്തു.
അതേസമയം, കേരള സംസ്ഥാന ചലച്ചിത്ര അക്കാദമിയുടെ വൈസ് ചെയർപേഴ്സണായി നടി പ്രിയങ്കാ നായരും ചുമതലയേറ്റു. സിനിമാ മേഖലയെ കൂടുതൽ മികച്ച രീതിയിൽ മുന്നോട്ടു നയിക്കാനുള്ള പദ്ധതികൾ നടപ്പാക്കുമെന്നും സിനിമയിലെ വനിതാ കൂട്ടായ്മകളെയും പ്രവർത്തകരെയും ചേർത്തുപിടിക്കുമെന്നും പ്രിയങ്കാ നായർ വ്യക്തമാക്കി.
