തിമിർത്തുപെയ്യുന്ന മഴ കാരണം പാലക്കാട് ജില്ലയിലെ ഉയർന്ന പ്രദേശങ്ങളിലേക്കുള്ള വിനോദസഞ്ചാരികളുടെ യാത്രയ്ക്ക് നിയന്ത്രണം പ്രാബല്യത്തിൽ വരുത്തി. നെല്ലിയാമ്പതി ഉൾപ്പെടെ മലയോര മേഖലയിലുള്ള മുഴുവൻ ടൂറിസ്റ്റ് കേന്ദ്രങ്ങളിലേക്കുമുള്ള സഞ്ചാരികളുടെ പ്രവേശനം പൂർണ്ണമായും തടഞ്ഞിട്ടുണ്ട്. കൂടാതെ മലമ്പുഴയിലെ കവയിലും പ്രവേശനവിലക്ക് ഏർപ്പെടുത്തി.
അതിനിടെ, നെല്ലിയാമ്പതി ചുരം റോഡിൽ മരം നിലംപൊത്തിയതിനെ തുടർന്ന് വാഹനഗതാഗതം തടസ്സപ്പെട്ടു. കുണ്ടറചോലയ്ക്ക് സമീപമാണ് മരം കടപുഴകി വീണത്. വിവരമറിഞ്ഞ് സ്ഥലത്തെത്തിയ ഫയർഫോഴ്സ് സംഘം മരം മുറിച്ചുമാറ്റി പാത ഗതാഗതയോഗ്യമാക്കാനുള്ള ശ്രമങ്ങൾ ആരംഭിച്ചിട്ടുണ്ട്.
