ന്യൂഡൽഹി: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാർ പൂർണ്ണമായും ബിജെപിയുടെ താല്പര്യങ്ങൾ സംരക്ഷിക്കുന്ന ഏജന്റായി പ്രവർത്തിക്കുകയാണെന്ന് എഐസിസി ജനറൽ സെക്രട്ടറി കെ.സി. വേണുഗോപാൽ ആരോപിച്ചു. ഗ്യാനേഷ് കുമാർ കേവലമൊരു ഉപകരണം മാത്രമാണെന്നും, ഭരണത്തുടർച്ച ഉറപ്പാക്കാൻ ഭരണകൂടം കണ്ടെത്തിയ കുറുക്കുവഴിയാണ് എസ്ഐആർ (SIR) പദ്ധതിയെന്നും അദ്ദേഹം വിമർശിച്ചു. പ്രധാനമന്ത്രി നരേന്ദ്ര മോദിയുടെയും കേന്ദ്ര ആഭ്യന്തര മന്ത്രി അമിത് ഷായുടെയും നേരിട്ടുള്ള നിർദ്ദേശപ്രകാരമാണ് എസ്ഐആർ നടപ്പാക്കിയതെന്ന് കുറ്റപ്പെടുത്തിയ അദ്ദേഹം, ഇതിന്റെ ധാർമ്മിക ഉത്തരവാദിത്തം ഏറ്റെടുത്ത് പ്രധാനമന്ത്രി നരേന്ദ്ര മോദി ഉടൻ രാജിവെക്കണമെന്ന് ആവശ്യപ്പെട്ടു.
വോട്ടർപട്ടികയിലെ തിരിമറികൾക്കും 'വോട്ട് ചോരി'ക്കുമെതിരെ അതിശക്തമായ സമരപരിപാടികളുമായി മുന്നോട്ടുപോകാനാണ് തീരുമാനമെന്ന് കെ.സി. വേണുഗോപാൽ വ്യക്തമാക്കി. മറ്റു രാഷ്ട്രീയ പ്രസ്ഥാനങ്ങളെക്കൂടി അണിനിരത്തി സമാധാനപരമായ രീതിയിൽ രാജ്യവ്യാപക പ്രതിഷേധങ്ങൾ സംഘടിപ്പിക്കും. വിഷയത്തിൽ തുടർനടപടികൾ 'ഇന്ത്യ' (INDIA) മുന്നണി യോഗത്തിൽ ആലോചിച്ച് തീരുമാനിക്കും. എസ്ഐആറിലൂടെ ഏകദേശം 13 കോടിയോളം സാധാരണക്കാരുടെ വോട്ടവകാശമാണ് കവർന്നെടുത്തത്; ഇത്തരത്തിൽ വോട്ട് നഷ്ടപ്പെട്ട മുഴുവൻ ആളുകളെയും നേരിൽക്കണ്ട് സംസാരിക്കാനാണ് പാർട്ടി തീരുമാനം. എസ്ഐആർ പൂർണ്ണമായ ഒരു വഞ്ചനാപരമായ നടപടിയാണെന്നും നിലവിലെ സാഹചര്യത്തിൽ ഈ പ്രക്രിയ അടിയന്തരമായി നിർത്തിവെക്കാൻ തയ്യാറാകണമെന്നും കെ.സി. വേണുഗോപാൽ ആവശ്യപ്പെട്ടു.
