തിരുവനന്തപുരം: ചിറയിൻകീഴിൽ കോൺഗ്രസ് പ്രവർത്തകർ തമ്മിലടിച്ച സംഭവത്തിൽ പ്രധാനിയായ പാളയം പ്രദീപിനെ ഒപ്പം നിർത്താനുള്ള നീക്കങ്ങളിലൂടെ പാർട്ടിയെ വീണ്ടും പ്രതിസന്ധിയിലാക്കി രമ്യാ ഹരിദാസ് എം.എൽ.എ. വിവാദങ്ങൾ പുകയുന്നതിനിടെ പ്രദീപിനെ സ്വന്തം പേഴ്സണൽ സ്റ്റാഫിൽ ഉൾപ്പെടുത്താൻ എം.എൽ.എ തുനിഞ്ഞതിൽ പ്രാദേശിക നേതാക്കൾക്കിടയിൽ കടുത്ത അമർഷമാണ് ഉടലെടുത്തിരിക്കുന്നത്. അച്ചടക്കലംഘനത്തിന് പാർട്ടി സസ്പെൻഡ് ചെയ്ത പ്രദീപിനെ സ്റ്റാഫാക്കാനുള്ള തീരുമാനവുമായി രമ്യ മുന്നോട്ടുപോയാൽ പ്രതിഷേധം കൂടുതൽ ശക്തമാകാനാണ് സാധ്യത.

മേയ് 21 മുതൽ മുൻകാല പ്രാബല്യത്തോടെ പാളയം പ്രദീപിനെ പേഴ്സണൽ സ്റ്റാഫായി നിയമിക്കണമെന്ന് ആവശ്യപ്പെട്ടാണ് രമ്യാ ഹരിദാസ് നിയമസഭാ സെക്രട്ടറിയുടെ ഓഫീസിലേക്ക് കത്ത് നൽകിയത്. എന്നാൽ ഈ അപേക്ഷ സ്പീക്കർ തിരുവഞ്ചൂർ രാധാകൃഷ്ണൻ തിരിച്ചയച്ചു. ചിറയിൻകീഴിൽ സംഘർഷമുണ്ടായ ദിവസത്തെ തീയതി വെച്ച് തയ്യാറാക്കിയ കത്ത് ഇന്നലെയാണ് നിയമസഭാ സെക്രട്ടേറിയറ്റിൽ ലഭിച്ചത്. പാർട്ടിയിൽ നിന്ന് പുറത്താക്കപ്പെട്ട പ്രദീപിനെ ഔദ്യോഗിക ജീവനക്കാരനാക്കാനുള്ള നീക്കമാണ് ഇതോടെ തിരിച്ചടി നേരിട്ടത്. നിയമനങ്ങളിൽ മുൻകാല പ്രാബല്യം അനുവദിക്കാനാവില്ലെന്ന് വ്യക്തമാക്കിയാണ് നിയമസഭാ സെക്രട്ടേറിയറ്റ് കത്ത് തള്ളിയത്. അതേസമയം, ഇതേ ആവശ്യമുന്നയിച്ച് രമ്യാ ഹരിദാസ് വീണ്ടും കത്ത് നൽകിയേക്കുമെന്നും സൂചനകളുണ്ട്.

ഇതിനിടെ, ചിറയിൻകീഴ് സംഘർഷവുമായി ബന്ധപ്പെട്ട് രമ്യാ ഹരിദാസ് എം.എൽ.എക്കെതിരെ നിലവിൽ അച്ചടക്കനടപടികൾ ഉണ്ടാകില്ലെന്നാണ് വിവരം. അന്വേഷണ സമിതിക്ക് മുൻപാകെ രമ്യ നേരിട്ട് മൊഴി നൽകാത്തതിനാൽ സംഭവത്തിലെ അന്തിമ റിപ്പോർട്ട് ഇതുവരെ കെ.പി.സി.സിക്ക് സമർപ്പിച്ചിട്ടില്ല.

കഴിഞ്ഞ വെള്ളിയാഴ്ച രാത്രിയിലാണ് ചിറയിൻകീഴിൽ രമ്യാ ഹരിദാസ് എം.എൽ.എയും പ്രാദേശിക കോൺഗ്രസ് നേതാക്കളും തമ്മിൽ രൂക്ഷമായ തർക്കവും കയ്യാങ്കളിയുമുണ്ടായത്. എം.എൽ.എയും മറ്റ് ജനപ്രതിനിധികളും ഉദ്യോഗസ്ഥരും പങ്കെടുത്ത ഔദ്യോഗിക മീറ്റിംഗിൽ രമ്യയുടെ അനുയായിയായ പാളയം പ്രദീപ് പങ്കെടുത്തതായിരുന്നു തർക്കങ്ങൾക്ക് തുടക്കമിട്ടത്. പ്രദീപ് യോഗത്തിൽ ഇരിക്കുകയും ചില കരാറുകാർക്ക് നിർദ്ദേശങ്ങൾ നൽകുകയും ചെയ്തതിൽ പ്രാദേശിക നേതാക്കൾ വിയോജിപ്പ് പ്രകടിപ്പിച്ചിരുന്നു. യോഗത്തിൽ സംബന്ധിക്കുന്ന പ്രദീപിന്റെ ദൃശ്യങ്ങൾ എം.എൽ.എ തന്നെ പിന്നീട് വാട്‌സ്ആപ്പ് കൂട്ടായ്മയിൽ പങ്കുവെച്ചു. ഇത് ചോദ്യം ചെയ്തുകൊണ്ട് പ്രാദേശിക നേതാവായ സജാദ് ഗ്രൂപ്പിൽ സന്ദേശമയച്ചു. തുടർന്ന് രാത്രിയോടെ രമ്യാ ഹരിദാസും സംഘവും സജാദിന്റെ വീട്ടിലെത്തി. സജാദിന്റെ മകളെക്കൊണ്ട് ഫോണിലെ സന്ദേശങ്ങൾ വായിപ്പിക്കാൻ ശ്രമിച്ചുവെന്ന് കുടുംബം ആരോപിച്ചു. വിവരമറിഞ്ഞ് ജില്ലാ പഞ്ചായത്ത് അംഗവും ഗ്രൂപ്പ് അഡ്മിനുമായ സജിത് മുട്ടമ്പലം ഉൾപ്പെടെയുള്ളവർ സ്ഥലത്തെത്തിയതോടെ തർക്കം അടിപിടിയിൽ കലാശിക്കുകയായിരുന്നു.