കണ്ണൂർ: എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശന്റെ പ്രസ്താവനകൾക്കെതിരെ പരോക്ഷ വിമർശനവുമായി മുൻ സ്പീക്കറും സി.പി.ഐ.എം നേതാവുമായ എ.എൻ. ഷംസീർ. അദ്വൈത ചിന്തകൾക്ക് അർത്ഥം നൽകിയ ശ്രീനാരായണ ഗുരുദേവൻ ഇന്നത്തെ പുതുമടിശീലക്കാരുടെ മടിയിൽ പിടഞ്ഞുവീണ് മരിക്കുകയാണെന്ന് ശ്രീനാരായണ ഗുരുവിന്റെ ചിത്രം സഹിതം ഷംസീർ ഫേസ്ബുക്കിൽ കുറിച്ചു.
നേരത്തെ, എ.എൻ. ഷംസീറിനെ വ്യക്തിപരമായി അധിക്ഷേപിച്ചുകൊണ്ടുള്ള വെള്ളാപ്പള്ളി നടേശന്റെ പ്രതികരണം വലിയ വിവാദങ്ങൾക്ക് വഴിവെച്ചിരുന്നു. ഷംസീറിന്റെ മനസ്സ് കമ്യൂണിസ്റ്റ് രീതിയല്ലെന്നും മുസ്ലിം ലീഗിന്റെ ചിന്താഗതിയാണെന്നും വെള്ളാപ്പള്ളി ആരോപിച്ചിരുന്നു. പിണറായി വിജയനെപ്പോലുള്ളവർ വലിയ ത്യാഗങ്ങൾ സഹിച്ചാണ് ഭരണപദവികളിലെത്തിയതെന്നും എന്നാൽ ഷംസീർ എളുപ്പവഴിയിലാണ് അധികാരക്കസേര സ്വന്തമാക്കിയതെന്നും വെള്ളാപ്പള്ളി പരിഹസിച്ചിരുന്നു. ഇതിനുള്ള പ്രതികരണമായാണ് ഷംസീറിന്റെ ഇപ്പോഴത്തെ സോഷ്യൽ മീഡിയ കുറിപ്പ്.
