തിരുവനന്തപുരം: സംസ്ഥാനത്തെ കശുവണ്ടി അഴിമതിക്കേസിൽ ഒന്നാം പ്രതിയായ കെ.എ. രതീഷ് ഖാദി ബോർഡ് സെക്രട്ടറി പദവി ഒഴിഞ്ഞു. കശുവണ്ടി വികസന കോർപ്പറേഷൻ മുൻ മാനേജിങ് ഡയറക്ടറായിരുന്നു ഇദ്ദേഹം.
അഴിമതിക്കേസിൽ പ്രതിപ്പട്ടികയിലുള്ള ഒരാൾ സർക്കാരിന്റെ നിർണായക പദവിയിലിരിക്കുന്നതിനെതിരെ ഹൈക്കോടതി കടുത്ത അതൃപ്തി രേഖപ്പെടുത്തിയിരുന്നു. കോടതിയുടെ രൂക്ഷവിമർശനത്തിന് പിന്നാലെ എത്രയും വേഗം സ്ഥാനമൊഴിയാൻ മുഖ്യമന്ത്രി രതീഷിനോട് ആവശ്യപ്പെടുകയായിരുന്നു. മുഖ്യമന്ത്രിയുടെ ഈ ഇടപെടലിനെത്തുടർന്നാണ് അദ്ദേഹം ഇപ്പോൾ രാജി സമർപ്പിച്ചിരിക്കുന്നത്.
ഖാദി ബോർഡ് സെക്രട്ടറി പദവിക്ക് പുറമെ മറ്റ് സുപ്രധാന ചുമതലകളും കെ.എ. രതീഷ് വഹിക്കുന്നുണ്ട്. റൂട്രോണിക്സ് (കേരള സംസ്ഥാന ഗ്രാമീണ വനിതാ ഇലക്ട്രോണിക്സ് വ്യാവസായിക സഹകരണ ഫെഡറേഷൻ ലിമിറ്റഡ്) മാനേജിങ് ഡയറക്ടർ, കേരള ഖാദി തൊഴിലാളി ക്ഷേമനിധി ബോർഡ് സി.ഇ.ഒ (ചീഫ് എക്സിക്യൂട്ടീവ് ഓഫീസർ) എന്നീ സ്ഥാനങ്ങളിലും ഇദ്ദേഹം തന്നെയാണ് സേവനമനുഷ്ഠിക്കുന്നത്.
