യു.പി.ഐ (UPI) പണമിടപാടുകൾക്ക് സേവനനിരക്ക് ഈടാക്കുമെന്ന രീതിയിൽ പ്രചരിക്കുന്ന വാർത്തകൾ തള്ളി പേയ്മെന്റ്സ് കൗൺസിൽ ഓഫ് ഇന്ത്യ (പി.സി.ഐ). ഉപഭോക്താക്കൾക്ക് യു.പി.ഐ സൗകര്യങ്ങൾ മുൻപത്തെപ്പോലെ തന്നെ പൂർണ്ണമായും സൗജന്യമായി ലഭ്യമാകും. സാധാരണക്കാരായ ജനങ്ങളിൽ നിന്ന് ഇതിനായി യാതൊരുവിധ നിരക്കുകളും ഈടാക്കില്ലെന്ന് സംഘടന വ്യക്തമാക്കി. ഈ നീക്കം ചെറുകിട കച്ചവടക്കാരെയും ബാധിക്കില്ല. മർച്ചന്റ് സർവീസ് ചാർജുകൾ ബാധകമാണെങ്കിൽ അത് ബാങ്കുകളും വ്യാപാരികളും തമ്മിൽ പരസ്പരം തീരുമാനിക്കേണ്ട കാര്യമാണെന്നും, പണമടയ്ക്കുന്ന ഇടപാടുകാർക്ക് ഇത് ബാധകമാകില്ലെന്നും സംഘടന ചൂണ്ടിക്കാട്ടി.
2016-ൽ സംവിധാനം നിലവിൽ വന്നത് മുതൽ ഉപഭോക്താക്കൾക്ക് യു.പി.ഐ സേവനങ്ങൾ സൗജന്യമാണെന്നും, വ്യക്തിഗത സാമ്പത്തിക ഇടപാടുകൾക്ക് നിരക്ക് ചുമത്താൻ നിലവിൽ യാതൊരു നിർദ്ദേശവുമില്ലെന്നും ഔദ്യോഗിക എക്സ് (X) അക്കൗണ്ടിലൂടെ പി.സി.ഐ അറിയിച്ചു. രാജ്യത്തെ ഡിജിറ്റൽ പണമിടപാട് രംഗത്ത് യു.പി.ഐ നിർണ്ണായക പങ്കാണ് വഹിക്കുന്നത്. ഇന്ത്യയിലുടനീളമുള്ള ദശലക്ഷക്കണക്കിന് വരുന്ന ചെറുകിട സംരംഭകർക്ക് അധിക സാമ്പത്തിക ഭാരമില്ലാതെ ഡിജിറ്റൽ പേയ്മെന്റുകൾ സ്വീകരിക്കാൻ യു.പി.ഐ അത്യന്തം സഹായകരമായിട്ടുണ്ടെന്ന് പി.സി.ഐ വ്യക്തമാക്കി.
ടാക്സേഷൻ ആൻഡ് അദർ ലോസ് ഭേദഗതി ബില്ലുമായി ബന്ധപ്പെട്ട് ഉയർന്നുവന്ന ആശങ്കകൾക്കാണ് സംഘടന ഇപ്പോൾ വ്യക്തത വരുത്തിയത്. ഡിജിറ്റൽ പണമിടപാടുകൾ പ്രോസസ്സ് ചെയ്യുന്നതിനായി ബാങ്കുകളും പേയ്മെന്റ് സർവീസ് ദാതാക്കളും വ്യാപാരികളിൽ നിന്നും ഈടാക്കുന്ന തുകയാണ് മർച്ചന്റ് ഡിസ്കൗണ്ട് റേറ്റ്. ഇത് പണമിടപാട് നടത്തുന്ന ഉപഭോക്താക്കൾക്കല്ല, മറിച്ച് കച്ചവടക്കാർക്കാണ് ബാധകമാകുന്നത്.
