ഡൽഹി: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാർ സ്ഥാനം ഒഴിയണമെന്ന് ആവശ്യപ്പെട്ട് ശക്തമായ സമരപരിപാടികൾ പ്രഖ്യാപിച്ച് കോക്രോച്ച് ജനത പാർട്ടി (സി.ജെ.പി). ഒക്ടോബർ രണ്ടിന് മുംബൈ കേന്ദ്രീകരിച്ചാണ് പ്രക്ഷോഭത്തിന് തുടക്കമിടുന്നത്. മുംബൈയിലെ സമരത്തിന് ശേഷം മറ്റ് പ്രധാന നഗരങ്ങളിലേക്കും പ്രതിഷേധം വ്യാപിപ്പിക്കാനാണ് പാർട്ടി തീരുമാനം. വരുന്ന ഗാന്ധി ജയന്തി ദിനത്തിൽ രാജ്യത്തിന്റെ ജനാധിപത്യം സംരക്ഷിക്കാൻ എല്ലാവരും ചേർന്ന് പ്രതിജ്ഞയെടുക്കണമെന്ന് പാർട്ടി നേതാവ് അഭിജിത് ദീപ്കെ ആഹ്വാനം ചെയ്തു. ഗ്യാനേഷ് കുമാറിന് സി.ജെ.പി നൽകിയിട്ടുള്ള അന്ത്യശാസനത്തിന്റെ കാലാവധി നാളെ അവസാനിക്കും.
അതേസമയം, സി.ഇ.സിക്കെതിരായ നീക്കങ്ങൾ കൂടുതൽ ശക്തമാക്കാനുള്ള തയ്യാറെടുപ്പിലാണ് പ്രതിപക്ഷ കക്ഷികൾ. പാർലമെന്റിൽ വീണ്ടും ഇംപീച്ച്മെന്റ് പ്രമേയം കൊണ്ടുവരുന്നതിനായി ഇതര പ്രതിപക്ഷ പാർട്ടികളുമായി കോൺഗ്രസ് വിപുലമായ കൂടിയാലോചനകൾ ആരംഭിച്ചു. ഗ്യാനേഷ് കുമാർ രാജി സമർപ്പിക്കണമെന്ന് ആവശ്യപ്പെട്ടുകൊണ്ടുള്ള രാജ്യവ്യാപകമായ പ്രതിഷേധ പരിപാടികൾക്ക് ഇതിനോടകം തുടക്കമായിട്ടുണ്ട്.
വിവാദങ്ങളിൽ ഗ്യാനേഷ് കുമാർ കടുത്ത പ്രതിരോധത്തിലാണെന്ന റിപ്പോർട്ടുകൾക്കിടയിലാണ് പ്രതിപക്ഷം പ്രത്യക്ഷ സമരരംഗത്തും പാർലമെന്ററി തലത്തിലും ഒരുപോലെ സമ്മർദ്ദം ശക്തമാക്കുന്നത്. വോട്ട് ക്രമക്കേടുമായി ബന്ധപ്പെട്ട് കോൺഗ്രസ് നൽകിയ മുൻ ഇംപീച്ച്മെന്റ് നോട്ടീസുകൾ സ്പീക്കർ തള്ളിയ സാഹചര്യത്തിലാണ് കൂടുതൽ എം.പിമാരെ അണിനിരത്തി പുതിയ നീക്കത്തിന് വഴിതുറക്കുന്നത്. ഒരാഴ്ചയ്ക്കുള്ളിൽ കോൺഗ്രസിന്റെ നേതൃത്വത്തിൽ ലോക്സഭയിലും രാജ്യസഭയിലും പുതിയ പ്രമേയ നോട്ടീസുകൾ സമർപ്പിക്കും. പ്രദേശ് കോൺഗ്രസ് കമ്മിറ്റികളുടെ നേതൃത്വത്തിൽ കമ്മീഷണർക്കെതിരായ പ്രതിഷേധം രാജ്യമെമ്പാടും ആളിപ്പടരുകയാണ്. ഇതിനുപുറമെ, ഇടതുപക്ഷ സംഘടനകളും വിദ്യാർത്ഥി പ്രസ്ഥാനങ്ങളും നാളെ മുതൽ പ്രക്ഷോഭം കടുപ്പിക്കുമെന്ന് വ്യക്തമാക്കിയിട്ടുണ്ട്.
24 മണിക്കൂറിനകം ഗ്യാനേഷ് കുമാർ രാജി പ്രഖ്യാപിച്ചില്ലെങ്കിൽ ഒക്ടോബർ രണ്ടിന് ഗാന്ധി ജയന്തിയിൽ മുംബൈയിൽ വൻ പ്രതിഷേധം ആരംഭിക്കുമെന്ന് സി.ജെ.പി വ്യക്തമാക്കി. ശക്തമായ ജനകീയ പ്രതിഷേധങ്ങൾ ഭയന്ന് ഇന്നും വരുന്ന തിങ്കളാഴ്ചയും ഉത്തർപ്രദേശിലെ മീററ്റ്, വാരാണസി എന്നിവിടങ്ങളിൽ പങ്കെടുക്കേണ്ടിയിരുന്ന ഔദ്യോഗിക പരിപാടികളിൽ നിന്നും ഗ്യാനേഷ് കുമാർ പിന്മാറിയിരിക്കുകയാണ്.
