ഭോപ്പാൽ: മധ്യപ്രദേശിലെ ഡിൻഡോരി ജില്ലയിലുള്ള പഡാരിയ ഛാന്ത ഗ്രാമത്തിൽ രസഗുളയെന്ന് കരുതി നാടൻ ബോംബ് വായിലിട്ട് കടിച്ച രാജേന്ദ്ര ബറോട്ടിയ എന്ന യുവാവ് മരിച്ചു. യുവാവിന് രസഗുളയെന്ന് പറഞ്ഞ് ബോംബ് നൽകിയ അയൽവാസി രാം ഭാഗത്ത് ബറോട്ടിയയെ പൊലീസ് കസ്റ്റഡിയിലെടുത്തു.
കാട്ടുപന്നികളെ കൊല്ലാൻ ഉപയോഗിക്കുന്ന നാടൻ ബോംബാണ് ഇന്നലെ നടന്ന അപകടത്തിൽ പൊട്ടിത്തെറിച്ചത്. ഭക്ഷണം കഴിച്ച ശേഷം വീടിന് മുന്നിൽ വിശ്രമിക്കുകയായിരുന്ന രാജേന്ദ്രയുടെ അടുത്തെത്തിയ അയൽവാസി രസഗുളയെന്ന് തെറ്റിദ്ധരിപ്പിച്ച് ബോംബ് കൈമാറുകയായിരുന്നുവെന്ന് പൊലീസ് വ്യക്തമാക്കി.
ഉടനടി അത് വായിലിട്ടതോടെ ഉഗ്രശബ്ദത്തോടെ പൊട്ടിത്തെറിക്കുകയും രാജേന്ദ്രയ്ക്ക് ഗുരുതരമായി പരുക്കേൽക്കുകയും ചെയ്തു. വീട്ടുകാർ ഉടൻ തന്നെ ജില്ലാ ആശുപത്രിയിൽ എത്തിച്ചെങ്കിലും ചികിത്സയ്ക്കിടെ മരണം സംഭവിക്കുകയായിരുന്നു; പ്രതിക്കെതിരെ ബി.എൻ.എസ് സെക്ഷൻ 105 പ്രകാരം കേസെടുത്ത പൊലീസ് വിശദമായ അന്വേഷണം നടത്തിവരികയാണ്.
