മാഡ്രിഡ്: കമ്മ്യൂണിസ്റ്റ് ചൈനയുടെ സ്ഥാപക നേതാവായ മാവോ സെതൂങ്ങിനെ 'ചൈനീസ് ഏകാധിപതി' എന്ന് പരാമർശിച്ചതിൽ ഉണ്ടായ കടുത്ത പ്രതിഷേധങ്ങൾക്കൊടുവിൽ പരസ്യമായി മാപ്പപേക്ഷിച്ച് റയൽ മാഡ്രിഡ് താരം കിലിയൻ എംബാപ്പെ. ഫ്രഞ്ച് ടോക്ക് ഷോയായ 'ദി ബ്രിഡ്ജ്' അഭിമുഖത്തിൽ തനിക്ക് ഏറ്റവും ഇഷ്ടപ്പെട്ട മീമിനെക്കുറിച്ചുള്ള ചോദ്യത്തിന് മറുപടിയായി, മാവോ സെതൂങ്ങിന്റെ ശരീരത്തിൽ തന്റെ മുഖം ചേർത്തുവെച്ച ചിത്രത്തെ പരാമർശിച്ചതാണ് വിവാദങ്ങൾക്ക് വഴിവെച്ചത്. തന്റെ വാക്കുകൾ വിവേകരഹിതമായിരുന്നുവെന്നും ചൈനീസ് ജനതയോടും അവരുടെ ചരിത്രത്തോടും കടുത്ത ബഹുമാനമുണ്ടെന്നും സോഷ്യൽ മീഡിയയിലൂടെ പുറത്തുവിട്ട പ്രസ്താവനയിൽ എംബാപ്പെ വ്യക്തമാക്കി.
താരത്തിന്റെ പരാമർശത്തിന് പിന്നാലെ എംബാപ്പെ കളിക്കുന്ന മത്സരങ്ങളുടെയും സ്പാനിഷ് ലീഗ് ഫുട്ബോളിന്റെയും സംപ്രേഷണം ചൈനീസ് ബ്രോഡ്കാസ്റ്റർമാർ നിർത്തിവെച്ചു. കൂടാതെ, പ്രമുഖ ചൈനീസ് സ്പോർട്സ് വെബ്സൈറ്റായ 'ഡോങ്ചിയുഡി', 2026-ലെ ബാലൺ ഡി ഓർ റാങ്കിംഗിൽ രണ്ടാം സ്ഥാനത്തെത്തിയ എംബാപ്പെയുടെ പേര് പട്ടികയിൽ നിന്ന് നീക്കം ചെയ്യുകയും 'അങ്ങനെയൊരു വ്യക്തി നിലവിലില്ല' എന്ന് രേഖപ്പെടുത്തുകയും ചെയ്തു. ഹാരി കെയ്ൻ പുരസ്കാരം നേടിയ ഈ വർഷത്തെ വോട്ടെടുപ്പിൽ രണ്ടാമതായിരുന്നു എംബാപ്പെ.
വിഷയത്തിൽ സ്പാനിഷ് ലീഗ് അസോസിയേഷന് വേണ്ടി ലാ ലിഗ പ്രസിഡന്റ് ഹാവിയർ തെബാസും ചൈനീസ് ജനതയോട് ഔദ്യോഗികമായി മാപ്പ് ചോദിച്ചു. ഒരു വ്യക്തിയുടെ പെരുമാറ്റം കാരണം ചൈനയിലെ ലക്ഷക്കണക്കിന് ആരാധകരുമായുള്ള ബന്ധത്തിൽ വിള്ളൽ വീഴാനോ ലീഗിലെ 20-ലധികം ക്ലബ്ബുകളെ അത് ബാധിക്കാനോ അനുവദിക്കില്ലെന്ന് തെബാസ് എക്സിലൂടെ അറിയിച്ചു.
