തിരുവനന്തപുരം: സി.എം.ആർ.എൽ വിവാദവുമായി ബന്ധപ്പെട്ട് എൻഫോഴ്സ്മെന്റ് ഡയറക്ടറേറ്റിന്റെ (ഇ.ഡി) കത്ത് ലഭിച്ച വിവരം സർക്കാരിനെ ഔദ്യോഗികമായി രേഖാമൂലം അറിയിച്ചിട്ടുണ്ടെന്ന് സംസ്ഥാന പോലീസ് മേധാവി റവാഡ ചന്ദ്രശേഖർ വ്യക്തമാക്കി. സർക്കാരിന്റെ ഭാഗത്തുനിന്നുള്ള തുടർനടപടികൾ കാത്തിരിക്കുകയാണ്. ലഭിച്ച കത്തിലെ വിവരങ്ങൾ ഗൗരവമായി പരിശോധിച്ചുവരികയാണെന്നും, നിലവിൽ ഈ വിഷയത്തിൽ മറ്റ് നടപടികളൊന്നും സ്വീകരിച്ചിട്ടില്ലെന്നും അദ്ദേഹം വ്യക്തമാക്കി.
എസ്.എഫ്.ഐ നേതാക്കളെ വിലങ്ങണിയിച്ച വിവാദ സംഭവത്തിലും ഡി.ജി.പി പ്രതികരിച്ചു. പ്രതികൾക്ക് വിലങ്ങ് അണിയിക്കുന്നതുമായി ബന്ധപ്പെട്ട് പോലീസിന് കർശനമായ മാർഗ്ഗനിർദ്ദേശങ്ങളും ചട്ടങ്ങളുമുണ്ട്. ഉദ്യോഗസ്ഥർക്ക് നേരെ ഉണ്ടാകുന്ന കൈയേറ്റങ്ങളും അതിക്രമങ്ങളും ഒരിക്കലും വെച്ചുപൊറുപ്പിക്കില്ലെന്നും, അത്തരക്കാർക്കെതിരെ ശക്തമായ നിയമനടപടികൾ ഉണ്ടാകുമെന്നും അദ്ദേഹം മുന്നറിയിപ്പ് നൽകി.
മുഖ്യമന്ത്രിയുടെ എ.ഐ ദൃശ്യങ്ങൾ നീക്കം ചെയ്ത നടപടിയുമായി ബന്ധപ്പെട്ട് ആകെ ഒൻപത് പരാതികളാണ് ലഭിച്ചത്. ഇതിന്റെ അടിസ്ഥാനത്തിലാണ് പ്രസ്തുത വീഡിയോകൾ ഒഴിവാക്കണമെന്ന് ആവശ്യപ്പെട്ട് മെറ്റയ്ക്ക് ഔദ്യോഗികമായി നിർദ്ദേശം നൽകിയത്. പോലീസ് സ്റ്റേഷനുള്ളിൽ സൂക്ഷിച്ചിരുന്ന തൊണ്ടിമുതലായ പാൻമസാല മോഷണം പോയ സംഭവത്തിൽ കുറ്റക്കാരനായ ഉദ്യോഗസ്ഥന്റെ മേൽ കർശന ശിക്ഷാ നടപടികൾ ഉണ്ടാകുമെന്ന് അദ്ദേഹം ഉറപ്പ് നൽകി. സംഭവത്തിൽ വിശദമായ അന്വേഷണം ഇതിനോടകം ആരംഭിച്ചിട്ടുണ്ട്. പി.എസ്.സി പരീക്ഷാ അഴിമതിയുമായി ബന്ധപ്പെട്ട ചോദ്യം ചെയ്യൽ നടപടികൾ പി.എസ്.സി ആസ്ഥാനത്തേക്ക് വ്യാപിപ്പിക്കണമെന്നാണ് ആവശ്യം ഉയർന്നിട്ടുള്ളത്. ഇതിൽ നിയമപരമായി തടസ്സങ്ങളൊന്നുമില്ലെന്നും, ഭരണഘടനാപരമായ കാര്യങ്ങളാണ് പരിശോധിക്കുന്നതെന്നും അദ്ദേഹം വിശദീകരിച്ചു.
ഇതിനുപുറമെ, സംസ്ഥാന പോലീസ് സൈബർ സെക്യൂരിറ്റി കോൺഫറൻസ് കൊച്ചിയിൽ സംഘടിപ്പിക്കുമെന്ന് ഡി.ജി.പി അറിയിച്ചു. വരുന്ന ഒക്ടോബർ 6 മുതൽ 13 വരെയാണ് സമ്മേളനം നിശ്ചയിച്ചിരിക്കുന്നത്. 'COCON' എന്ന പേരിലാണ് ഈ അന്താരാഷ്ട്ര കോൺഫറൻസ് നടക്കുന്നത്. ഡിജിറ്റൽ സുരക്ഷാ മേഖലയിലെ പുതിയ സാങ്കേതിക വിദ്യകളും സാധ്യതകളുമാണ് പോലീസ് ഇതിലൂടെ വിലയിരുത്തുന്നത്. സൈബർ സുരക്ഷാ രംഗത്തെ പ്രഗത്ഭരായ വിദഗ്ധർ ഈ സമ്മേളനത്തിൽ പങ്കെടുക്കും.
ഡിജിറ്റൽ ഇടങ്ങളിൽ സ്ത്രീകൾക്കും കുട്ടികൾക്കുമെതിരെ വർദ്ധിച്ചുവരുന്ന അതിക്രമങ്ങളും പ്രശ്നങ്ങളും സമ്മേളനത്തിൽ പ്രധാന ചർച്ചയാകും. ഓൺലൈൻ തട്ടിപ്പുകൾ തടയുന്നതിനൊപ്പം സ്ത്രീകൾക്കും കുട്ടികൾക്കുമെതിരെയുള്ള ലൈംഗിക കുറ്റകൃത്യങ്ങൾ പരമാവധി കുറയ്ക്കുക എന്നതാണ് ഇതിലൂടെ ലക്ഷ്യമിടുന്നത്. 'ഓപ്പറേഷൻ തൂഫാൻ' എന്ന പദ്ധതിയുടെ ഭാഗമായി അത്യാധുനിക സാങ്കേതിക വിദ്യകൾ ഉപയോഗിച്ചുള്ള പരിശോധനകൾ കൂടുതൽ മേഖലകളിലേക്ക് വ്യാപിപ്പിക്കുമെന്നും അദ്ദേഹം കൂട്ടിച്ചേർത്തു.
