കൊച്ചി: അനധികൃത സ്വത്ത് സമ്പാദനവുമായി ബന്ധപ്പെട്ട് ജിഎസ്ടി ജോയിന്റ് കമ്മീഷണർ പ്രജനി രാജന്റെ വസതിയിൽ നടത്തിയ പരിശോധനയിൽ കണ്ടെടുത്ത സാധനങ്ങളുടെ വിവരങ്ങൾ അടങ്ങിയ റിപ്പോർട്ട് വിജിലൻസ് ഇന്ന് മൂവാറ്റുപുഴ കോടതിക്ക് കൈമാറും. റെയ്ഡിൽ കണ്ടെത്തിയ യുഎസ് ഡോളർ വിദേശയാത്ര ആവശ്യങ്ങൾക്കായി മാറ്റിവെച്ചതാണെന്നാണ് പ്രജനി രാജൻ നൽകിയിട്ടുള്ള മൊഴി. പരിശോധനയിൽ 14 ലക്ഷം രൂപയും 788 യുഎസ് ഡോളറും നാല് പവൻ സ്വർണ്ണ നാണയങ്ങളുമാണ് ഉദ്യോഗസ്ഥർ പിടിച്ചെടുത്തത്. വിഷയത്തിൽ കൂടുതൽ വിപുലമായ അന്വേഷണത്തിലേക്ക് കടക്കാനാണ് വിജിലൻസിന്റെ തീരുമാനം.
കൈവശമുണ്ടായിരുന്ന 14 ലക്ഷം രൂപ ലോഡ്ജ് വാടകയിനത്തിൽ ലഭിച്ചതാണെന്നും പ്രജനി മൊഴി നൽകിയിട്ടുണ്ട്. എട്ട് മാസം മുൻപാണ് പ്രജനിക്കെതിരായ പ്രാഥമിക അന്വേഷണം വിജിലൻസ് ആരംഭിച്ചത്. വിഷയത്തിൽ തുടർനടപടികൾക്കായി ആദായനികുതി വകുപ്പിന് (ഇൻകം ടാക്സ്) വിജിലൻസ് കത്ത് നൽകും. തേവരയിലെ ജിഎസ്ടി ജോയിന്റ് കമ്മീഷണറുടെ ഓഫീസ്, പച്ചാളത്തുള്ള പ്രജനിയുടെ വസതികൾ എന്നിവിടങ്ങളിലാണ് ഉദ്യോഗസ്ഥർ പരിശോധന നടത്തിയത്. ശനിയാഴ്ച രാവിലെ ആരംഭിച്ച റെയ്ഡ് രാത്രി ഒൻപത് മണിയോടെയാണ് അവസാനിച്ചത്.
ഏകദേശം രണ്ടേമുക്കാൽ കോടി രൂപയുടെ അനധികൃത സ്വത്ത് ഇവർ സമ്പാദിച്ചുവെന്ന പ്രാഥമികാന്വേഷണ കണ്ടെത്തലുകളുടെ പശ്ചാത്തലത്തിലായിരുന്നു വിജിലൻസ് റെയ്ഡ്. കീഴുദ്യോഗസ്ഥർ പിടികൂടുന്ന നികുതി വെട്ടിപ്പ് കേസുകളിൽ വിശദമായ റിപ്പോർട്ട് സമർപ്പിക്കേണ്ടതും അന്വേഷണത്തിന് നിർദ്ദേശം നൽകേണ്ടതും ജോയിന്റ് കമ്മീഷണറുടെ ചുമതലയാണ്. എന്നാൽ, നികുതി വെട്ടിക്കുന്നവരുമായി നേരിട്ട് ധാരണയുണ്ടാക്കി പണം കൈപ്പറ്റി കേസുകൾ ഒത്തുതീർപ്പാക്കുന്നുവെന്ന പരാതിയാണ് ഇവർക്കെതിരെ വിജിലൻസിന് ലഭിച്ചത്. തുടർന്ന് കേസ് രജിസ്റ്റർ ചെയ്ത് നടത്തിയ പരിശോധനയിലാണ് വസതിയിൽ നിന്ന് പണവും വിദേശ കറൻസിയും പിടിച്ചെടുത്തത്.
