മുംബൈ: പ്രസവത്തിന് പിന്നാലെ സ്ത്രീകൾ പഴയ ശരീരവടിവിലേക്ക് ഉടനടി തിരിച്ചെത്തണമെന്ന പൊതുസമൂഹത്തിന്റെ നിർബന്ധബുദ്ധിക്കെതിരെ രൂക്ഷവിമർശനവുമായി ബോളിവുഡ് താരം കത്രീന കൈഫ്. "എങ്ങോട്ടാണ് ഇവർ പറയുന്ന ഈ തിരിച്ചുവരവ്?" എന്നായിരുന്നു പ്രസവാനന്തര ബോഡി ഷെയ്മിംഗിനെക്കുറിച്ച് വോഗ് മാഗസിന് നൽകിയ അഭിമുഖത്തിൽ താരത്തിന്റെ ചോദ്യം. ഭർത്താവ് വിക്കി കൗശലിനൊപ്പം മകൻ വിഹാനെ സ്വാഗതം ചെയ്തതിന് ശേഷമുള്ള മാതൃത്വത്തെക്കുറിച്ചും വ്യക്തിജീവിതവും കരിയറും ഒരുമിച്ചു കൊണ്ടുപോകുന്നതിനെക്കുറിച്ചും സംസാരിക്കവെയാണ് താരം നിലപാട് വ്യക്തമാക്കിയത്.
കുഞ്ഞ് ജനിച്ച് ഒരു വർഷം തികയുന്നതിന് മുൻപ്, കഴിഞ്ഞ സെപ്റ്റംബറിൽ അംബാനി കുടുംബത്തിന്റെ ഗണേശ ചതുർത്ഥി ആഘോഷങ്ങളിൽ പങ്കെടുത്തതിന് പിന്നാലെ കത്രീന വലിയ തോതിലുള്ള സോഷ്യൽ മീഡിയ വിമർശനങ്ങളും ശരീരത്തെക്കുറിച്ചുള്ള അധിക്ഷേപങ്ങളും നേരിട്ടിരുന്നു. എന്നാൽ പുറത്തുനിന്നുള്ള അഭിപ്രായങ്ങൾക്ക് ചെവികൊടുക്കാതെ ജീവിതത്തിലെ ഈ ഘട്ടത്തിലാണ് താൻ ശ്രദ്ധ കേന്ദ്രീകരിക്കുന്നതെന്ന് താരം പറഞ്ഞു.
പ്രസവശേഷം സ്ത്രീകളുടെ ശരീരത്തിലുണ്ടാകുന്ന മാറ്റങ്ങളെക്കുറിച്ച് വ്യക്തമായ ധാരണയുണ്ടായിട്ടും ആളുകൾ അവരെ മോശമായി വിലയിരുത്തുന്നുണ്ടെങ്കിൽ അത് വിവരമില്ലായ്മ കൊണ്ടല്ലെന്നും മറിച്ച് അവരുടെ വ്യക്തിപരമായ മനോഭാവത്തിന്റെ പ്രശ്നമാണെന്നും കത്രീന കൂട്ടിച്ചേർത്തു.
