റെയ്ഡിന് ശേഷം മടങ്ങിപ്പോകുകയായിരുന്ന എൻഫോഴ്സ്മെന്റ് ഡയറക്ടറേറ്റ് (ഇ.ഡി) ഉദ്യോഗസ്ഥരെ മർദ്ദിച്ച കേസിൽ ശ്രീജിത്ത്, അനിൽ കുമാർ, ഷെഫീക്ക്, നിഷാദ്, ജീവൻ, കിരൺ എന്നിവരുൾപ്പെടുന്ന ഏഴ് പ്രതികൾക്ക് ജാമ്യം ലഭിച്ചു. ഉദ്യോഗസ്ഥർക്ക് നേരെയുണ്ടായത് മുൻകൂട്ടി ആസൂത്രണം ചെയ്ത ആക്രമണമാണെന്നും അതിനാൽ യാതൊരു കാരണവശാലും പ്രതികളെ ജാമ്യത്തിൽ വിടരുതെന്നും ഇ.ഡി കോടതിയിൽ ശക്തമായി വാദിച്ചിരുന്നു. ഇതിനായി ഇ.ഡി കേസിൽ നേരിട്ട് കക്ഷി ചേരുകയും ചെയ്തിരുന്നു.
ആകെ പതിനൊന്ന് പേരാണ് കേസിൽ ജാമ്യം തേടിയിരുന്നത്. ഇതിൽ ഏഴ് പേർ സമർപ്പിച്ച അപേക്ഷകളാണ് ഹൈക്കോടതി ഇന്ന് പരിഗണനയ്ക്കെടുത്തത്. പ്രതികൾ കഴിഞ്ഞ 67 ദിവസമായി ജയിലിലാണെന്ന കാര്യവും, ഇവരെ കസ്റ്റഡിയിൽ വാങ്ങി ചോദ്യം ചെയ്യൽ നടപടികൾ പൂർത്തിയാക്കിയെന്നതും കോടതി മുഖവിലയ്ക്കെടുത്തു. ഇതിനുപുറമെ കേസിന്റെ അന്വേഷണം പൂർണ്ണമായും അവസാനിച്ചു എന്ന വസ്തുത കൂടി വിലയിരുത്തിയ ശേഷമാണ് കോടതി ഇവർക്ക് ജാമ്യം നൽകാൻ തീരുമാനിച്ചത്.
