തഞ്ചാവൂർ: ചലച്ചിത്രതാരം തൃഷയ്ക്കെതിരെ നടത്തിയ അധിക്ഷേപ പരാമർശങ്ങളുടെ പേരിൽ തമിഴ്നാട് പ്രതിപക്ഷ നേതാവായ ഉദയനിധി സ്റ്റാലിനെ പൊലീസ് കസ്റ്റഡിയിലെടുത്തു. തഞ്ചാവൂരിലുള്ള അദ്ദേഹത്തിന്റെ വസതിയിൽ നിന്നാണ് പൊലീസ് സംഘം ഉദയനിധിയെ കസ്റ്റഡിയിൽ എടുത്തത്. അദ്ദേഹത്തിന്റെ മുൻകൂർ ജാമ്യാപേക്ഷ ഇന്ന് ഉച്ചയ്ക്ക് 12 മണിക്ക് മദ്രാസ് ഹൈക്കോടതിയുടെ പരിഗണനയ്ക്ക് വരാനിരിക്കെയാണ് ഈ നാടകീയ സംഭവവികാസങ്ങൾ.
തമിഴക വെട്രി കഴകത്തിന്റെ (ടി.വി.കെ) വനിതാ വിഭാഗം നൽകിയ പരാതിയെത്തുടർന്നാണ് തഞ്ചാവൂർ പൊലീസ് ഇത്തരമൊരു നടപടിയിലേക്ക് കടന്നത്. സാധ്യമായ അറസ്റ്റ് നടപടികളിൽ നിന്ന് ഒഴിവാകുന്നതിനായാണ് ഉദയനിധി മദ്രാസ് ഹൈക്കോടതിയെ സമീപിച്ച് മുൻകൂർ ജാമ്യാപേക്ഷ നൽകിയത്. എന്നാൽ കോടതിയിൽ നിന്നും മുൻകൂർ ജാമ്യം ലഭിക്കാത്ത സാഹചര്യമുണ്ടായാൽ അദ്ദേഹത്തിന്റെ അറസ്റ്റ് ഔദ്യോഗികമായി രേഖപ്പെടുത്തിയേക്കുമെന്നാണ് അറിയുന്നത്.
കാവേരി നദീജല വിഷയവുമായി ബന്ധപ്പെട്ട് തഞ്ചാവൂരിൽ സംഘടിപ്പിച്ച പൊതുപരിപാടിയിൽ ജനങ്ങളെ അഭിസംബോധന ചെയ്യവേയാണ് നടി തൃഷയ്ക്ക് നേരെ ഉദയനിധി അധിക്ഷേപ പരാമർശം നടത്തിയത്. ഇതിനെതിരെ വലിയ രീതിയിലുള്ള വിമർശനങ്ങളും പ്രതിഷേധങ്ങളും ഉയർന്നിരുന്നു. ഉദയനിധിയുടെ വാക്കുകൾ കേൾക്കുമ്പോൾ തന്നെ അറപ്പുളവാക്കുന്നതാണെന്നായിരുന്നു ടി.വി.കെ പ്രതികരിച്ചത്. വിഷയത്തിൽ ഉദയനിധിക്കെതിരെ വിവിധ കോണുകളിൽ നിന്ന് വലിയ എതിർപ്പാണ് നിലവിൽ ഉയരുന്നത്.
