പി.എസ്.സിയിലെ ക്രമക്കേടുകൾക്കെതിരെ കടുത്ത വിമർശനവുമായി സി.പി.ഐയുടെ 'നവയുഗം' വാരികരംഗത്തെത്തി. 'വിശ്വാസ്യത വീണ്ടെടുക്കണം' എന്ന പേരിൽ പ്രശസ്ത കവി പി.കെ. ഗോപി എഴുതിയ ലേഖനത്തിലാണ് ഈ പരാമർശങ്ങളുള്ളത്.
യാതൊരുവിധ സ്വാധീനങ്ങളോ ഒത്താശകളോ ഇല്ലാതെ ഉദ്യോഗാർത്ഥികൾക്ക് തൊഴിൽ ലഭ്യമാകുന്ന ഏക സംവിധാനമായ പി.എസ്.സിയുടെ ആന്തരിക പ്രവർത്തനങ്ങളിൽ കാപട്യം നിഴലിക്കുന്നത് വലിയൊരു തെറ്റാണെന്ന് ലേഖനത്തിൽ വ്യക്തമാക്കുന്നു. തികച്ചും വിശ്വസ്തതയോടെ പൂർത്തിയാക്കേണ്ട ഔദ്യോഗിക നിയമനങ്ങൾ നിർഭാഗ്യവശാൽ ഇന്ന് സംശയമുനയിൽ നിൽക്കുകയാണ്.
യുവതലമുറയുടെ വലിയ പ്രതീക്ഷയായ പി.എസ്.സി അതിന്റെ അടിസ്ഥാനപരമായ ലക്ഷ്യങ്ങളിൽ നിന്നും വഴിമാറി സഞ്ചരിക്കരുത്. എന്തെങ്കിലും തരത്തിലുള്ള തെറ്റുകൾ സംഭവിച്ചിട്ടുണ്ടെങ്കിൽ അത് പരിഹരിക്കുന്നതിനുള്ള സമഗ്രമായ തിരുത്തൽ നടപടികൾക്ക് രാഷ്ട്രീയ പ്രസ്ഥാനങ്ങൾ തടസ്സമായി നിൽക്കരുതെന്നും ലേഖനം ശക്തമായി ആവശ്യപ്പെടുന്നു.
