ന്യൂഡൽഹി: കനത്ത പ്രളയം ദുരിതം വിതച്ച ഏഴ് സംസ്ഥാനങ്ങൾക്കായി കേന്ദ്ര സർക്കാരിന്റെ എസ്.ഡി.ആർ.എഫ് (SDRF) ഫണ്ട് പ്രഖ്യാപിച്ചു. മുൻകൂർ സഹായമായി ആകെ 2117.85 കോടി രൂപയാണ് കേന്ദ്രം വകയിരുത്തിയിരിക്കുന്നത്. എന്നാൽ, ധനസഹായം ലഭിക്കുന്ന സംസ്ഥാനങ്ങളുടെ ഈ പട്ടികയിൽ കേരളത്തെ ഉൾപ്പെടുത്തിയിട്ടില്ല. ഗുജറാത്ത്, മഹാരാഷ്ട്ര, ഒഡിഷ, നാഗാലാൻഡ്, ഹിമാചൽ പ്രദേശ്, അരുണാചൽ പ്രദേശ്, അസം എന്നീ ഏഴു സംസ്ഥാനങ്ങൾക്കാണ് നിലവിൽ ഈ തുക അനുവദിച്ചിരിക്കുന്നത്.
ഇതിനുപുറമെ, അരുണാചൽ പ്രദേശ്, അസം എന്നിവിടങ്ങളിലെ നിലവിലെ പ്രളയസാഹചര്യം നേരിട്ട് വിലയിരുത്തുന്നതിനായി പ്രത്യേക മന്ത്രിതല സമിതിയെയും കേന്ദ്രം ചുമതലപ്പെടുത്തിയിട്ടുണ്ട്. കേന്ദ്രം അനുവദിച്ച തുകയിൽ ഒഡിഷ, മഹാരാഷ്ട്ര, ഗുജറാത്ത് എന്നീ സംസ്ഥാനങ്ങൾക്ക് 500 കോടി രൂപ വീതമാണ് ലഭിക്കുക. അസമിന് 379.35 കോടിയും ഹിമാചൽ പ്രദേശിന് 193.95 കോടി രൂപയും ലഭ്യമാക്കും. അരുണാചൽ പ്രദേശിന്റെ ദുരിതാശ്വാസ പ്രവർത്തനങ്ങൾക്കായി 44.55 കോടി രൂപയാണ് സർക്കാർ വകയിരുത്തിയിരിക്കുന്നത്.
