ന്യൂഡൽഹി: നീറ്റ് പരീക്ഷയിലെ ചോദ്യപേപ്പർ ചോർച്ചയ്ക്കെതിരെ നടക്കുന്ന പ്രക്ഷോഭങ്ങളെ അധിക്ഷേപിച്ച ബി.ജെ.പി എം.പി കങ്കണ റണാവത്തിന് ശക്തമായ മറുപടിയുമായി കോക്രോച്ച് ജനതാ പാർട്ടി (സി.ജെ.പി) മുഖ്യ വക്താവ് സൗരവ് ദാസ് രംഗത്തെത്തി. സ്വന്തം പാർട്ടിയായ ബി.ജെ.പിയിലെ നേതാക്കൾ പോലും കങ്കണയുടെ വാക്കുകളെ മുഖവിലയ്ക്കെടുക്കുന്നില്ലെന്നും, അതുകൊണ്ട് തന്നെ തങ്ങൾ അവരുടെ പ്രതികരണങ്ങളെ ഗൗനിക്കേണ്ടതില്ലെന്നും അദ്ദേഹം വ്യക്തമാക്കി.
രാജ്യത്തിന്റെ ജനാധിപത്യ വ്യവസ്ഥ കാത്തുസൂക്ഷിക്കുന്നതിന് വേണ്ടി കങ്കണ നൽകിയതിനേക്കാൾ എത്രയോ വലിയ സംഭാവനകളാണ് സി.ജെ.പിയും യുവജനതയും നൽകിയിട്ടുള്ളതെന്ന് സൗരവ് ദാസ് ചൂണ്ടിക്കാട്ടി. ഒരു പാർലമെന്റ് അംഗം എന്ന നിലയിലുള്ള പ്രാഥമിക ചുമതലകൾ പോലും കൃത്യമായി നിർവഹിക്കാൻ കഴിയാത്തവരാണ് ഇപ്പോൾ സി.ജെ.പിയെ വിമർശിക്കാൻ വന്നിരിക്കുന്നത്.
ഇന്നത്തെ പുതിയ തലമുറ കങ്കണയുടെ പ്രസ്താവനകൾക്ക് യാതൊരു വിലയും കൽപ്പിക്കുന്നില്ല. ജനങ്ങൾ തിരഞ്ഞെടുത്ത ഒരു ജനപ്രതിനിധി എന്ന പദവിയിലിരിക്കുന്ന അവർ കുറച്ചുകൂടി രാഷ്ട്രീയ മര്യാദകൾ കാണിക്കേണ്ടതുണ്ട്. ഇപ്പോൾ അവർ നടത്തുന്ന ഇത്തരം പ്രതികരണങ്ങൾ ഒരു എം.പി എന്ന സ്ഥാനത്തിന് ഒട്ടും യോജിച്ചതല്ലെന്നും സൗരവ് ദാസ് കൂട്ടിച്ചേർത്തു.
