അഹമ്മദാബാദ്: അദാനി ഗ്രൂപ്പിനെതിരെ അപകീർത്തികരമായ പ്രചാരണം നടത്തിയെന്ന കേസിൽ അറസ്റ്റിലായ മാധ്യമപ്രവർത്തകൻ രവി നായർക്ക് ജാമ്യം. ഗുജറാത്തിലെ ഗാന്ധിനഗർ സെഷൻസ് കോടതിയാണ് അദ്ദേഹത്തിന് ജാമ്യം അനുവദിച്ചുകൊണ്ട് ഉത്തരവിട്ടത്. അദാനിക്കെതിരായ വാർത്തയുമായി ബന്ധപ്പെട്ട അപകീർത്തിക്കേസിൽ കഴിഞ്ഞ ഏഴ് ദിവസമായി ഗുജറാത്തിൽ തടവിൽ കഴിയുന്ന രവി നായർ നാളെ ജയിൽ മോചിതനാകും.
മുൻകൂർ അറിയിപ്പോ സമൻസോ നൽകാതെയാണ് തനിക്കെതിരെ ജാമ്യമില്ലാ വാറണ്ട് പുറപ്പെടുവിച്ചതെന്ന് കാണിച്ച് രവി നായർ നേരത്തെ ഹൈക്കോടതിയെ സമീപിച്ചിരുന്നു. എന്നാൽ ഈ ഹർജി പരിഗണിക്കാൻ തയ്യാറാകാതിരുന്ന ഹൈക്കോടതി, എതിർകക്ഷിയായ അദാനി എന്റർപ്രൈസസിന് മറുപടി സത്യവാങ്മൂലം സമർപ്പിക്കാൻ കൂടുതൽ സമയം നൽകുകയായിരുന്നു. ജസ്റ്റിസ് എം.കെ. തക്കീറിന്റെ നേതൃത്വത്തിലുള്ള ബെഞ്ചാണ് ഈ ഉത്തരവ് നൽകിയത്. ഹൈക്കോടതിയിലെ നടപടികൾക്കൊപ്പം തന്നെ ഗാന്ധിനഗർ സെഷൻസ് കോടതിയിലും രവി നായർ ജാമ്യഹർജി ഫയൽ ചെയ്തിരുന്നു; ഈ അപേക്ഷ പരിഗണിച്ചാണ് സെഷൻസ് കോടതി ജാമ്യം അനുവദിച്ചത്.
ദി വാഷിങ്ടൺ പോസ്റ്റ് 2025 ഒക്ടോബറിൽ അദാനി ഗ്രൂപ്പുമായി ബന്ധപ്പെട്ട് പുറത്തുവിട്ട അന്വേഷണാത്മക റിപ്പോർട്ടിനെക്കുറിച്ച് രവി നായർ എക്സിൽ (ട്വിറ്റർ) കുറിച്ചതാണ് കേസിന് ആധാരമായത്. കേന്ദ്ര സർക്കാരിന്റെ നിർദ്ദേശപ്രകാരം പൊതുമേഖലാ ഇൻഷുറൻസ് സ്ഥാപനമായ എൽ.ഐ.സി, അദാനി ഗ്രൂപ്പ് കമ്പനികളിലേക്ക് ഏകദേശം 3.9 മില്യൺ ഡോളർ നിക്ഷേപിക്കാൻ നീക്കം നടത്തിയെന്നതായിരുന്നു ആ റിപ്പോർട്ടിലെ പ്രധാന ഉള്ളടക്കം.
ഇതിനെതിരെ അദാനി എന്റർപ്രൈസസ് ഗുജറാത്തിലെ മാൻസ മജിസ്ട്രേറ്റ് കോടതിയിൽ മാനനഷ്ടക്കേസ് ഫയൽ ചെയ്യുകയായിരുന്നു. എക്സിലൂടെ (ട്വിറ്റർ) രവി നായർ നടത്തിയ പ്രതികരണങ്ങൾ സ്ഥാപനത്തിന്റെയും അദാനി ഗ്രൂപ്പിന്റെയും സൽപ്പേരിന് കോട്ടം വരുത്തിയെന്നായിരുന്നു കമ്പനിയുടെ പരാതി. രവി നായരുടെ പോസ്റ്റുകൾ ന്യായമായ വിമർശനമല്ലെന്നും, പൊതുസമൂഹത്തിനും നിക്ഷേപകർക്കും ഇടയിൽ കമ്പനിയുടെ വിശ്വാസ്യത തകർക്കാൻ കരുതിക്കൂട്ടി ചെയ്തതാണെന്നും അദാനി എന്റർപ്രൈസസ് വാദിച്ചു. തുടർന്ന് കേസിൽ വിചാരണ പൂർത്തിയാക്കിയ കോടതി, രവി നായർക്ക് ഒരു വർഷത്തെ തടവുശിക്ഷയും പിഴയും വിധിക്കുകയായിരുന്നു.
