ന്യൂഡൽഹി: അന്താരാഷ്ട്ര കുറ്റവാളിയും കുപ്രസിദ്ധ ഗുണ്ടാത്തലവനുമായ ഗോൾഡി ബ്രാർ എന്ന സതീന്ദർജീത്ത് സിംഗിനെ ഏറ്റവും ആവശ്യമുള്ള പിടികിട്ടാപ്പുള്ളികളുടെ പത്തുപേരടങ്ങുന്ന പട്ടികയിൽ ഉൾപ്പെടുത്തി യുഎസ് ഫെഡറൽ അന്വേഷണ ഏജൻസിയായ എഫ്ബിഐ. ഇയാളെക്കുറിച്ച് കൃത്യമായ സൂചന നൽകുന്നവർക്ക് പത്ത് ലക്ഷം ഡോളർ (ഏകദേശം 9,59,65,000 രൂപ) ഇനാം പ്രഖ്യാപിച്ചിട്ടുണ്ട്. ലഹരിക്കടത്ത്, ആസൂത്രിത കൊലപാതകങ്ങൾ ഉൾപ്പെടെയുള്ള കൊടുംകുറ്റകൃത്യങ്ങളിൽ പ്രതിയായ ഗോൾഡി ബ്രാർ, കുപ്രസിദ്ധമായ ലോറൻസ് ബിഷ്‌ണോയ് ഗുണ്ടാസംഘത്തിന്റെ വടക്കേ അമേരിക്കയിലെ മുഖ്യ ഓപ്പറേഷൻ തലവനാണ്.

അതീവ അപകടകാരിയായ വ്യക്തിയെന്നാണ് എഫ്ബിഐ ഗോൾഡി ബ്രാറിനെ വിശേഷിപ്പിച്ചിട്ടുള്ളത്. ഒളിവിൽ കഴിയാൻ സാധ്യതയുള്ള ഇയാളെ നേരിട്ട് സമീപിക്കുന്നത് അപകടമാണെന്നും എഫ്ബിഐ മുന്നറിയിപ്പ് നൽകുന്നു. കാനഡ, കാലിഫോർണിയ, ഇന്ത്യ, മെക്‌സിക്കോ എന്നിവിടങ്ങളിൽ വേരുകളുള്ള ഇയാളെക്കുറിച്ച് എന്തെങ്കിലും വിവരം ലഭിക്കുന്നവർ എത്രയും വേഗം ലോക്കൽ പോലീസിനെയോ എഫ്ബിഐയെയോ അറിയിക്കണമെന്നും അധികൃതർ ആവശ്യപ്പെട്ടു.

വടക്കേ അമേരിക്കയിലും പുറത്തുമായി പ്രവർത്തിക്കുന്നതും ഇന്ത്യൻ ബന്ധമുള്ളതുമായ മൂന്ന് പ്രധാന അധോലോക സംഘങ്ങളെ വേരറുക്കാൻ 'ഓപ്പറേഷൻ ഹാർഡ് ബോൾ' എന്ന പേരിൽ സമഗ്ര അന്വേഷണം നടക്കുകയാണ്. ബിഷ്‌ണോയ് സംഘം, ധന്ദ സംഘം, ഭഗവൻപുരിയ സംഘം എന്നിവരാണ് ഈ അന്വേഷണ പരിധിയിലുള്ളത്. ബിഷ്‌ണോയ് സംഘത്തിലെ പ്രധാനിയെന്ന നിലയിലാണ് ബ്രാറിനെതിരെയുള്ള പിടിമുറുക്കൽ. ഓപ്പറേഷൻ ഹാർഡ് ബോളിന്റെ ഭാഗമായി ജൂലൈ മാസത്തോടെ 24 പേർ കസ്റ്റഡിയിലാവുകയോ അറസ്റ്റിലാവുകയോ ചെയ്തിരുന്നു; പിന്നീട് എഫ്ബിഐയുടെ ഇടപെടലിലൂടെ നാല് പേർ കൂടി പിടിയിലായി. ഇതിനിടയിൽ ഒരാൾ മരണപ്പെടുകയും ചെയ്തു. ഇനി വലയിലാകാനുള്ള അഞ്ചുപേരിൽ പ്രധാനിയായ ഗോൾഡി ബ്രാറിനെ ലക്ഷ്യമിട്ടാണ് എഫ്ബിഐ ഇപ്പോൾ റെഡ് കോർണർ സ്വഭാവത്തിലുള്ള പ്രഖ്യാപനം നടത്തിയത്.

2023 ജൂണിൽ കാനഡയിലെ സറേയിൽ സിഖ് നേതാവ് ഹർദീപ് സിങ് നിജ്ജർ കൊല്ലപ്പെട്ട സംഭവത്തിൽ ലോറൻസ് ബിഷ്‌ണോയ് സംഘത്തിന് പങ്കുണ്ടെന്ന് കണ്ടെത്തിയിരുന്നു. ഈ കൊലപാതകം ഗൂഢാലോചന നടത്തിയത് ലോറൻസും ഗോൾഡി ബ്രാറുമാണെന്ന് യുഎസ് പോലീസിന്റെ കുറ്റപത്രത്തിൽ രേഖപ്പെടുത്തിയിട്ടുണ്ട്. കൂടാതെ, പ്രശസ്ത പഞ്ചാബി ഗായകൻ സിദ്ധു മൂസെ വാലയെ വെടിവെച്ചുകൊന്ന സംഭവത്തിന് പിന്നിലും ബിഷ്‌ണോയ് സംഘമായിരുന്നു; ഇതിലെ മുഖ്യസൂത്രധാരനും ഗോൾഡി ബ്രാറായിരുന്നു. പിന്നീട് ബിബിസിക്ക് നൽകിയ അഭിമുഖത്തിൽ മൂസെ വാലയെ വധിച്ചതിന്റെ കാരണം ഗോൾഡി തുറന്നുപറഞ്ഞിരുന്നു. ധാർഷ്ട്യം കാരണം മൂസെ വാല ചില തെറ്റുകൾ ചെയ്തുവെന്നും അത് തങ്ങൾക്ക് ക്ഷമിക്കാൻ കഴിയുന്നതായിരുന്നില്ലെന്നും, സ്വന്തം പ്രവർത്തികളുടെ അനന്തരഫലമാണ് മൂസെ വാല അനുഭവിച്ചതെന്നുമായിരുന്നു ഗോൾഡിയുടെ വെളിപ്പെടുത്തൽ.