തിരുവനന്തപുരം: മുഖ്യമന്ത്രി വി.ഡി. സതീശൻ നടത്തിയ വിവാദ ചാർട്ടേഡ് വിമാനയാത്രയിൽ സമഗ്രാന്വേഷണം ആവശ്യപ്പെട്ട് ലോകായുക്തയിൽ പരാതി. അഡ്വ. കെ.എം. ഷാജഹാനാണ് മുഖ്യമന്ത്രിക്കെതിരെ ലോകായുക്തയെ സമീപിച്ചിരിക്കുന്നത്. വി.ഡി. സതീശന് മുഖ്യമന്ത്രി പദവിയിൽ തുടരാൻ യാതൊരു അർഹതയുമില്ലെന്ന് ചൂണ്ടിക്കാട്ടിയ പരാതിക്കാരൻ, അദ്ദേഹത്തിനെതിരെ അഴിമതി നിരോധന നിയമപ്രകാരം അന്വേഷണം നടത്തണമെന്നും ആവശ്യപ്പെട്ടു.

ഹെലികോപ്റ്റർ വാടകക്കരാർ നീട്ടിനൽകുന്നതുമായി ബന്ധപ്പെട്ട ശുപാർശ സംസ്ഥാന സർക്കാരിന്റെ പരിഗണനയിലിരിക്കെയാണ് ഈ വിമാനയാത്ര നടന്നതെന്ന് പരാതിയിൽ ആരോപിക്കുന്നു. വിമാനയാത്രാ ചെലവും സർക്കാരിന്റെ ഈ തീരുമാനവും തമ്മിൽ എന്തെങ്കിലും തരത്തിലുള്ള ഒത്തുകളിയുണ്ടോ എന്ന് പരിശോധിക്കണം. യാത്രാച്ചെലവുകൾ വഹിച്ചത് ചിപ്‌സൺ ആണെന്ന വിവരം മുഖ്യമന്ത്രിക്കോ അദ്ദേഹത്തിന്റെ ഓഫീസിനോ നേരത്തെ അറിയാമായിരുന്നോ എന്നും അന്വേഷണപരിധിയിൽ കൊണ്ടുവരണം. സർക്കാരിന്റെ ഔദ്യോഗിക ഫയലുകൾ, ഇൻവോയ്സുകൾ, സാമ്പത്തിക ഇടപാടുകളുടെ രേഖകൾ എന്നിവ വിളിച്ചുവരുത്തണമെന്നും കെ.എം. ഷാജഹാൻ ആവശ്യപ്പെട്ടു. ഒപ്പം, മുഖ്യമന്ത്രി പദവിയിൽ തുടരാൻ സതീശൻ അർഹനല്ലെന്ന് പ്രഖ്യാപിച്ച് ഗവർണർക്ക് ലോകായുക്ത റിപ്പോർട്ട് സമർപ്പിക്കണമെന്നും അദ്ദേഹം ആവശ്യപ്പെടുന്നു.

കഴിഞ്ഞ സെപ്റ്റംബർ 21-നായിരുന്നു വി.ഡി. സതീശന്റെ വിവാദത്തിന് തിരികൊളുത്തിയ മലപ്പുറം വിമാനയാത്ര. മലപ്പുറം ജില്ലയിൽ ശക്തമായ മഴയെത്തുടർന്നുണ്ടായ മലവെള്ളപ്പാച്ചിലും അപകടങ്ങളും നേരിട്ട് കണ്ടു വിലയിരുത്താനായിരുന്നു മുഖ്യമന്ത്രിയുടെ സന്ദർശനം. എന്നാൽ ചാർട്ടേഡ് വിമാനയാത്ര ധൂർത്താണെന്ന ആക്ഷേപം ശക്തമായതോടെ മുഖ്യമന്ത്രിയുടെ ഓഫീസ് വിശദീകരണക്കുറിപ്പ് ഇറക്കുകയായിരുന്നു. ഒരു സ്പോൺസറാണ് യാത്രയ്ക്കുള്ള തുക വഹിച്ചതെന്നും ഖജനാവിൽ നിന്ന് ഒരു രൂപ പോലും അധികമായി ചെലവാക്കിയിട്ടില്ലെന്നുമായിരുന്നു വിശദീകരണം. കരിപ്പൂരിലേക്ക് സാധാരണ യാത്രാവിമാനങ്ങൾ ലഭ്യമല്ലാതിരുന്നതിനാലാണ് ചാർട്ടേഡ് വിമാനത്തെ ആശ്രയിച്ചതെന്നും ഓഫീസ് വ്യക്തമാക്കിയിരുന്നു.

എന്നാൽ ഈ വിശദീകരണത്തോടെ യാത്രാച്ചെലവ് വഹിച്ച അജ്ഞാതനായ സ്പോൺസർ ആരാണെന്ന ചോദ്യമുയർത്തി വിഷയം പ്രതിപക്ഷം വലിയ രാഷ്ട്രീയ ആയുധമാക്കി മാറ്റി. മുൻ മന്ത്രി പി. രാജീവ്, എം. വിജിൻ അടക്കമുള്ള പ്രമുഖ നേതാക്കൾ മുഖ്യമന്ത്രിക്കും സർക്കാരിനുമെതിരെ രൂക്ഷവിമർശനവുമായി രംഗത്തെത്തി. ഇതേത്തുടർന്ന് വി.ഡി. സതീശൻ തന്നെ നേരിട്ട് വിശദീകരണം നൽകി. തനിക്ക് വ്യക്തിപരമായി പരിചയമുള്ള ഒരു മലയാളിയാണ് യാത്രാസൗകര്യം ഒരുക്കി നൽകിയതെന്നും ആ വ്യക്തിയുടെ പേര് അനാവശ്യമായി വിവാദങ്ങളിലേക്ക് വലിച്ചിഴയ്ക്കരുതെന്നും മുഖ്യമന്ത്രി പറഞ്ഞു. തുടർന്ന് നിരവധി തവണ മാധ്യമങ്ങൾ ആവർത്തിച്ച് ആരാഞ്ഞിട്ടും സ്പോൺസറുടെ വിവരങ്ങൾ പുറത്തുവിടാൻ മുഖ്യമന്ത്രി തയ്യാറായിരുന്നില്ല.