തിരുവനന്തപുരം: സി.എം.ആർ.എൽ എം.ഡി ശശിധരൻ കർത്തയുടെ ഡയറിയിലെ പേരുകൾ വെളിപ്പെടുത്തിയ വിഷയത്തിൽ ഷോൺ ജോർജിനെതിരെ പരാതി നൽകിയിട്ടില്ലെന്നും ഇനി പരാതിപ്പെടാൻ ഉദ്ദേശിക്കുന്നില്ലെന്നും ബി.ജെ.പി നേതാവും എം.എൽ.എയുമായ വി. മുരളീധരൻ വ്യക്തമാക്കി. ഷോൺ തങ്ങളുടെ സഹപ്രവർത്തകനാണെന്നും അദ്ദേഹം പ്രതികരിച്ചു.

1998 മുതലുള്ള തന്റെ സ്വത്തുവിവരങ്ങൾ പൊതുമണ്ഡലത്തിൽ ലഭ്യമാണ്. പാർട്ടി സംസ്ഥാന അധ്യക്ഷനായിരുന്ന ഘട്ടത്തിൽ ഫണ്ട് സമാഹരിച്ചിട്ടുണ്ട്. പാർട്ടി പ്രവർത്തനങ്ങൾക്കായി ഫണ്ട് ശേഖരിക്കുന്നതിൽ ആരെയും തെറ്റുപറയാനാവില്ല. പണം വാങ്ങി വ്യക്തിപരമായി സ്വത്തുക്കൾ വാരിക്കൂട്ടിയിട്ടില്ല, മക്കളെ വിദേശത്ത് പഠിക്കാൻ അയച്ചിട്ടുമില്ല. സംസ്ഥാന പ്രസിഡന്റിന്റെ ഒപ്പോടുകൂടിയ രസീതുകളിലൂടെയാണ് പാർട്ടിക്ക് വേണ്ടി ഫണ്ട് പിരിക്കാറുള്ളത്. ഈ കാര്യങ്ങളെ എക്സാലോജിക് ഇടപാടുമായി ബന്ധപ്പെടുത്തി ആശയക്കുഴപ്പം ഉണ്ടാക്കരുതെന്നും വി. മുരളീധരൻ കൂട്ടിച്ചേർത്തു. അതേസമയം, പേരുകൾ പരസ്യപ്പെടുത്തിയ ഷോൺ ജോർജിന്റെ നീക്കത്തിൽ വി. മുരളീധരനെ സംശയത്തിന്റെ നിഴലിൽ നിർത്തിയെന്നും, വിഷയം പിണറായി വിജയനിൽ നിന്ന് വഴിതിരിച്ചുവിട്ടുവെന്നും ബി.ജെ.പിക്കുള്ളിൽ കടുത്ത അതൃപ്തിയുണ്ടെന്ന തരത്തിൽ വാർത്തകൾ പ്രചരിച്ചിരുന്നു.

വി. മുരളീധരന് തന്നെ ശാസിക്കാനുള്ള പൂർണ്ണ അധികാരമുണ്ടെന്നായിരുന്നു വിഷയത്തിൽ ഷോൺ ജോർജിന്റെ പ്രതികരണം. വി. മുരളീധരൻ തനിക്കെതിരെ പരാതിപ്പെട്ടിട്ടുണ്ടെന്ന് തെളിയിച്ചാൽ താൻ രാഷ്ട്രീയ-പൊതുജീവിതം തന്നെ അവസാനിപ്പിക്കുമെന്ന് ഷോൺ വെല്ലുവിളിച്ചു. ബി.ജെ.പിയിലെ പ്രമുഖ നേതാവായ വി. മുരളീധരന് തനിക്കെതിരെ പരാതി നൽകേണ്ട സാഹചര്യമില്ലെന്നും, തന്നെ ശാസിക്കാനും മിണ്ടാതിരിക്കാൻ ആവശ്യപ്പെടാനും പൂർണ്ണ സ്വാതന്ത്ര്യമുണ്ടെന്നും പാർട്ടിയുടെ എല്ലാ നേതാക്കളും തനിക്കൊപ്പമുണ്ടെന്നും ഷോൺ പറഞ്ഞു.

ഭരണത്തിലിരുന്ന് വാങ്ങിയ തുക കൈക്കൂലി തന്നെയാണെന്ന് ഷോൺ ജോർജ് ആവർത്തിച്ചു. വിഷയത്തിൽ എഫ്.ഐ.ആർ രജിസ്റ്റർ ചെയ്ത് അന്വേഷണം നടത്തണമെന്ന ഉറച്ച നിലപാടിലാണ് ബി.ജെ.പി. അതിനെ സ്വാഗതം ചെയ്തുകൊണ്ടാണ് വി. മുരളീധരൻ വാർത്താസമ്മേളനം വിളിച്ചത്. പുറത്തുവന്ന പട്ടിക കാട്ടിയാണ് പിണറായി വിജയൻ യു.ഡി.എഫിനെയും സതീശനെയും ഭീഷണിപ്പെടുത്തിയത്. ബി.ജെ.പിയുടെ ഈ നിലപാടിൽ ആരും വെള്ളം ചേർക്കേണ്ടതില്ല. ഒരു രാഷ്ട്രീയ പ്രസ്ഥാനമെന്ന നിലയിൽ ഫണ്ട് പിരിവ് നടത്തിയിട്ടുണ്ടാകാം. തനിക്ക് ലഭിച്ച ഒരു പേജ് രേഖയിലെ പട്ടികയിൽ മുരളീധരൻ എന്ന പേരില്ല. രാഷ്ട്രീയ പാർട്ടികൾ പണം സ്വീകരിക്കുന്നതിൽ തെറ്റില്ല, അത് പാർട്ടിയുടെ ഔദ്യോഗിക കണക്കിൽ കാണിച്ചാൽ മതിയാകും. കൊള്ള നടത്തിയത് പിണറായി വിജയനാണ്. ലഭിച്ച രേഖകളുടെ ആധികാരികത ഏറ്റെടുക്കാൻ മുരളീധരന് ബാധ്യതയില്ലെന്നും കേസിൽ കർശനമായി എഫ്.ഐ.ആർ ചുമത്തണമെന്നും, നടപടിയുണ്ടായില്ലെങ്കിൽ താൻ കോടതിയെ സമീപിക്കുമെന്നും ഷോൺ ജോർജ് കൂട്ടിച്ചേർത്തു.