തിരുവനന്തപുരം: ട്രാഫിക് നിയമലംഘനങ്ങൾക്കുള്ള ഇ-ചെല്ലാനുകളിൽ നിന്ന് ക്യാമറ ചിത്രങ്ങൾ ഒഴിവാക്കാൻ തീരുമാനിച്ചുവെന്ന തരത്തിലുള്ള വാർത്തകൾ അടിസ്ഥാനരഹിതമാണെന്ന് വ്യക്തമാക്കി മോട്ടോർ വാഹന വകുപ്പ് (MVD). അത്തരത്തിലൊരു നിർദ്ദേശമോ ഔദ്യോഗിക ഉത്തരവോ തങ്ങൾ പുറപ്പെടുവിച്ചിട്ടില്ലെന്ന് എം.വി.ഡി അറിയിച്ചു. തങ്ങളുടെ ഔദ്യോഗിക ഫേസ്ബുക്ക് പേജിലൂടെയാണ് അധികൃതർ ഇക്കാര്യത്തിൽ വ്യക്തത വരുത്തിയത്.
മോട്ടോർ വാഹന വകുപ്പിന്റെ ഇ-ചെല്ലാനുകളിൽ ഇനിമുതൽ നിയമലംഘന ദൃശ്യങ്ങളോ ചിത്രങ്ങളോ ഉണ്ടാകില്ലെന്ന രീതിയിൽ സോഷ്യൽ മീഡിയയിലും മറ്റ് മാധ്യമങ്ങളിലും വാർത്തകൾ പ്രചരിക്കുന്നതായി ശ്രദ്ധയിൽപ്പെട്ടിട്ടുണ്ടെന്നും, എന്നാൽ ഇങ്ങനെയൊരു നടപടിയും നിലവിൽ വകുപ്പ് സ്വീകരിച്ചിട്ടില്ലെന്നും ഫേസ്ബുക്ക് കുറിപ്പിലൂടെ അവർ വിശദീകരിച്ചു.
റോഡുകളിലെ ഗതാഗത നിയമലംഘനങ്ങൾ എ.ഐ ക്യാമറകളിലടക്കം കുടുങ്ങിയാൽ വാഹന ഉടമകൾക്ക് പിഴ നോട്ടീസ് അയക്കുന്നതാണ് നിലവിലെ രീതി. ഈ പിഴ നോട്ടീസുകളിൽ നിയമലംഘനം വ്യക്തമാക്കുന്ന ചിത്രങ്ങളും ഉൾപ്പെടുത്താറുണ്ട്. എന്നാൽ ഈ ചിത്രങ്ങൾ കുടുംബപ്രശ്നങ്ങൾക്കും തർക്കങ്ങൾക്കും കാരണമാകുന്നുവെന്ന വിലയിരുത്തലിൽ, വ്യക്തികളുടെ സ്വകാര്യത സംരക്ഷിക്കുന്നതിനായി ചിത്രങ്ങൾ ഒഴിവാക്കിക്കൊണ്ട് ഇ-ചെല്ലാൻ പോർട്ടലിൽ മാറ്റങ്ങൾ വരുത്തുന്നുവെന്നായിരുന്നു നേരത്തെ പ്രചരിച്ച വാർത്തകൾ. ഇത്തരം പ്രചാരണങ്ങൾ വ്യാജമാണെന്ന് ചൂണ്ടിക്കാട്ടിയാണ് മോട്ടോർ വാഹന വകുപ്പ് ഇപ്പോൾ രംഗത്തെത്തിയിരിക്കുന്നത്.
