ന്യൂയോർക്ക്: ഐക്യരാഷ്ട്രസഭാ പൊതുസഭയിൽ നടത്തിയ പ്രസംഗത്തിൽ ന്യൂയോർക്ക് മേയറും ഇന്ത്യൻ വംശജനുമായ സൊഹ്റാൻ മംദാനിക്കെതിരെ രൂക്ഷമായ കടന്നാക്രമണവുമായി ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു. മംദാനി മേയർ പദവി ഏറ്റെടുത്തതിനു ശേഷം ന്യൂയോർക്കിലെ ഭൂരിപക്ഷം വരുന്ന ജൂതവിഭാഗങ്ങൾക്കും സുരക്ഷിതത്വം നഷ്ടപ്പെട്ടുവെന്ന് അദ്ദേഹം കുറ്റപ്പെടുത്തി. സൊഹ്റാൻ മംദാനിയെ ഒരു 'ജൂതവിരുദ്ധൻ' എന്നാണ് നെതന്യാഹു പൊതുസഭയിൽ വിശേഷിപ്പിച്ചത്.
യു.എൻ പൊതുസഭാ സമ്മേളനത്തിന് മുന്നോടിയായിത്തന്നെ നെതന്യാഹുവും സൊഹ്റാൻ മംദാനിയും തമ്മിൽ കടുത്ത വാക്പോര് ഉടലെടുത്തിരുന്നു. പൊതുസഭയിൽ പങ്കെടുക്കാനായി നെതന്യാഹു എത്തുന്നതിന് മുൻപ് സി.എൻ.എന്നിന് അനുവദിച്ച അഭിമുഖത്തിൽ, ഇസ്രായേൽ പ്രധാനമന്ത്രിയെ 'യുദ്ധക്കുറ്റവാളി' എന്നും ഗാസയിലെ ജനങ്ങൾക്ക് നേരെയുള്ള 'ഭീകരമായ വംശഹത്യയുടെ സൂത്രധാരൻ' എന്നുമാണ് മംദാനി വിശേഷിപ്പിച്ചത്. ഇതിനുപുറമെ, അന്താരാഷ്ട്ര ക്രിമിനൽ കോടതിയുടെ അറസ്റ്റ് വാറന്റ് നിലനിൽക്കുന്നതിനാൽ ന്യൂയോർക്ക് മണ്ണിൽ കാലുകുത്തിയാൽ നെതന്യാഹുവിനെ കസ്റ്റഡിയിലെടുക്കണമെന്നും മംദാനി ആവശ്യപ്പെട്ടിരുന്നു. എന്നാൽ, ഒരു നഗരത്തിന്റെ മേയർ എന്ന നിലയിൽ അദ്ദേഹത്തെ അറസ്റ്റ് ചെയ്യാനുള്ള നിയമപരമായ അധികാരം തനിക്കില്ലെന്ന് മംദാനി പിന്നീട് വ്യക്തമാക്കി.
മംദാനിയുടെ പ്രസ്താവനകൾക്ക് മറുപടിയായി ഇസ്രായേൽ പ്രധാനമന്ത്രി നേരത്തെ സമൂഹമാധ്യമങ്ങളിൽ ഒരു ലഘു വീഡിയോ പങ്കുവെച്ചിരുന്നു. താൻ ഐക്യരാഷ്ട്രസഭയിലേക്ക് വരികയാണെന്നും, തങ്ങളുടെ ധീരരായ സൈനികരുടെ യാഥാർത്ഥ്യവും ഒപ്പം മംദാനിയെക്കുറിച്ചുള്ള സത്യങ്ങളും ലോകത്തിന് മുന്നിൽ തുറന്നുകാട്ടുമെന്നും മംദാനിയെ ഓർത്ത് ലജ്ജിക്കുന്നുവെന്നും നെതന്യാഹു അന്ന് പ്രതികരിച്ചു. നിരപരാധികളായ ഇസ്രായേൽ ജനതയെ കൊന്നൊടുക്കിയ ഹമാസ് ഭീകരരെ പിന്തുണയ്ക്കാൻ ലജ്ജയില്ലേ എന്നും ആ വീഡിയോയിലൂടെ നെതന്യാഹു ചോദിച്ചിരുന്നു.
ഇതിന് പിന്നാലെയാണ് യു.എൻ പൊതുസഭയിലെ തന്റെ ഔദ്യോഗിക പ്രസംഗത്തിലും മംദാനിയെ ലക്ഷ്യമിട്ട് നെതന്യാഹു കടുത്ത ആക്ഷേപങ്ങൾ ഉന്നയിച്ചത്. മംദാനി ജൂതവിരുദ്ധനാണെന്നും അദ്ദേഹം അധികാരത്തിലെത്തിയ ശേഷം നഗരത്തിൽ ജൂത ജനവിഭാഗങ്ങളുടെ സുരക്ഷ അപകടത്തിലായെന്നും നെതന്യാഹു ആവർത്തിച്ചു. അതേസമയം, എല്ലാ തരത്തിലുള്ള ജൂതവിരുദ്ധതയെയും താൻ ശക്തമായി അപലപിക്കുന്നുണ്ടെന്നും, ഇസ്രായേൽ ഭരണകൂടത്തിന്റെ സൈനിക നടപടികളെ വിമർശിക്കുന്നതിനെ ആസൂത്രിതമായി ജൂതവിരുദ്ധതയായി മുദ്രകുത്തുകയാണെന്നും മംദാനി മുൻപ് തന്നെ വിശദീകരിച്ചിട്ടുണ്ട്.
