ചെന്നൈ: കാവേരി നദീജല പ്രശ്നവുമായി ബന്ധപ്പെട്ട് തഞ്ചാവൂരിൽ നടന്ന പൊതുയോഗത്തിൽ സംസാരിക്കവേ തമിഴ് സിനിമാതാരം തൃഷയെക്കുറിച്ച് തമിഴ്നാട് പ്രതിപക്ഷ നേതാവ് ഉദയനിധി സ്റ്റാലിൻ നടത്തിയ പരാമർശങ്ങൾക്കെതിരെ കടുത്ത പ്രതിഷേധം ഉയരുന്നു. ഉദയനിധിയുടെ വാക്കുകൾ അറപ്പുളവാക്കുന്നതാണെന്ന് ടി.വി.കെ പ്രതികരിച്ചു. തഞ്ചാവൂരിലെ ജനക്കൂട്ടത്തെ അഭിസംബോധന ചെയ്യുന്നതിനിടയിലാണ് അദ്ദേഹം അധിക്ഷേപകരമായ പ്രസ്താവന നടത്തിയത്.
മുഖ്യമന്ത്രി സി. ജോസഫ് വിജയ്യെ വിമർശിച്ചുകൊണ്ട് ഉദയനിധി സംസാരിക്കുന്നതിനിടയിൽ, സദസ്സിലുണ്ടായിരുന്ന ചിലർ തൃഷയുടെ പേര് വിളിച്ചുപറയുകയായിരുന്നു. ഇതിനെത്തുടർന്ന് തൃഷയെയും വിജയ്യെയും അധിക്ഷേപിക്കുന്ന തരത്തിലുള്ള ദ്വയാർത്ഥ പ്രയോഗമാണ് ഉദയനിധിയുടെ ഭാഗത്തുനിന്നുണ്ടായത്. പിന്നീട് താൻ വെറുമൊരു തമാശ പറഞ്ഞതാണെന്ന് അദ്ദേഹം വിശദീകരിക്കുകയും ചെയ്തു. എന്നാൽ, ഈ സംഭവത്തിന്റെ വീഡിയോ ദൃശ്യങ്ങൾ സോഷ്യൽ മീഡിയയിൽ പ്രചരിച്ചതോടെയാണ് ഉദയനിധിക്കെതിരെ വിമർശനങ്ങൾ ശക്തമായത്.
സംഭവത്തിൽ പ്രതികരിച്ച ടി.വി.കെ എം.എൽ.എ രേവന്ത് ചരൺ, ഉദയനിധിയുടെ വാക്കുകൾ കേൾക്കുമ്പോൾ തന്നെ അറപ്പുളവാക്കുന്നതാണെന്ന് വ്യക്തമാക്കി. ആർക്കെതിരെ ആയാലും ഇത്തരം മോശം പരാമർശങ്ങൾ നടത്തുന്നത് അംഗീകരിക്കാൻ കഴിയില്ലെന്നും ചിലരുടെ രാഷ്ട്രീയ സംസ്കാരമില്ലായ്മയും നിലവാരമില്ലായ്മയുമാണ് ഇതിലൂടെ വ്യക്തമാകുന്നതെന്നും അദ്ദേഹം കുറ്റപ്പെടുത്തി. ഉദയനിധി ഇതുവരെ നടത്തിയതിൽ വച്ച് ഏറ്റവും അധഃപതിച്ച പ്രസ്താവനയാണിതെന്നും രേവന്ത് ചരൺ കൂട്ടിച്ചേർത്തു.
വിഷയത്തിൽ ഉദയനിധിക്കെതിരെ ബി.ജെ.പി വക്താവ് നാരായണൻ തിരുപ്പതിയും രംഗത്തെത്തിയിട്ടുണ്ട്. തഞ്ചാവൂരിൽ വച്ച് മുഖ്യമന്ത്രി വിജയ്ക്കും നടി തൃഷയ്ക്കും എതിരെ ഉദയനിധി നടത്തിയ ദ്വയാർത്ഥ പ്രയോഗം അശ്ലീലച്ചുവയുള്ളതും അങ്ങേയറ്റം നാണംകെട്ടതുമാണെന്ന് അദ്ദേഹം വിമർശിച്ചു. അമ്മയും ഭാര്യയും മകളുമുള്ള ഒരു കള്ളനോ മോശം സ്വഭാവമുള്ള ആളോ പോലും ഇത്രയും അധഃപതിച്ച് സംസാരിക്കില്ലെന്നും, ഒരു സ്ത്രീയും ഇത്തരം പ്രയോഗങ്ങൾ ക്ഷമിക്കില്ലെന്നും അദ്ദേഹം പറഞ്ഞു. ദ്രാവിഡ മാതൃകയെന്ന് സ്വയം അവകാശപ്പെടുന്ന സംഘത്തിന്റെ ഇത്തരം മോശം രീതികൾ കണ്ടിട്ടും അതിനെ തിരുത്താൻ മുൻ മുഖ്യമന്ത്രി തയ്യാറാകാത്തത് നാണക്കേടാണെന്നും ബി.ജെ.പി വക്താവ് തന്റെ എക്സ് (ട്വിറ്റർ) കുറിപ്പിലൂടെ വ്യക്തമാക്കി.
