പത്തനംതിട്ട: ശബരിമലയിലെ ടെൻഡർ നടപടിക്രമങ്ങളുമായി ബന്ധപ്പെട്ട വിവരങ്ങൾ ചോർന്ന സംഭവത്തിൽ പ്രതികരണവുമായി തിരുവിതാംകൂർ ദേവസ്വം ബോർഡ് പ്രസിഡന്റ് കെ. ജയകുമാർ രംഗത്ത്. ഏറെക്കാലമായി നിലനിന്നിരുന്ന ചില രീതികളാണ് ഇത്തരമൊരു സാഹചര്യത്തിന് ഇടയാക്കിയതെന്ന് അദ്ദേഹം വ്യക്തമാക്കി.വ്യക്തമാക്കി. ഇത്തരം ശീലങ്ങളിൽ ക്രമേണ മാറ്റങ്ങൾ വരുത്തിക്കൊണ്ടിരിക്കുകയാണെന്നും അദ്ദേഹം പറഞ്ഞു.
ടെൻഡർ വിവരങ്ങൾ ചോരുന്നതുപോലെയുള്ള പിഴവുകൾ ഭാവിയിൽ ആവർത്തിക്കില്ലെന്ന് കെ. ജയകുമാർ ഉറപ്പുനൽകി. ചില മോശം പ്രവണതകളാണ് ഇത്തരം കാര്യങ്ങൾക്ക് പിന്നിലുള്ളത്. ഇത് ഏതെങ്കിലും വ്യക്തിയുടെ മാത്രം പിഴവല്ല, അങ്ങനെ സംഭവിച്ചുപോയതാണ്. ലേലത്തിൽ കുത്തക അവകാശം നേടുന്നവരോട് വ്യക്തിപരമായ യാതൊരു എതിർപ്പുമില്ല. ലക്ഷങ്ങളും കോടികളും മുടക്കിയാണ് അവർ ഈ കരാറുകൾ എടുക്കുന്നത്. എന്നാൽ പൂർണ്ണമായും സുതാര്യമായ രീതിയിലൂടെ പ്രക്രിയകളിൽ പങ്കെടുക്കണമെന്നും എല്ലാ വ്യവസ്ഥകളും കൃത്യമായി പാലിച്ച് ബിസിനസ് നടത്തണമെന്നും മാത്രമാണ് ബോർഡിന്റെ കർശന നിലപാടെന്ന് അദ്ദേഹം വ്യക്തമാക്കി. അല്ലാതെ ഇവിടെ തങ്ങിനിന്ന് ഉപജാപക സംഘങ്ങൾക്ക് രൂപം നൽകാനോ ബോർഡിന്റെ പ്രവർത്തനങ്ങളിൽ മൂക്കുകയറിടാനോ ആരും ശ്രമിക്കേണ്ടതില്ലെന്നും അദ്ദേഹം കൂട്ടിച്ചേർത്തു.
ശബരിമലയിലെ കുത്തക വ്യാപാര സ്ഥാപനങ്ങളുടെ ടെൻഡർ നടപടികൾ അട്ടിമറിച്ചതിൽ ദേവസ്വം ബോർഡിലെ ജീവനക്കാർക്ക് ബന്ധമുണ്ടെന്ന സംശയം നേരത്തെ ഉയർന്നിരുന്നു. ടെൻഡറിന്റെ രഹസ്യസ്വഭാവം തകരുകയും ലേലത്തിൽ പങ്കാളികളായവരുടെ വിവരങ്ങൾ പുറത്താകുകയും ചെയ്തെന്നാണ് ഉയർന്ന പ്രധാന ആരോപണം. ഈ വിഷയത്തിൽ ദേവസ്വം വിജിലൻസ് വിശദമായ അന്വേഷണം നടത്തിവരികയാണ്. അതേസമയം, സത്യപ്രതിജ്ഞാ ലംഘനം സംബന്ധിച്ച വിവാദത്തിൽ ദേവസ്വം ബോർഡ് അംഗം കെ. രാജുവിന് പ്രസിഡന്റ് കെ. ജയകുമാർ പൂർണ്ണ പിന്തുണ നൽകി. ചട്ടങ്ങൾ ലംഘിക്കുന്ന വ്യക്തിയല്ല രാജുവെന്നും, ഈ വിഷയം തന്റെ ശ്രദ്ധയിൽപ്പെട്ടിട്ടില്ലാത്തതിനാൽ കൂടുതൽ പ്രതികരിക്കാനില്ലെന്നും അദ്ദേഹം വ്യക്തമാക്കി.
