കൊച്ചി: നടി അൻസിബ ഹസന്റെ പരാതിയിന്മേൽ രജിസ്റ്റർ ചെയ്ത എഫ്ഐആർ റദ്ദാക്കണമെന്ന് ആവശ്യപ്പെട്ട് നടി ലക്ഷ്മിപ്രിയ നൽകിയ ഹർജിയിൽ സംസ്ഥാന സർക്കാരിന് ഹൈക്കോടതി നോട്ടീസ് അയച്ചു. സാധാരണക്കാരുടെ എണ്ണമറ്റ പ്രശ്നങ്ങൾ കെട്ടിക്കിടക്കുമ്പോൾ ഇത്തരം ആളുകളുടെ തർക്കങ്ങൾ പരിഹരിക്കാനേ സമയമുള്ളൂ എന്ന് കോടതി നിരീക്ഷിച്ചു. 'അമ്മ' സംഘടനയിലെ വിഷയങ്ങൾ കൈകാര്യം ചെയ്യാൻ മാത്രമായി പ്രത്യേക കോടതി ആരംഭിക്കേണ്ടി വരുമോ എന്നും ഹൈക്കോടതി വാക്കാൽ ചോദിച്ചു.
അതിനിടെ, അൻസിബ ഹസൻ നൽകിയ പരാതിയുടെ അടിസ്ഥാനത്തിൽ ലക്ഷ്മിപ്രിയക്കെതിരെ സ്ത്രീത്വത്തെ അപമാനിച്ചതിനുള്ള ഭാരതീയ ന്യായ സംഹിത (ബിഎൻഎസ്) 74-ാം വകുപ്പ് ചുമത്തിയിട്ടുണ്ടെന്ന് പാലാരിവട്ടം പോലീസ് വ്യക്തമാക്കി. എഫ്ഐആർ തയ്യാറാക്കിയപ്പോൾ ടൈപ്പിങ് പിഴവ് സംഭവിച്ചതുകൊണ്ടാണ് ഇത് രേഖകളിൽ വിട്ടുപോയതെന്നാണ് പോലീസിന്റെ വിശദീകരണം. ലക്ഷ്മിപ്രിയക്കെതിരെ സ്ത്രീത്വത്തെ അപമാനിച്ച വകുപ്പ് ഉൾപ്പെടുത്തിയില്ലെന്ന് ചൂണ്ടിക്കാട്ടി അൻസിബ കോടതിയെ സമീപിക്കാൻ ഒരുങ്ങുന്നതിനിടെയാണ് പോലീസിന്റെ ഈ ന്യായീകരണം പുറത്തുവന്നത്.
പാലാരിവട്ടം എസ്എച്ച്ഒയ്ക്ക് എതിരെ ജുഡീഷ്യൽ മജിസ്ട്രേറ്റ് കോടതിയിൽ കോടതിയലക്ഷ്യ ഹർജി നൽകാനും, കേസിന്റെ അന്വേഷണച്ചുമതല മറ്റേതെങ്കിലും എസ്എച്ച്ഒയ്ക്ക് കൈമാറണമെന്ന് ആവശ്യപ്പെടാനുമായിരുന്നു അൻസിബയുടെ നീക്കം. സോഷ്യൽ മീഡിയ പ്ലാറ്റ്ഫോമുകൾ വഴി തന്നെ അപകീർത്തിപ്പെടുത്തിയെന്ന അൻസിബയുടെ പരാതിയിൽ കോടതിയുടെ വ്യക്തമായ നിർദ്ദേശപ്രകാരമാണ് ലക്ഷ്മിപ്രിയക്കെതിരെ പോലീസ് കേസെടുത്തത്. എന്നാൽ, തുടക്കത്തിൽ മാനനഷ്ടം ചുമത്തുന്ന വകുപ്പുകൾ മാത്രം ഉൾപ്പെടുത്തി കേസ് രജിസ്റ്റർ ചെയ്തത് കടുത്ത വിമർശനങ്ങൾക്ക് വഴിവെച്ചിരുന്നു.
