ന്യൂഡൽഹി: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാർ അടിയന്തരമായി സ്ഥാനം ഒഴിയണമെന്ന നിലപാടിനൊപ്പം രണ്ട് പുതിയ ആവശ്യങ്ങൾ കൂടി ഉന്നയിച്ച് കോക്രോച്ച് ജനത പാർട്ടി (സി.ജെ.പി). നടക്കാനിരിക്കുന്ന എല്ലാ തെരഞ്ഞെടുപ്പുകളും റദ്ദാക്കണമെന്നും എസ്.ഐ.ആർ നടപടികൾ അടിയന്തരമായി നിർത്തിവെക്കണമെന്നും പാർട്ടി ആവശ്യപ്പെട്ടു. വിഷയത്തിൽ സമഗ്രമായ ക്രിമിനൽ അന്വേഷണം നടത്തണമെന്നും എസ്.ഐ.ആറുമായി ബന്ധപ്പെട്ട സുപ്രധാന രേഖകൾ പരമോന്നത കോടതിയുടെ നേരിട്ടുള്ള മേൽനോട്ടത്തിൽ വിളിച്ചുവരുത്തണമെന്നും അവർ വ്യക്തമാക്കി. തെരഞ്ഞെടുപ്പ് കമ്മീഷണർമാരുടെ നിയമനവുമായി ബന്ധപ്പെട്ട് 2023-ൽ കൊണ്ടുവന്ന ഭേദഗതി റദ്ദാക്കി പഴയ നിയമന രീതി പുനഃസ്ഥാപിക്കണമെന്ന് സി.ജെ.പി വക്താവ് അഭിജീത് ദീപ്‌കെ വാർത്താസമ്മേളനത്തിൽ ആവശ്യപ്പെട്ടു. എസ്.ഐ.ആർ നടപ്പാക്കാൻ ഗ്യാനേഷ് കുമാറിന് അധികാരം നൽകിയത് ആരാണെന്നും പാർട്ടി ആരാഞ്ഞു.

ഗ്യാനേഷ് കുമാറിന് 48 മണിക്കൂർ സമയമാണ് അനുവദിക്കുന്നതെന്നും ഇതൊരു അന്തിമ മുന്നറിയിപ്പായി കണക്കാക്കി അദ്ദേഹം രാജിവെക്കണമെന്നും അഭിജീത് ദീപ്‌കെ പ്രഖ്യാപിച്ചു. ആവശ്യമെങ്കിൽ ജന്തർ മന്ദിർ കേന്ദ്രീകരിച്ച് രണ്ടാം പ്രക്ഷോഭത്തിന് തുടക്കം കുറിക്കുമെന്നും അദ്ദേഹം വ്യക്തമാക്കി. രാജ്യം കണ്ട ഏറ്റവും വലിയ രാജ്യദ്രോഹിയും വഞ്ചകനുമാണ് ഗ്യാനേഷ് കുമാറെന്ന രൂക്ഷമായ വിമർശനമാണ് സി.ജെ.പി ഉന്നയിച്ചത്.

തെരഞ്ഞെടുപ്പ് കമ്മീഷന്റെ പ്രവർത്തനരീതികളെയും സി.ജെ.പി രൂക്ഷമായി പരിഹസിച്ചു. ചാറ്റ് ജി.പി.ടി (ChatGPT) വഴി മാധ്യമക്കുറിപ്പുകൾ അയക്കുന്നത് കമ്മീഷൻ നിർത്തണം. എസ്.ഐ.ആർ നടപടികൾക്ക് സുപ്രീം കോടതി നിയമപരമായ പരിരക്ഷ ഉറപ്പാക്കിയത് അത്യന്തം നിർഭാഗ്യകരമാണ്. പശ്ചിമ ബംഗാളിൽ സുപ്രീം കോടതിയുടെ മേൽനോട്ടത്തിലാണ് എസ്.ഐ.ആർ നടന്നതെന്നായിരുന്നു കോടതി നിരീക്ഷണം. എന്നാൽ ഇപ്പോൾ ഗുരുതര ക്രമക്കേടുകൾ വെളിച്ചത്തുവന്ന സാഹചര്യത്തിൽ ബഹുമാനപ്പെട്ട സുപ്രീം കോടതി ജഡ്ജിമാർ നിലപാട് പുനഃപരിശോധിക്കാൻ തയ്യാറാകണമെന്നും സി.ജെ.പി ആവശ്യപ്പെട്ടു.

ഗ്യാനേഷ് കുമാർ തന്റെ അധികാരം ദുരുപയോഗം ചെയ്യുകയാണെന്ന് പാർട്ടി ആരോപിച്ചു. വോട്ടുകൾ വെട്ടിമാറ്റി ഒരു പ്രത്യേക രാഷ്ട്രീയ പക്ഷത്തെ സഹായിക്കാനാണ് അദ്ദേഹം ശ്രമിക്കുന്നത്. കഴിഞ്ഞ തെരഞ്ഞെടുപ്പിൽ ബി.ജെ.പിക്ക് ഒറ്റയ്ക്ക് കേവലഭൂരിപക്ഷം നേടാനായിരുന്നില്ല. രാജ്യത്ത് രാഷ്ട്രീയ മാറ്റത്തിന്റെ കാറ്റടിക്കുന്നത് തിരിച്ചറിഞ്ഞ ബി.ജെ.പി, തെരഞ്ഞെടുപ്പ് അട്ടിമറികളിലൂടെ പ്രതിപക്ഷ പാർട്ടികളെ രാഷ്ട്രീയമായി ഇല്ലാതാക്കാനാണ് കരുനീക്കുന്നത്. പിണറായി വിജയൻ, എം.കെ. സ്റ്റാലിൻ, മമത ബാനർജി എന്നിവരെ അധികാരഭ്രഷ്ടരാക്കിയത് എസ്.ഐ.ആർ വഴിയാണെന്നും സി.ജെ.പി വിലയിരുത്തി. അതേസമയം, വിഷയത്തിൽ ശക്തമായ രാജ്യവ്യാപക പ്രക്ഷോഭത്തിലേക്ക് കടക്കുമെന്ന് കോൺഗ്രസും വ്യക്തമാക്കിയിട്ടുണ്ട്. പ്രദേശ് കോൺഗ്രസ് കമ്മിറ്റികളുടെ നേതൃത്വത്തിൽ തെരഞ്ഞെടുപ്പ് കമ്മീഷൻ ഓഫീസുകളിലേക്ക് മാർച്ച് സംഘടിപ്പിക്കാനും പാർട്ടി ആഹ്വാനം ചെയ്തു.