തിരുവനന്തപുരം: സംസ്ഥാനത്തെ രൂക്ഷമായ വൈദ്യുതി പ്രതിസന്ധിക്ക് ദീർഘകാല പരിഹാരം കണ്ടെത്തുന്നതിനായി സൗരോർജ്ജ ഉത്പാദനം വ്യാപകമാക്കാൻ സർക്കാർ തലത്തിൽ നിർണ്ണായക നീക്കം. ആഡംബര വസതികളെ വൈദ്യുതി കാര്യത്തിൽ സ്വയംപര്യാപ്തമാക്കാനും വാണിജ്യ സമുച്ചയങ്ങളിൽ സോളാർ സംവിധാനം നിർബന്ധമാക്കാനുമാണ് ആലോചിക്കുന്നത്. ഇതിനുപുറമെ, ഉപഭോക്താക്കൾ സ്വന്തമായി ഉത്പാദിപ്പിക്കുന്ന അധിക വൈദ്യുതി ഉയർന്ന തുക നൽകി വാങ്ങാനും സർക്കാർ ലക്ഷ്യമിടുന്നു.
കഴിഞ്ഞ ഒരു ദശാബ്ദക്കാലത്തെ ഭരണത്തിനിടയിൽ ഏകദേശം 1,000 മെഗാവാട്ടോളമാണ് എൽ.ഡി.എഫ് സർക്കാർ വൈദ്യുതി ഉത്പാദനം വർദ്ധിപ്പിച്ചത്. ചരിത്രത്തിലെ തന്നെ ഏറ്റവും ഉയർന്ന ഈ നേട്ടത്തിന് പ്രധാന വഴിയൊരുക്കിയത് സൗരോർജ്ജ പദ്ധതികൾക്ക് നൽകിയ പ്രോത്സാഹനമായിരുന്നു. സംസ്ഥാനം കടുത്ത പവർ ക്ഷാമം നേരിടുന്ന ഈ സാഹചര്യത്തിലാണ് സമാനമായ ബദൽ മാർഗ്ഗത്തിലേക്ക് യു.ഡി.എഫ് സർക്കാരും ശ്രദ്ധ കേന്ദ്രീകരിക്കുന്നത്. ജലവൈദ്യുത, ഡീസൽ പദ്ധതികൾക്ക് സ്വാഭാവികമായ പരിമിതികളുള്ളതും സൗരോർജ്ജത്തെ കൂടുതൽ ആശ്രയിക്കാൻ ഭരണകൂടത്തെ പ്രേരിപ്പിക്കുന്നുണ്ട്. പുതിയ ചട്ടങ്ങൾ പ്രാബല്യത്തിൽ വരുന്നതോടെ ആഡംബര വസതികൾക്കും വാണിജ്യ സ്ഥാപനങ്ങൾക്കും കെട്ടിട നമ്പർ അനുവദിക്കണമെങ്കിൽ സോളാർ പാനലുകൾക്കൊപ്പം എനർജി സ്റ്റോറേജ് സംവിധാനവും നിർബന്ധമാക്കും.
ബാറ്ററി സ്റ്റോറേജ് സൗകര്യം ഏർപ്പെടുത്തുന്നതിലൂടെ രാത്രി സമയങ്ങളിലും സൗരോർജ്ജം പ്രയോജനപ്പെടുത്താൻ സാധിക്കും. നിർദ്ദിഷ്ട പദ്ധതി നടപ്പിലായാൽ സംസ്ഥാനത്ത് എത്രത്തോളം വൈദ്യുതി ലാഭിക്കാൻ കഴിയുമെന്നതിൽ കെ.എസ്.ഇ.ബി വിശദമായ കണക്കെടുപ്പ് ആരംഭിച്ചിട്ടുണ്ട്. അതോടൊപ്പം, വീടുകളിലും സ്ഥാപനങ്ങളിലും സംഭരിച്ചു വെക്കുന്ന അധിക വൈദ്യുതി രാത്രി സമയങ്ങളിൽ ഉയർന്ന നിരക്കിൽ ബോർഡ് വിലയ്ക്ക് വാങ്ങും. നിലവിൽ വളരെ തുച്ഛമായ തുകയ്ക്കാണ് ഉപഭോക്താക്കളിൽ നിന്നും വൈദ്യുതി തിരികെ എടുക്കുന്നത്. എന്നാൽ പുതിയ മാറ്റം വരുന്നതോടെ വൈദ്യുതി ഉത്പാദിപ്പിക്കുന്ന വീട്ടുടമകൾക്ക് ഇത് മികച്ച സാമ്പത്തിക നേട്ടമായി മാറും. തദ്ദേശ സ്വയംഭരണ വകുപ്പുമായി ഏകോപിപ്പിച്ചാകും പദ്ധതി നടപ്പിലാക്കുക. സോളാർ സ്റ്റോറേജ് നിർബന്ധമാക്കുന്നതിലെ നിയമപരമായ വശങ്ങളും എത്ര ചതുരശ്രയടിക്ക് മുകളിലുള്ള കെട്ടിടങ്ങൾക്കാണ് ഈ നിബന്ധന ബാധകമാക്കേണ്ടതെന്ന കാര്യവും സർക്കാർ തലത്തിൽ പരിശോധിച്ചുവരികയാണ്.
