കോട്ടയം: ജനപ്രതിനിധികളെയല്ല, മറിച്ച് സാധാരണക്കാരെയാണ് ഉമ്മൻ ചാണ്ടി വിഐപികളായി കണ്ടിരുന്നതെന്ന് എഐസിസി ജനറൽ സെക്രട്ടറി കെ.സി. വേണുഗോപാൽ. തന്നെ കാണാനെത്തുന്ന ഓരോ വ്യക്തിയും അദ്ദേഹത്തിന് വിഐപികളായിരുന്നുവെന്നും വേണുഗോപാൽ ഓർമിച്ചു. പുതുപ്പള്ളിയിൽ സംഘടിപ്പിച്ച ഉമ്മൻ ചാണ്ടി അനുസ്മരണച്ചടങ്ങിൽ സംസാരിക്കുകയായിരുന്നു അദ്ദേഹം. കേരളത്തിൻ്റെ പൊതുപ്രവർത്തന ചരിത്രം ഉമ്മൻ ചാണ്ടിക്ക് മുൻപും പിൻപും എന്ന രീതിയിലാണ് അടയാളപ്പെടുത്തപ്പെടുന്നതെന്ന് അദ്ദേഹം ചൂണ്ടിക്കാട്ടി. മരണശേഷവും അദ്ദേഹം ജനമനസ്സുകളിൽ ജീവിക്കുന്നുവെന്നതിന്റെ വ്യക്തമായ തെളിവാണ് കല്ലറയിൽ ഇപ്പോഴും കാണുന്ന തിരക്കെന്നും വേണുഗോപാൽ പറഞ്ഞു.
തന്റെ അടുത്തെത്തുന്ന പരാതികൾ കേട്ട് അത് അവഗണിക്കുന്ന പ്രകൃതക്കാരനായിരുന്നില്ല ഉമ്മൻ ചാണ്ടി. അദ്ദേഹത്തിനെതിരെ നിരവധി വിവാദങ്ങൾ ഉയർന്നുവന്നിരുന്നു.
പൊതുജനങ്ങൾക്കായി സെക്രട്ടേറിയറ്റിന്റെ വാതിലുകൾ തുറന്നിട്ടതും മന്ത്രിസഭായോഗങ്ങൾക്ക് ശേഷം മാധ്യമങ്ങളെ കാണുന്ന രീതി തുടങ്ങിയതും അദ്ദേഹമാണ്. കഴിഞ്ഞ പത്ത് വർഷക്കാലം ഇതെല്ലാം നിലച്ചിരിക്കുകയായിരുന്നുവെന്നും യുഡിഎഫ് സർക്കാർ വന്നതോടെയാണ് അവയെല്ലാം പുനരാരംഭിച്ചതെന്നും അദ്ദേഹം പറഞ്ഞു. മുഖ്യമന്ത്രി പദവിയിലിരിക്കെ കല്ലേറിൽ പരിക്കേറ്റിട്ടുപോലും പ്രതികൾക്കെതിരെ നടപടി സ്വീകരിക്കരുത് എന്നായിരുന്നു അദ്ദേഹം പറഞ്ഞത്.
ഉമ്മൻ ചാണ്ടിയുടെ കൂടി സ്വാധീനം കൊണ്ടാണ് ജനങ്ങൾ യുഡിഎഫിന് വോട്ട് നൽകിയതെന്നും കോൺഗ്രസ് പ്രസ്ഥാനത്തിന് അദ്ദേഹം കേവലമൊരു നേതാവ് മാത്രമായിരുന്നില്ല, മറിച്ച് എല്ലാമെല്ലാമായിരുന്നുവെന്നും വേണുഗോപാൽ വ്യക്തമാക്കി. ജീവിച്ചിരുന്ന കാലത്തേക്കാൾ കരുത്തനാണ് മരണശേഷമുള്ള ഉമ്മൻ ചാണ്ടി. വിഴിഞ്ഞം തുറമുഖത്തിന് ഉമ്മൻ ചാണ്ടിയുടെ പേര് നൽകാൻ സർക്കാർ തയ്യാറാകണം. ഇതിനായുള്ള നടപടികൾ സർക്കാർ സ്വീകരിക്കണമെന്നും, ഇക്കാര്യത്തിൽ പാർട്ടി യാതൊരു വിട്ടുവീഴ്ചയ്ക്കും തയ്യാറാകരുതെന്നും അദ്ദേഹം ആവശ്യപ്പെട്ടു. രാഷ്ട്രീയ എതിരാളികളോട് പോലും പ്രതികാരബുദ്ധിയോടെ പെരുമാറാത്ത അദ്ദേഹത്തിന്റെ സവിശേഷമായ ശൈലിയാണ് യുഡിഎഫിന്റെ വിജയങ്ങൾക്ക് കാരണമായതെന്നും കെ.സി. വേണുഗോപാൽ കൂട്ടിച്ചേർത്തു.
