കൊച്ചി: നടി അൻസിബ ഹസനെ സോഷ്യൽ മീഡിയയിലൂടെ അധിക്ഷേപിച്ചെന്ന പരാതിയിൽ നടി ലക്ഷ്മി പ്രിയയ്ക്കെതിരെ കേസെടുക്കാൻ പോലീസിന് കോടതിയുടെ കർശന നിർദ്ദേശം. പാലാരിവട്ടം പോലീസിനാണ് എറണാകുളം മജിസ്ട്രേറ്റ് കോടതി ഇതുസംബന്ധിച്ച ഉത്തരവ് നൽകിയത്. അൻസിബ ഹസൻ സമർപ്പിച്ച സ്വകാര്യ അന്യായത്തിലാണ് കോടതി ഈ സുപ്രധാന നടപടി സ്വീകരിച്ചത്. ഹൈക്കോടതി പുറപ്പെടുവിച്ച നിർദ്ദേശത്തിന്റെ അടിസ്ഥാനത്തിലാണ് മജിസ്ട്രേറ്റ് കോടതി ഇപ്പോൾ ഉത്തരവിട്ടിരിക്കുന്നത്.
അശ്ലീല പദപ്രയോഗങ്ങൾ ഉൾപ്പെടുത്തി ലക്ഷ്മി പ്രിയ തന്നെ വ്യക്തിപരമായി കടന്നാക്രമിച്ചുവെന്നും സ്ത്രീത്വത്തെ അവഹേളിക്കുന്ന രീതിയിൽ സംസാരിച്ചുവെന്നും ആരോപിച്ചായിരുന്നു അൻസിബ പോലീസിൽ പരാതി നൽകിയത്. എന്നാൽ പോലീസ് എഫ്.ഐ.ആർ ഇടാൻ തയ്യാറാകാതിരുന്നതോടെ താരം മജിസ്ട്രേറ്റ് കോടതിയെ സമീപിക്കുകയായിരുന്നു. പ്രാഥമിക ഘട്ടത്തിൽ അൻസിബയുടെ ഈ ഹർജി മജിസ്ട്രേറ്റ് കോടതി തള്ളുകയാണുണ്ടായത്. തുടർന്നാണ് അൻസിബ നീതി തേടി ഹൈക്കോടതിയിലെത്തിയത്. പരാതി പുനഃപരിശോധിച്ച് ഉചിതമായ തീരുമാനമെടുക്കാൻ ഹൈക്കോടതി കീഴ്ക്കോടതിയോട് നിർദ്ദേശിച്ചു.
പലതവണ പോലീസ് സ്റ്റേഷൻ കയറിയിറങ്ങിയിട്ടും അധികൃതർ നടപടിയെടുത്തില്ലെന്ന് ചൂണ്ടിക്കാട്ടിയായിരുന്നു നടിയുടെ കോടതി ഇടപെടൽ. എന്നാൽ കേസെടുക്കാനുള്ള വകുപ്പുകൾ പരാതിയിൽ ഇല്ലെന്നും പ്രഥമവിവര റിപ്പോർട്ട് തയ്യാറാക്കേണ്ടതില്ലെന്നും വിലയിരുത്തിയാണ് നേരത്തെ കീഴ്ക്കോടതി ഹർജി നിരസിച്ചത്. എന്നാൽ ഈ നിലപാട് തിരുത്തിക്കൊണ്ട്, അൻസിബ ഉന്നയിച്ച പരാതി അതീവ ഗൗരവമുള്ളതാണെന്നും എഫ്.ഐ.ആർ രജിസ്റ്റർ ചെയ്ത് വിശദമായ അന്വേഷണം നടത്തേണ്ട സാഹചര്യമുണ്ടെന്നും ഹൈക്കോടതി വിലയിരുത്തി.
താരസംഘടനയായ 'അമ്മ'യുമായി ബന്ധപ്പെട്ട് രൂപപ്പെട്ട തർക്കങ്ങൾക്ക് പിന്നാലെയായിരുന്നു ഇരുവർക്കുമിടയിലെ ഭിന്നത പരസ്യമാകുന്നത്. ഇതിന് തൊട്ടുപിന്നാലെ ഒരു യൂട്യൂബ് ചാനലിന് ലക്ഷ്മി പ്രിയ നൽകിയ അഭിമുഖമാണ് നിലവിലെ കേസിന് കാരണമായി മാറിയത്. മുൻപ് ലക്ഷ്മി പ്രിയ അൻസിബയ്ക്കെതിരെ തൃപ്പൂണിത്തുറ പോലീസിൽ പരാതി നൽകിയിരുന്നു. ഇതിന്റെ പേരിൽ തന്നെ സ്റ്റേഷനിലേക്ക് വിളിപ്പിച്ചു വരുത്തി മൂന്ന് മണിക്കൂറോളം മാനസികമായി വേട്ടയാടിയെന്ന് അൻസിബയും ആരോപിച്ചിരുന്നു. അൻസിബ അയച്ച ഒരു വാട്സ്ആപ്പ് സന്ദേശം തന്റെ കുടുംബസമാധാനം തകർത്തുവെന്നായിരുന്നു അന്ന് ലക്ഷ്മി പ്രിയ ഉയർത്തിയ പ്രധാന ആക്ഷേപം.
