ലഖ്‌നൗ: ഉത്തർപ്രദേശിൽ യുവതിയെ പീഡിപ്പിച്ച കേസിൽ രണ്ട് സി.ആർ.പി.എഫ് ഉദ്യോഗസ്ഥരെയും രണ്ട് യു.പി പോലീസ് ഉദ്യോഗസ്ഥരെയും പോലീസ് അറസ്റ്റ് ചെയ്തു. മുസാഫർനഗർ ജില്ലയിലെ സൗരംഗ് സ്വദേശിയായ സി.ആർ.പി.എഫ് ഇൻസ്‌പെക്ടർ മോഹിത്, രാജസ്ഥാനിലെ അൽവാർ സ്വദേശിയായ സി.ആർ.പി.എഫ് ഹെഡ് കോൺസ്റ്റബിൾ ലാലാറാം യാദവ്, യു.പി പോലീസിലെ സബ് ഇൻസ്‌പെക്ടർ സഞ്ജയ് തോമർ, ഹെഡ് കോൺസ്റ്റബിൾ പ്രമോദ് എന്നിവരാണ് പിടിയിലായത്.

ഹരിയാനയിലെ ഫത്തേഹാബാദ് സ്വദേശിനിയായ ഇരുപത്തിനാലുകാരി നൽകിയ പരാതിയിലാണ് പോലീസ് നിയമനടപടികളിലേക്ക് കടന്നത്. ഉത്തരാഖണ്ഡിൽ നിന്നുള്ള സ്വതന്ത്ര എം.എൽ.എ ഉമേഷ് കുമാറിന്റെ ഉടമസ്ഥതയിലുള്ള അംറോഹ ജില്ലയിലെ ഫാം ഹൗസിൽ വെച്ചാണ് അതിക്രമം അരങ്ങേറിയതെന്നാണ് വിവരം. സൗഹൃദം നടിച്ച് സി.ആർ.പി.എഫ് ഉദ്യോഗസ്ഥൻ യുവതിയെ അവിടേക്ക് കൂട്ടിക്കൊണ്ടുപോകുകയായിരുന്നു. എന്നാൽ കൃത്യം നടക്കുന്ന സമയത്ത് താൻ ഫാം ഹൗസിൽ ഉണ്ടായിരുന്നില്ലെന്നാണ് ഉമേഷ് കുമാർ എം.എൽ.എയുടെ വിശദീകരണം.

സെപ്റ്റംബർ 21-ന് ഹരിയാനയിലെ സോനിപത്തിൽ വെച്ചാണ് അതിക്രമത്തിനിരയായ യുവതി മോഹിത്തിനെ കാണുന്നത്. തുടർന്ന് ക്ഷേത്രദർശനം നടത്താമെന്ന് വിശ്വസിപ്പിച്ച് യുവതിയെ മീററ്റിലേക്ക് കൂട്ടിക്കൊണ്ടുപോയി. അവിടെവെച്ച് മോഹിത്തിന്റെ സഹപ്രവർത്തകനായ സി.ആർ.പി.എഫ് ഹെഡ് കോൺസ്റ്റബിൾ ലാലാറാം യാദവും ഇവർക്കൊപ്പം ചേർന്നു.

സെപ്റ്റംബർ 22-ന് വൈകുന്നേരം പ്രതികൾ യുവതിയുമായി കാറിൽ ഹസൻപൂരിലേക്ക് തിരിച്ചു. യാത്രാമധ്യേ സബ് ഇൻസ്പെക്ടർ സഞ്ജയ് തോമറും ഇവർ സഞ്ചരിച്ച വാഹനത്തിൽ കയറി. തുടർന്ന് സംഘം യുവതിയെ അത്രാസി-ഹസൻപൂർ പാതയിലുള്ള ഫാം ഹൗസിലെത്തിക്കുകയും അവിടെ രണ്ട് മുറികൾ വാടകയ്ക്കെടുക്കുകയും ചെയ്തു. പോലീസ് ഹെഡ് കോൺസ്റ്റബിളായ പ്രമോദാണ് സംഘത്തിന് ഭക്ഷണവും മദ്യവും എത്തിച്ചുനൽകിയതെന്ന് പരാതിയിൽ വ്യക്തമാക്കുന്നുണ്ട്. അന്ന് വൈകുന്നേരം മോഹിത്, ലാലാറാം യാദവ്, സഞ്ജയ് തോമർ എന്നിവർ ചേർന്ന് യുവതിയെ ക്രൂരമായി ബലാത്സംഗം ചെയ്യുകയായിരുന്നു. തുടർന്ന് പ്രമോദും അതിക്രമത്തിന് മുതിർന്നതോടെ ഇയാളെ തള്ളിമാറ്റി മുറി അകത്തുനിന്ന് പൂട്ടിയ യുവതി, പോലീസ് ഹെൽപ്പ് ലൈൻ നമ്പറിൽ വിളിച്ച് വിവരമറിയിച്ചു.

വിവരമറിഞ്ഞയുടൻ ഹസൻപൂർ, രാജബ്പൂർ പോലീസ് സ്റ്റേഷനുകളിൽ നിന്നുള്ള പോലീസ് സംഘം അതിവേഗം സംഭവസ്ഥലത്തെത്തി യുവതിയെ സുരക്ഷിത കേന്ദ്രത്തിലേക്ക് മാറ്റുകയും നാല് പ്രതികളെയും കസ്റ്റഡിയിലെടുക്കുകയും ചെയ്തു. യുവതിയുടെ മൊഴിയുടെ അടിസ്ഥാനത്തിൽ പ്രതികൾക്കെതിരെ ഭാരതീയ ന്യായസംഹിതയിലെ പ്രസക്തമായ വകുപ്പുകൾ ചുമത്തി എഫ്.ഐ.ആർ രജിസ്റ്റർ ചെയ്തിട്ടുണ്ട്. അറസ്റ്റ് രേഖപ്പെടുത്തിയ നാലുപേരെയും കോടതിയിൽ ഹാജരാക്കി ജുഡീഷ്യൽ കസ്റ്റഡിയിൽ വിട്ടതായി ജില്ലാ പോലീസ് മേധാവി (എസ്.പി) അറിയിച്ചു. അതേസമയം, കുറ്റകൃത്യങ്ങളിൽ അധിഷ്ഠിതമായ ഭരണം തുടരുമ്പോൾ പോലീസ് സംവിധാനവും അഴിമതി നിറഞ്ഞതായി മാറുമെന്നായിരുന്നു സംഭവത്തിൽ സമാജ്‌വാദി പാർട്ടി അധ്യക്ഷൻ അഖിലേഷ് യാദവിന്റെ വിമർശനം.