കൊച്ചി: റിപ്പോർട്ടർ ടി.വി ന്യൂസ് ഡെസ്കിൽ പോലീസ് നടത്തിയ നടപടികളിൽ വിശദീകരണവുമായി ആഭ്യന്തര മന്ത്രി രമേശ് ചെന്നിത്തല. പ്രത്യേക അന്വേഷണ സംഘം (എസ്.ഐ.ടി) യാതൊരുവിധ നിയമവിരുദ്ധ പ്രവർത്തനങ്ങളും നടത്തിയിട്ടില്ലെന്നും പോലീസിന്റെ അന്വേഷണ കാര്യങ്ങളിൽ ആഭ്യന്തര വകുപ്പ് ഇടപെടാറില്ലെന്നും അദ്ദേഹം വ്യക്തമാക്കി. യു.എസ് സന്ദർശനം പൂർത്തിയാക്കി തിരിച്ചെത്തിയ ശേഷം മാധ്യമങ്ങളോട് പ്രതികരിക്കുകയായിരുന്നു അദ്ദേഹം. കഴിഞ്ഞ പത്ത് കൊല്ലത്തിനിടയിൽ മാധ്യമസ്ഥാപനങ്ങൾക്കെതിരെ എത്രയോ നടപടികളുണ്ടായിട്ടുണ്ട്; അപ്പോഴൊന്നും ആരും അടിയന്തരാവസ്ഥ കണ്ടില്ലേയെന്നും ആഭ്യന്തര മന്ത്രി ചോദിച്ചു.
നിയമാനുസൃതമായ അന്വേഷണം അതിന്റെ വഴിക്ക് നടക്കട്ടെ. എന്തെങ്കിലും തരത്തിലുള്ള നിയമലംഘനങ്ങൾ നടന്നിട്ടുണ്ടെങ്കിൽ അതിനെതിരെ നടപടിയെടുക്കും. എസ്.ഐ.ടിയുടെ ഓരോ നീക്കങ്ങളും ആഭ്യന്തര മന്ത്രി മുൻകൂട്ടി അറിയേണ്ടതില്ല. സെർച്ച് വാറന്റ് ഉൾപ്പെടെയുള്ള ആവശ്യമായ എല്ലാ നിയമപരമായ അനുമതികളും കൈപ്പറ്റിയാണ് സംഘം പരിശോധന നടത്തിയത്. അന്വേഷണ സംഘം ഏത് രീതിയിൽ പ്രവർത്തിക്കണമെന്ന് ഭരണകൂടമോ ആഭ്യന്തര വകുപ്പ് മന്ത്രിയോ തിട്ടൂരം നൽകേണ്ടതില്ലെന്നും അന്വേഷണം സ്വതന്ത്രമായി മുന്നോട്ടുപോകുമെന്നും അദ്ദേഹം പറഞ്ഞു.
എസ്.ഐ.ടി തികച്ചും നിയമാനുസൃതമായാണ് നീങ്ങിയതെന്നും റെയ്ഡ് സംബന്ധിച്ച വിവരങ്ങൾ താൻ അറിയേണ്ട ബാധ്യതയില്ലെന്നും ചെന്നിത്തല ആവർത്തിച്ചു. ആഭ്യന്തര മന്ത്രി എന്ന നിലയിൽ അന്വേഷണ വിഷയങ്ങളിൽ കൈകടത്താറില്ല. പരിശോധനയിൽ ചട്ടലംഘനങ്ങൾ സംഭവിച്ചിട്ടുണ്ടെങ്കിൽ കർശന നടപടിയുണ്ടാകും. കൃത്യമായ നടപടിക്രമങ്ങൾ പൂർത്തിയാക്കിയ ശേഷമാണ് പരിശോധനയെന്നാണ് മനസ്സിലാക്കാൻ സാധിക്കുന്നത്. കഴിഞ്ഞ പത്ത് വർഷത്തിനിടെ മാധ്യമങ്ങൾക്കു നേരെ നിരവധി നടപടികൾ വന്നപ്പോൾ അടിയന്തരാവസ്ഥയെക്കുറിച്ച് ആരും സംസാരിച്ചുകണ്ടില്ലെന്നും അദ്ദേഹം വിമർശിച്ചു.
ഇന്നലെ പുലർച്ചെയായിരുന്നു കൊച്ചിയിലെ റിപ്പോർട്ടർ ബ്രോഡ്കാസ്റ്റിംഗ് കമ്പനിയുടെ ആസ്ഥാനത്ത് പരിശോധനയ്ക്കെന്ന പേരിൽ ഒരു സംഘം പോലീസുകാർ എത്തുകയും മാധ്യമപ്രവർത്തകരുടെ മൊബൈൽ ഫോണുകൾ ഉൾപ്പെടെ പിടിച്ചെടുക്കുകയും ചെയ്തത്. ജേണലിസ്റ്റുകളും സാങ്കേതിക പ്രവർത്തകരും മാത്രം പ്രവേശിക്കുന്ന ന്യൂസ് ഡെസ്കിൽ ജോലി തടസ്സപ്പെടുത്തുന്ന വിധത്തിലായിരുന്നു പോലീസിന്റെ കടന്നുകയറ്റം. തൃക്കാക്കര എ.സി.പിയുടെ നേതൃത്വത്തിലായിരുന്നു ഈ നടപടികൾ അരങ്ങേറിയത്.
