ബെംഗളൂരു: കർണാടകയിലെ മുഗല്ലൊള്ളി താണ്ടയിലുള്ള സർക്കാർ വിദ്യാലയത്തിൽ അധ്യയനം നടക്കുന്നതിനിടെ കോൺക്രീറ്റ് മേൽക്കൂര അടർന്നുവീണുണ്ടായ അപകടത്തിൽ ആറ് കുട്ടികൾക്ക് പരിക്കേറ്റു. ഇവരുടെ പരിക്ക് ഗുരുതരമല്ലെന്നും എല്ലാവരും അപകടനില തരണം ചെയ്തതായും ആശുപത്രിയിൽ കൃത്യമായ ചികിത്സ ലഭ്യമാക്കുന്നുണ്ടെന്നും ഔദ്യോഗിക വൃത്തങ്ങൾ വ്യക്തമാക്കി.
സംഭവത്തിന് പിന്നാലെ സ്കൂൾ മാനേജ്മെന്റിന്റെ കടുത്ത അനാസ്ഥയ്ക്കെതിരെ വലിയ പ്രതിഷേധമാണ് ഉയരുന്നത്. കെട്ടിടത്തിന്റെ അറ്റകുറ്റപ്പണികൾ വേഗത്തിലാക്കണമെന്ന് പലതവണ ആവശ്യപ്പെട്ടിട്ടും പ്രധാനാധ്യാപിക തികഞ്ഞ അനാസ്ഥ കാട്ടിയെന്നാണ് പ്രധാന പരാതി. അഞ്ചാം ക്ലാസിലെ പഠനം പുരോഗമിക്കുന്നതിനിടെയാണ് മേൽക്കൂര താഴേക്ക് പതിച്ചത്. അപകടത്തിൽ ക്ലാസിലുണ്ടായിരുന്ന അധ്യാപികയ്ക്കും സാരമായ പരിക്കേറ്റിട്ടുണ്ട്.
സ്കൂൾ കെട്ടിടത്തിന്റെ ശോചനീയാവസ്ഥയെക്കുറിച്ച് മുൻപുതന്നെ മുന്നറിയിപ്പ് നൽകിയിരുന്ന രക്ഷിതാക്കൾ, താൽക്കാലിക പരിഹാരങ്ങൾക്ക് പകരം കുട്ടികളുടെ സുരക്ഷ മുൻനിർത്തി ശാശ്വതമായ നടപടികളാണ് ഉണ്ടാകേണ്ടതെന്ന് ആവശ്യപ്പെട്ടു. തകർന്നുവീണ കെട്ടിടത്തിന്റെ അറ്റകുറ്റപ്പണികൾ യുദ്ധകാലാടിസ്ഥാനത്തിൽ പൂർത്തിയാക്കാൻ പഞ്ചായത്ത് രാജ് എൻജിനീയറിങ് ഡിപ്പാർട്ട്മെന്റിന് അധികൃതർ നിർദ്ദേശം നൽകിയിട്ടുണ്ട്. പരിക്കേറ്റ വിദ്യാർത്ഥികളുടെ ചികിത്സയും ആരോഗ്യനിലയും നേരിൽക്കണ്ട് വിലയിരുത്താൻ സ്കൂൾ വിദ്യാഭ്യാസ-സാക്ഷരതാ വകുപ്പ് ഡെപ്യൂട്ടി ഡയറക്ടർ ആശുപത്രി സന്ദർശിച്ചു.
ഇതിനിടെ, രാജ്യത്തെ വിവിധ വിദ്യാലയങ്ങളിലെ പ്രശ്നങ്ങൾ ചൂണ്ടിക്കാണിക്കുന്ന സി.ജെ.പിയും അഭിജിത് ദീപ്കെയും കോൺഗ്രസ് ഭരിക്കുന്ന കർണാടകയിലെ സ്കൂളുകളുടെ ദുരവസ്ഥ കാണുന്നില്ലെന്ന് ബി.ജെ.പി കുറ്റപ്പെടുത്തി. സംഭവം വിവാദമായതോടെ, അറ്റകുറ്റപ്പണികൾ ആവശ്യമുള്ള സംസ്ഥാനത്തെ എല്ലാ സ്കൂളുകളിലും പ്രവൃത്തികൾ എത്രയും വേഗം പൂർത്തിയാക്കണമെന്ന് കർണാടക വിദ്യാഭ്യാസ വകുപ്പ് കർശന നിർദ്ദേശം നൽകിയിട്ടുണ്ട്.
