ലഖ്‌നൗ: റോഡിന്റെ തകർച്ചയെക്കുറിച്ച് പരാതി പറഞ്ഞ പ്രദേശവാസികൾക്കെതിരെ പരസ്യഭീഷണിയുമായി ഉത്തർപ്രദേശിലെ ഭരണകക്ഷി എം.എൽ.എ രംഗത്ത്. ആഗ്രയിലെ ഫത്തേഹാബാദ് മണ്ഡലത്തിലാണ് നാടകീയമായ സംഭവങ്ങൾ അരങ്ങേറിയത്. മണ്ഡലത്തിലെ ഒരു ഗ്രാമത്തിലെ മരണവീട് സന്ദർശിക്കാനെത്തിയ ബി.ജെ.പി എം.എൽ.എ ഛോട്ടേലാൽ വർമ്മയോടാണ് തങ്ങളുടെ ദുരിതാവസ്ഥ നാട്ടുകാർ പങ്കുവെച്ചത്. കാലങ്ങളായി വഴി സഞ്ചാരയോഗ്യമല്ലെന്നും, മഴക്കാലത്ത് വെള്ളക്കെട്ട് കാരണം പുറത്തിറങ്ങാൻ പോലും ബുദ്ധിമുട്ടുകയാണെന്നും നാട്ടുകാർ അദ്ദേഹത്തിന്റെ ശ്രദ്ധയിൽപ്പെടുത്തി.

എന്നാൽ ശാന്തമായി തുടങ്ങിയ സംസാരത്തിനിടയിൽ പെട്ടെന്ന് ക്ഷുഭിതനായ ജനപ്രതിനിധി നാട്ടുകാരുമായി തർക്കത്തിലേർപ്പെടുകയായിരുന്നു. ഇനിയും കൂടുതൽ സംസാരിച്ചാൽ ഗ്രാമവാസികളെ മുഴുവൻ തുറുങ്കിലടയ്ക്കുമെന്ന തരത്തിൽ എം.എൽ.എ ഭീഷണി മുഴക്കുന്നതിന്റെ വീഡിയോ സോഷ്യൽ മീഡിയയിൽ വ്യാപകമായി പ്രചരിക്കുന്നുണ്ട്. അവിടെയുണ്ടായിരുന്ന ഒരു വനിതയ്ക്ക് നേരെയും ഇയാൾ ആക്രോശിച്ചു. പ്രസ്തുത സ്ത്രീയുടെ ഇടപെടലാണ് ഗ്രാമവാസികളെ പ്രകോപിപ്പിച്ചതെന്നായിരുന്നു അദ്ദേഹത്തിന്റെ വാദം.

തങ്ങളുടെ ദുരവസ്ഥ സംബന്ധിച്ച് പലതവണ ആശങ്കകൾ പങ്കുവെച്ചിട്ടുണ്ടെന്നും റോഡിന്റെ അവസ്ഥ കാണിച്ച് എം.എൽ.എയ്ക്ക് നിരവധി തവണ കത്തുകൾ അയച്ചിരുന്നുവെന്നും ഗ്രാമവാസികൾ വ്യക്തമാക്കി. കത്തുകൾക്ക് യാതൊരു മറുപടിയും ഫലവും ഉണ്ടാകാത്തതിനാലാണ് അദ്ദേഹം നേരിട്ടെത്തിയപ്പോൾ പ്രശ്നം ധരിപ്പിച്ചതെന്ന് അവർ പറയുന്നു. അടിയന്തര ഘട്ടങ്ങളിൽ ഒരു ആംബുലൻസിന് പോലും പ്രവേശിക്കാൻ പറ്റാത്ത അവസ്ഥയിലാണ് ഈ വഴിയുള്ളത്. രോഗികളെ അരക്കിലോമീറ്ററോളം ചുമന്നുകൊണ്ടുപോയാണ് ആശുപത്രിയിലേക്ക് കൊണ്ടുപോകാനുള്ള വാഹനങ്ങളിൽ കയറ്റുന്നതെന്നും ആളുകൾ ചൂണ്ടിക്കാട്ടുന്നു. അടുത്ത വർഷം സംസ്ഥാനത്ത് നിയമസഭാ തെരഞ്ഞെടുപ്പ് വരാനിരിക്കെ ഭരണകക്ഷി എം.എൽ.എയിൽ നിന്നുണ്ടായ ഈ മോശം പ്രതികരണം വലിയ രാഷ്ട്രീയ വിവാദങ്ങൾക്ക് കാരണമായിട്ടുണ്ട്.

2002-ൽ ബി.ജെ.പി പ്രതിനിധിയായി ഫത്തേഹാബാദിൽ നിന്ന് തെരഞ്ഞെടുക്കപ്പെട്ട വർമ്മ, 2007-ൽ സമാജ്‌വാദി പാർട്ടി ടിക്കറ്റിൽ ഇതേ മണ്ഡലത്തിൽ മത്സരിച്ച് പരാജയപ്പെടുകയാണുണ്ടായത്. തുടർന്ന് ബി.എസ്.പിയിൽ ചേർന്ന അദ്ദേഹം, 2012-ലെ തെരഞ്ഞെടുപ്പിൽ ജയിക്കുകയും മായാവതി മന്ത്രിസഭയിൽ അംഗമാവുകയും ചെയ്തു. പിന്നീട് 2022-ൽ ബി.ജെ.പി സ്ഥാനാർത്ഥിയായി വീണ്ടും മത്സരിച്ചാണ് ഇദ്ദേഹം നിയമസഭയിലെത്തിയത്.