പാലക്കാട്: മുണ്ടൂർ ഒമ്പതാം മൈലിൽ കാൽനടയാത്രക്കാരായ വിദ്യാർത്ഥികൾക്കിടയിലേക്ക് ആശുപത്രി മാലിന്യം കയറ്റിവന്ന ലോറി പാഞ്ഞുകയറി ഒരു വിദ്യാർത്ഥി മരിച്ചു. മുണ്ടൂർ യുവക്ഷേത്ര കോളേജിലെ രണ്ടാം വർഷ ബിസിഎ വിദ്യാർത്ഥിയും പറക്കുളം സ്വദേശിയുമായ മുഹമ്മദ് ഫർഹാൻ ആണ് മരിച്ചത്. ഇന്ന് ഉച്ചയോടെയായിരുന്നു അപകടം നടന്നത്.
റോഡിലൂടെ നടന്നുപോവുകയായിരുന്ന വിദ്യാർത്ഥികളുടെ ഇടയിലേക്കാണ് ലോറി ഇടിച്ചുകയറിയത്. അപകടത്തിൽ മറ്റ് മൂന്ന് വിദ്യാർത്ഥികൾക്കും ഒരു പ്രദേശവാസിക്കും പരിക്കേറ്റിട്ടുണ്ട്. ഇതിൽ ഒരു വിദ്യാർത്ഥിയുടെ നില അതീവ ഗുരുതരമായതിനാൽ വിദഗ്ദ്ധ ചികിത്സയ്ക്കായി പാലക്കാട്ടെ സ്വകാര്യ ആശുപത്രിയിലേക്ക് മാറ്റി.
അപകടം നടന്ന ഉടൻ തന്നെ പരിക്കേറ്റവരെ പാലക്കാട് ജില്ലാ ആശുപത്രിയിൽ എത്തിച്ചിരുന്നു. എന്നാൽ ചികിത്സയിലിരിക്കെ ഫർഹാൻ മരണത്തിന് കീഴടങ്ങുകയായിരുന്നു.
