കൊച്ചി: മുഖ്യമന്ത്രിയുടെ സോഷ്യൽ മീഡിയ കോർഡിനേറ്ററായി പ്രവർത്തിച്ചിരുന്ന മുഹമ്മദ് ഹുസൈൻ ഉൾപ്പെട്ട എം.ഡി.എം.എ കേസിൽ അറസ്റ്റിലായ അബ്ദുൾ സലാമിന് ക്രിമിനൽ ഗുണ്ടാസംഘങ്ങളുമായി ബന്ധമുണ്ടെന്ന് വെളിപ്പെടൽ. കുപ്രസിദ്ധ ഗുണ്ടാ നേതാവായ അനസ് പെരുമ്പാവൂരിന്റെ സംഘത്തിലെ പ്രധാന അംഗങ്ങളിലൊരാളായിരുന്നു അബ്ദുൾ സലാം.
കേസിലെ മറ്റൊരു പ്രതിയായ സൈനുൽ ആബിദ് ഒട്ടനവധി സൈബർ തട്ടിപ്പ് കേസുകളിൽ പ്രതി ചേർക്കപ്പെട്ടിട്ടുള്ള ആളാണ്. ഓൺലൈൻ തട്ടിപ്പ് സംഘങ്ങൾക്ക് പണമിടപാടുകൾക്കായി വ്യാജ (മ്യൂൾ) ബാങ്ക് അക്കൗണ്ടുകൾ സൗകര്യപ്പെടുത്തി നൽകുന്നത് ആബിദായിരുന്നു. കോഴിക്കോട്, കണ്ണൂർ എന്നീ ജില്ലകൾക്ക് പുറമേ ആന്ധ്രാപ്രദേശിലും ഇയാൾക്കെതിരെ സൈബർ കുറ്റകൃത്യങ്ങൾക്ക് കേസുകൾ നിലവിലുണ്ട്.
വിവിധ ജില്ലകളിലായി പ്രതികൾ ലഹരിമരുന്ന് കൈമാറ്റം നടത്തിയ ഇടനിലക്കാരെക്കുറിച്ചുള്ള കൃത്യമായ വിവരങ്ങൾ പോലീസിന് ലഭിച്ചിട്ടുണ്ട്. അറസ്റ്റിലായവരെ കൂടുതൽ ചോദ്യം ചെയ്യുന്നതിനായി പോലീസ് ഇന്ന് കോടതിയിൽ കസ്റ്റഡി അപേക്ഷ സമർപ്പിക്കും.
കഴിഞ്ഞ ദിവസമാണ് മുഖ്യമന്ത്രി വി.ഡി. സതീശന്റെ സോഷ്യൽ മീഡിയ കോർഡിനേറ്ററായ മുഹമ്മദ് ഹുസൈൻ കേസിൽ പിടിയിലാകുന്നത്. ഇയാൾക്കൊപ്പം എറണാകുളം വെങ്ങോല നിവാസികളായ പി.എ. അബ്ദുൾ സലാം, കെ.എച്ച്. മുഹമ്മദ് ഹുസൈൻ, പി.എ. അബ്ബാസ് എന്നിവരെയും പോലീസ് കസ്റ്റഡിയിലെടുത്തിരുന്നു. 'ഓപ്പറേഷൻ തൂഫാൻ' ലഹരിവിരുദ്ധ നടപടികളുടെ ഭാഗമായി ചന്ദേര പോലീസാണ് ഈ സംഘത്തെ വലയിലാക്കിയത്.
