തിരുവനന്തപുരം: കേരളത്തിലെ തീരദേശ ജില്ലകളിൽ കള്ളക്കടൽ പ്രതിഭാസത്തിന് സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്. ഇതേത്തുടർന്ന് സംസ്ഥാനത്തെ തീരമേഖലകളിൽ റെഡ് അലർട്ട് പുറപ്പെടുവിച്ചു. തീരങ്ങളിൽ അതിശക്തമായ തിരമാലകൾ ആഞ്ഞടിക്കാനും കടൽക്ഷോഭം രൂക്ഷമാകാനും സാധ്യതയുണ്ടെന്നാണ് കാലാവസ്ഥാ നിരീക്ഷണം. ഈ മാസം 28 വരെ കർശനമായ ജാഗ്രത പുലർത്തണമെന്ന് അധികൃതർ നിർദ്ദേശിച്ചിട്ടുണ്ട്.
കടലാക്രമണ ഭീഷണിയുള്ള അപകടകരമായ മേഖലകളിൽ താമസിക്കുന്നവർ സുരക്ഷിത സ്ഥാനങ്ങളിലേക്ക് മാറിത്താമസിക്കണം. ചെറുവള്ളങ്ങളും ബോട്ടുകളും ഉൾപ്പെടെയുള്ളവ ഈ ദിവസങ്ങളിൽ കടലിലിറക്കരുതെന്നും ആളുകൾ കടലിൽ ഇറങ്ങുന്നത് പൂർണ്ണമായി ഒഴിവാക്കണമെന്നും മുന്നറിയിപ്പുണ്ട്. തീരപ്രദേശങ്ങളിലെ കടൽ വിനോദങ്ങൾക്ക് കർശന വിലക്ക് ഏർപ്പെടുത്തിയിട്ടുണ്ട്. മത്സ്യബന്ധനത്തിൽ ഏർപ്പെടുന്ന ബോട്ടുകളും യാനങ്ങളും പരസ്പരം കൂട്ടിയിടിക്കാത്ത വിധം സുരക്ഷിതമായി കെട്ടിയിട്ട് സംരക്ഷിക്കണമെന്നും നിർദ്ദേശത്തിൽ വ്യക്തമാക്കുന്നു.
