കൊച്ചി: കെഎസ്ഇബിയിൽ 3.14 കോടി രൂപയുടെ വൻ വൈദ്യുതി തട്ടിപ്പ് കണ്ടെത്തി. എറണാകുളം ജില്ലയിലെ കളമശ്ശേരി, മരട് ഇലക്ട്രിക്കൽ സെക്ഷൻ പരിധികളിലാണ് വ്യാപകമായ ക്രമക്കേടുകൾ പുറത്തുവന്നത്. കെഎസ്ഇബിഎൽ ചീഫ് വിജിലൻസ് ഓഫീസറുടെ പ്രത്യേക നിർദ്ദേശപ്രകാരം ആന്റി പവർ തെഫ്റ്റ് സ്ക്വാഡിന്റെ (എപിടിഎസ്) കൊല്ലം യൂണിറ്റ് നടത്തിയ പരിശോധനയിലാണ് തട്ടിപ്പ് വലയിലായത്.
മരട് സെക്ഷൻ പരിധിയിൽ 50 കിലോവാട്ട് കണക്റ്റഡ് ലോഡിന് മാത്രം അനുമതിയുണ്ടായിരുന്ന ഒരു എച്ച്ടി ഉപഭോക്താവ് 260 കിലോവാട്ട് അധിക ലോഡ് അനധികൃതമായി ഘടിപ്പിച്ചാണ് വൈദ്യുതി ഉപയോഗിച്ചിരുന്നത്. ഇതിനുപുറമെ, ഈ ഒരൊറ്റ കണക്ഷനിൽ നിന്ന് കെഎസ്ഇബിയുടെ മീറ്ററിലൂടെയല്ലാതെ യാതൊരു അനുമതിയുമില്ലാതെ 145 കടമുറികളിലേക്ക് വൈദ്യുതി എത്തിച്ചാണ് വൻ തോതിൽ ദുരുപയോഗം നടത്തിയത്.
കളമശ്ശേരി സെക്ഷനിലും സമാനമായ രീതിയിൽ വലിയ വെട്ടിപ്പ് കണ്ടെത്തി. ഇവിടെ വ്യാവസായിക ആവശ്യങ്ങൾക്കായി 450 കിലോവാട്ട് കണക്റ്റഡ് ലോഡിന് അനുമതിയുള്ള കണക്ഷനിൽ 850 കിലോവാട്ടിന്റെ അധിക ലോഡ് അനധികൃതമായി സ്ഥാപിച്ചാണ് പ്രവർത്തിച്ചിരുന്നത്. കൂടാതെ, കെഎസ്ഇബിയുടെ അനുമതിയില്ലാതെ ചട്ടവിരുദ്ധമായി ബിഎസ്എൻഎൽ, എയർടെൽ എന്നീ ടെലികോം കമ്പനികളുടെ മൊബൈൽ ടവറുകളിലേക്ക് ഈ സ്ഥാപനത്തിൽ നിന്നും വൈദ്യുതി നൽകിയതായും റെയ്ഡിൽ വ്യക്തമായി.
പ്രത്യേക പരിശോധനാ ഡ്രൈവിന്റെ ഭാഗമായി കൊല്ലം എപിടിഎസ് യൂണിറ്റ് നടത്തിയ മിന്നൽ പരിശോധനകളിലൂടെ ആകെ 3.14 കോടി രൂപയുടെ വൈദ്യുതി ക്രമക്കേടാണ് ഇതോടെ വെളിച്ചത്തുകൊണ്ടുവന്നത്. വരും ദിവസങ്ങളിലും സംസ്ഥാനവ്യാപകമായി ഇത്തരം കർശന പരിശോധനകൾ ഊർജ്ജിതമായി തുടരുമെന്ന് ചീഫ് വിജിലൻസ് ഓഫീസർ അറിയിച്ചു.
